Փաստ ինֆո

Համայնքներում փորձում են իշխանությունը զավթել, բռնագրավել: Իրենք արհեստական խնդիրներ են ստեղծում, հետո այդ արհեստական խնդրի լուծման համար կուրիոզ, աբսուրդ օրենքներ են ստեղծում, ժողովրդավարության ու մարդու իրավունքների «հերն անիծում են»: «Փաստինֆո»-ի հետ զրույցում նման գնահատականով է հանդես եկել «Հայրենիք» կուսակցության Վանաձորի տարածքային կառույցի ղեկավար Վահե Դոխոյանը՝ խոսելով ՔՊ-ական պատգամավորների հեղինակած ՏԻՄ-երի վերաբերյալ նոր նախագծի մասին:

Հիշեցնենք, որ այսօր խորհրդարանն առաջին ընթերցմամբ ընդունեց Տեղական ինքնակառավարման մասին օրենքում փոփոխություններ կատարելու մասին նախագիծը, որով առաջարկվում է այն համայնքներում, որտեղ ինչ-որ պատճառով համայնքապետեր չեն ընտրվում, հնարավորություն տալ վարչապետին՝ ժամանակավոր պաշտոնակատարներ նշանակել:

Նախագծի հեղինակները ՔՊ-ական պատգամավորներն են, որոնք պնդում են, որ օրենքի նախագիծը նպատակ ունի լուծել մի շարք համայնքներում, մասնավորապես՝ Վանաձորում ստեղծված ֆորսմաժորային իրավիճակը, որտեղ տևական ժամանակ է համայնքապետ չեն կարողանում ընտրել, քանի որ դատարանը արգելք է դրել համայնքապետի ընտրության օրակարգով նիստ անցկացնելու վրա:

«Փաստինֆո»-ի հետ զրույցում «Հայրենիք» կուսակցության Վանաձորի տարածքային կառույցի ղեկավար Վահե Դոխոյանը հակադարձեց՝ Վանաձորում իրավիճակը լուծելու օրինական ճանապարհ կա՝ թույլ տան ավագանու նիստ անցկացնել և քաղաքապետ ընտրել.

«Իրենք խնդիրը ստեղծում են, հետո խնդիրը լուծելու համար մի հատ հիմար լուծում են ստեղծում, որը վաղ չէ մյուս օրը իրենց համար նոր խնդիր է լինելու, բա լավ, չե՞ն մտածում, որ այդ օրենքը մի քանի տարի հետո իրենց ի վնաս է աշխատելու, կարելի՞ է ժողովրդավարության գնացող երկրում նման հիմար օրենքներ ստեղծել: Փաստացի ընտրված ավագանի կա, բայց մարդիկ օրինագիծ են ընդունում համայնքապետի ԺՊ նշանակելու մասին, բայց ոչինչ չի խանգարում, որ ավագանու նիստ նշանակեն ու համայնքապետ ընտրեն»,-ասաց զրուցակիցը:

Վահե Դոխոյանի պնդմամբ՝ համայնքներում իշխանությունը զավթելու հերթական փորձն է արվում սրանով.

«Պարզ է չէ, որ եթե ժողովուրդը իրենց վստահեր, ընտրեր իրենց, իրենք նման օրենք ընդունելու կարիք չէին ունենա, այստեղ ավելի մեծ խնդիր կա, պետք է գիտակցեն, որ վաղուց կորցրել են ժողովրդի վստահությունը և զոռբայությամբ չի կարելի իշխանություն պահել, կարող են մի օր էլ օրենք բերել, որ քաղաքապետերը նշանակովի են,սահմանադրական կարգ փոխեն, բայց իրենք պետք է գիտակցեն, որ ժողովրդի վստահությունը, պուլսը կորցրել են վաղուց ու խիստ ժամանակավոր է՝ ինչ նախագիծ ուզում են ընդունեն, եթե չկա ժողովրդի աջակցությունը, այդ իշխանությունը երկար կյանք չի կարող ունենալ»,-ասաց Դոխոյանը:

Բացի դա զրուցակիցը նկատեց, որ շատ անհասկանալի դրույթներ կան նախագծում, օրինակ՝ օրենքով ասվում է եթե ԺՊ նշանակելուց 14 օրվա ընթացքում ավագանին նիստ չի գումարում, ավագանին կարող է ցրվել.

« Սա վերաբերվում է այն դեպքին, երբ ավագանին տարբեր պատճառներով նիստ չի ուզում գումարել, բոյկոտում է, բայց այստեղ խնդիրն այն է, որ մեզ թույլ չեն տալիս նիստ գումարել»,-ասաց Վահե Դոխոյանը:

Հիշեցնենք, որ Վանաձորում ՏԻՄ ընտրություններին մասնակցած 10 քաղաքական ուժերից 5-ն էին հաղթահարել անցողիկ շեմը։

«Մամիկոն Ասլանյան» դաշինքը ստացել էր 15 մանդատ, «Քաղաքացիական պայմանագիրը»՝ 9 մանդատ, Հայաստանի աշխատավորական սոցիալիստական կուսակցությունը՝ 5 մանդատ, իսկ «Հայրենիք» և «Ապրելու երկիր» կուսակցություններն՝ 2-ական մանդատ։

Վանաձորի նախկին քաղաքապետ Մամիկոն Ասլանյանը, որի գլխավորած դաշինքը դեկտեմբերի 5-ին կայացած ընտրություններին ամենամեծ թվով քվեն է ստացել, կալանավորվել էր դեկտեմբերի 16-ին:

Բացի այդ՝ ԼՀԿ-ն, որը դեկտեմբերի 5-ի ՏԻՄ ընտրությունների արդյունքներով Վանաձորում ստացել էր ընտրողների ձայների 3,97 տոկոսը և զբաղեցրել 6-րդ տեղը, աջակցելով ՔՊ-ին, դիմել էր Վարչական դատարան, որպեսզի անվավեր ճանաչվեն Վանաձորի համայնքապետի ընտրությունները, սակայն դատարանը մերժեց ԼՀԿ-ի հայցը։ ԼՀԿ-ն նաև առանձին միջնորդություն էր ներկայացրել Վարչական դատարան՝ պահանջելով պարտավորեցնել Վանաձոր համայնքի ավագանուն ձեռնպահ մնալ Վանաձոր միավորված համայնքի ղեկավար ընտրելուն ուղղված գործողություններից, այն է՝ համայնքի ղեկավար ընտրելու օրակարգով նիստ անցկացնելուց և ղեկավար ընտրելուց, ինչը բավարարվել էր։

Թեև դատարանն անփոփոխ է թողել Վանաձորի ՏԻՄ ընտրության արդյունքներն ամրագրող որոշումը, սակայն ավագանին նիստ չի կարողանում անել, քանի որ չի վերացվել նիստ հրավիրելն արգելող դատարանի որոշումը։

Արդյունքում՝ Վանաձորում քաոսային վիճակ է, իսկ ԼՀԿ ղեկավար Էդմոնդ Մարուքյանն էլ խրախուսվեց ու դիվանագետ նշանակվեց։

Աղբյուր` Փաստինֆո