Փաստ ինֆո

Տեղեկատվական և կառավարման քաոսի մեր այս ժամանակում կողմնորոշվելու համար որքանո՞վ է զգոն մեր հասարակությունը։ Որքանո՞վ է պաշտպանված։

Այս հարցն անչափ կարևոր է, քանի որ ազգային-պահպանողական գաղափարների կրող քաղաքական ուժերի հիմնական թիրախն այսօր պարտվողական և թրքամոլ իշխանությունն է, իսկ հայության ուժերը ջլատող, օտարահպատակ և շատ վտանգավոր այլ ուժերի հանդեպ կատարյալ անտարբերություն է։ Մի տեսակ չնկատելու, նրանց մասին չխոսելու միտումներն են զգալի։

Ուստի պատահական չէ, որ այս պայմաններում աշխարհով մեկ իրենց շոշափուկներն են տարածում ազգայինի դիմակի տակ թաքնված, մոլագարության հասնող ռուսատյացութուն գեներացնող չափազանց վտանգավոր և ըստ էության՝ ահաբեկչական ուժեր՝ այդպիսով իրականացնելով իրենց հակահայ քարոզչությունը։

Հարց՝ Հայաստանի և Արցախի պարզ քաղաքացին որքանո՞վ է ապահովագրված այսօրինակ ուժերի ցանցը չընկնելուց, որքանո՞վ է պատրաստ դիմակայելու՝ սոցցանցերում առատորեն վխտացող ֆեյքերի և ֆեյքնյուզերի տարածած ստին ու կեղծիքին, հոգեբանական ահաբեկչությանն ու տեռորին։

Կարծում ենք, ոչնչով։ Մինչդեռ կոնկրետ կայքերի միջոցով / հիմնականում՝ սփյուռքահայերի շրջանում տարածված/ արդեն իսկ սկսել են 2018-ի գունավոր հեղափոխության կրկնօրինակը խաղարկել։ Ընդ որում, նույն մանիպուլյացիաներին են դիմում՝ կրկին տիրաժավորելով «նախկիններ-ներկաներ»՝ 30 տարի «թալանելու» և «լափելու» մոտիվները։

Բացի այն, որ ներկա իշխանությունների մաս կազմող ամենանախկիններն են այս անգիր արած տեքստը պարբերաբար կրկնում, ընդ որում, անկախության շրջանի ամենաօլիգարխիկ և օդիոզ դեմքերը, որ վայրագ սեփականաշնորհման արդյունքում, հհշական իշխանությունների կամոք ժամանակին գերհարստացել են, ապա՝ հետագա տարիներին՝ կեղծավորի դիմակ հագած՝ պետականաքանդության շարունակական փորձերից հետո, թուրքական փողերով /թուրքադրբեջանական տանդեմի առաջնորդներն են այս մասին խոստովանել/, ի վերջո, 2018-ին ներկա՝ ազգակործան-պետականաքանդին իշխանության բերել։ ՈՒ այս դեմքերը հիմա կրկին նույն գործին են՝ քանդում ու քանդում են պետությունը հիմքից՝ ժողովրդին խոստանալով «էժան կյանք»՝ թուրքական բազարում, թուրքերի հետ առևտուր, ախպերություն։ Մի խոսքով՝ ազգային նվաստացմամբ դեպի նոր ցեղասպանության են տանում այս մարդիկ հայությանը։

Բայց սրանց զուգահեռ այլադեմ վտանգավորներն էլ կան, ուժեր, որ «ազգային» անունի ներքո պատսպարված ժողովրդին խաբում են արևմտյան արժեքներով, արևմտյան խաղաղապահներով, պարզ հայ մարդուց թաքցնելով, որ մեր տարածաշրջանում Արևմուտքի դեսպանը հայասապան Թուրքիան է՝ իր բազարով և ՆԱՏՕ-ի թուրքական զինվորներով։

Արցախյան ազատամարտի հաղթած ղեկավարներին և գեներալներին թիրախավորող ազգային ուժեր չեն կարող լինել, դրանք դրսից ֆինանսավորվող «ֆեյք-ազգայիններ» են, որոնց նպատակը համացանցային տարբեր տիրույթներում կեղծիք և սուտ տարածելով, հոգեբանական տեռորի միջոցով հայությանը վերջնականապես ջլատելն է։

Աղբյուր` Փաստինֆո