Փաստ ինֆո

Քարագլուխը մնալու է հայկական ուժերի հսկողության ներքո։ Նման համոզմունք է հայտնել ՀՀ ԱԺ նախկին պատգամավոր Նաիրա Զոհրաբյանը, որը այցելել է Խրամորթ եւ այնտեղից տեսանյութ տարածել այս պահին առկա իրավիճակի մասին։

Նրա փոխանցմամբ՝ բարձունքի՝ Խրամորթի կողմից տեսանելի հատվածը մեր վերահսկողության տակ է, մյուսը՝ ադրբեջանցի զինծառայողների։
«Փառուխի կողմից բացած կածաններով ադրբեջանցի զինծառայողներին հաջողվել է հաստատվել Քարագլխի որոշակի հատվածում»,-նշում է

Զոհրաբյանն ու հիշեցնում, որ Քարագլուխը իր ռազմավարական նշանակությամբ հանդիսանում է երկրորդ Շուշի։
Զոհրաբյանը նաև նշում է, որ նշված տեղանքում զգալի աշխատանք են կատարում ռուս խաղաղապահները՝ պնդելով, որ ՀՀ իշխանությունների կողմից շրջանառվող միտքն այն մասին, որ խաղաղապահները թերանում են կատարելու իրենց առաքելությունը, չի համապատասխանում իրականությանը։

«Քարագլխի բարձունքին ծածանվում է Արցախի դրոշը և այն վճռականությունը, որ տեսնում եմ արցախցիների մոտ և աշխատանքը, որ անում են նաև խաղաղապահները, ինձ վստահություն է տալիս՝ ասելու, որ Արցախի դրոշն այնտեղից չի իջնելու»,-ասել է Զոհրաբյանը։

Ինչպես արդեն տեղեկացրել ենք՝ Ադրբեջանի զինված ուժերը, խախտելով եռակողմ հայտարարության պահանջները, մարտի 24-ին՝ ժամը 16:00-ի դրությամբ, Ասկերանի շրջանի Փառուխ գյուղի ուղղությամբ խախտել են շփման գիծը, գրավել գյուղն ու առաջացել Քարագլուխ ռազմավարական բարձունքի ուղղությամբ։ Նրանց առաջխաղացումը կասեցրել են ռուս խաղաղապահները։

Ընդ որում, շարունակելով հրադադարի ռեժիմի կոպտագույն խախտումները, ադրբեջանցիները կիրառել են ոչ միայն հրաձգային զինատեսակներ, այլ նաեւ հարվածային անօդաչու թռչող սարքեր, այդ թվում նաև «Bayraktar TB-2» տիպի: Հակառակորդի գործողությունների հետևանքով մարտի 26-ի դրությամբ՝ հայկական կողմից զոհվել է ՊԲ 3 պայմանագրային զինծառայող։

Բանակցություններ են ընթանում ադրբեջանցիների ելման կետ վերադառնալու ուղղությամբ։ Նրանք հեռացել են Փառուխ գյուղից, սակայն շարունակում են դիրքավորված մնալ Քարագլխի որոշ հատվածներում։

Աղբյուր` Փաստինֆո