Փաստ ինֆո

«Նիկոլ Փաշինյանի իրականացրած հայելային հետքաշման գաղափարի առաջին պտուղները, ցավոք, արդեն դրսևորվել են Արցախում։ Ասկերանի շրջանի Փառուխ գյուղն ու Քարագլուխ լեռնաշղթան Ադրբեջանի ագրեսիայի հետևանքով օկուպացվել էր, որը բավականին ծանր իրադրություն է ստեղծել Արցախի կենսունակության համար։ Սրա հետևանքով, Արցախում ապրող մեր հայրենակիցները, անվտանգային առումով՝ բավականին ծանր իրավիճակի մեջ են հայտնվել»,- Ազատության հրապարակում հայտարարել է ԱԺ «Պատիվ ունեմ» խմբակցության պատգամավոր Տիգրանն Աբրահամյանը։

Նա հիշեցրել է, որ Նիկոլ Փաշինյանի իրականացրած հայելային հետքաշման գաղափարը չի վերաբերում միայն Արցախին. «Փաստացի վտանգի տակ է հայտնվել նաև Սոթք – Խոզնավար հատվածը, ասել է, թե՝ Գեղարքունիքը, Վայոց Ձորը, Սյունիքը, ինչպես նաև՝ Արարատի մարզի Երասխ բնակավայրը։ Այս բոլոր բնակավայրերի վերաբերյալ Նիկոլ Փաշինյանը ներկայացրել է հայելային հետքաշման գաղափարը»,- ասել է Աժ պատգամավորը։

Վերջինս հավելել է՝ այսպիսի գաղափարներով կարող են առաջ շարժվել միայն այն մարդիկ, ովքեր չեն պատկերացնում առաջնագիծն ու սահմանամերձ մարզերի և բնակավայրերի առանձնահատկությունները. «Դեռ չեմ խոսում այն մասին, որ հայելային հետքաշման այս գաղափարն, ըստ էության, տարածքները խաղաղ ճանապարհով հանձնման քաղաքականության մի մասն են կազմում»,- ասել է Ազգային Ժողովի «Պատիվ ունեմ» խմբակցության պատգամավոր Տիգրան Աբրահամյանն, ով, ի դեպ, օրերս է վերադարձել դեպի Արցախ և սահմանամերձ բնակավայրեր կատարած աշխատանքային այցից։

Մանրամասները՝ տեսանյութում

Աղբյուր` Փաստինֆո