Փաստ ինֆո

Վերջին ՏԻՄ ընտրություններից հետո, հատկապես համայնքների խոշորացման արդյունքում, մի շարք համայնքներում ստեղծվել է իրավիճակ, որ համայնքային կառավարման բնականոն ընթացքը խաթարված է: Այս մասին խորհրդարանում «Տեղական ինքնակառավարման մասին» օրենքում լրացում կատարելու մասին նախագծի քննարկման ժամանակ հայտարարեց նախագծի համահեղինակ Վահագն Հովակիմյանը:

Ըստ ՔՊ-ական պատգամավորի՝ օրենսդրական նախաձեռնության հրատապությունը նրանում է, որ այն համայնքներում, որտեղ նման խնդիր է ստեղծվել, կարգավորվի ՏԻՄ կառավարությամը և վերականգնվի քաղաքացիների սպասարկման բնականոն գործընթացը:

«Հայաստան» խմբակցության քարտուղար Արծվիկ Մինասյանը Հովակիմյանից հետաքրքրվեց՝ կոնկրետ ո՞ր համայնքներին է նախագիծը վերաբերելու, ՔՊ-ական պատգամավորն էլ պարզաբանեց՝ այն համայնքներում, որտեղ ֆորսմաժորային իրավիճակ կլինի.

«Այս պահին նման խնդիր ունենք Վանաձորում: Արդեն երկու ամիս է, առկա է խնդիրը, եթե այլ իրավական լուծում լիներ, համոզված եղեք, համայնքը ինքը կլուծեր, բոլոր մասնագետները չէին ասի, որ խնդրի լուծումը օրենսդրական նախաձեռնությունն է»,-ասաց Հովակիմյանը:

Հիշեցնենք, որ Վանաձորում ՏԻՄ ընտրություններին մասնակցած 10 քաղաքական ուժերից 5-ն էին հաղթահարել անցողիկ շեմը։ «Մամիկոն Ասլանյան» դաշինքը ստացել էր 15 մանդատ, «Քաղաքացիական պայմանագիրը»՝ 9 մանդատ, Հայաստանի աշխատավորական սոցիալիստական կուսակցությունը՝ 5 մանդատ, իսկ «Հայրենիք» և «Ապրելու երկիր» կուսակցություններն՝ 2-ական մանդատ։

Վանաձորի նախկին քաղաքապետ Մամիկոն Ասլանյանը, որի գլխավորած դաշինքը դեկտեմբերի 5-ին կայացած ընտրություններին ամենամեծ թվով քվեն է ստացել, կալանավորվել էր դեկտեմբերի 16-ին:

Բացի այդ՝  ԼՀԿ-ն, որը դեկտեմբերի 5-ի ՏԻՄ ընտրությունների արդյունքներով Վանաձորում ստացել էր ընտրողների ձայների 3,97 տոկոսը և զբաղեցրել 6-րդ տեղը, աջակցելով ՔՊ-ին, դիմել էր Վարչական դատարան, որպեսզի անվավեր ճանաչվեն Վանաձորի համայնքապետի ընտրությունները, սակայն դատարանը մերժեց ԼՀԿ-ի հայցը։ ԼՀԿ-ն նաև առանձին միջնորդություն էր ներկայացրել Վարչական դատարան՝ պահանջելով պարտավորեցնել Վանաձոր համայնքի ավագանուն ձեռնպահ մնալ Վանաձոր միավորված համայնքի ղեկավար ընտրելուն ուղղված գործողություններից, այն է՝ համայնքի ղեկավար ընտրելու օրակարգով նիստ անցկացնելուց և ղեկավար ընտրելուց, ինչը բավարարվել էր։

Թեև դատարանն անփոփոխ է թողել Վանաձորի ՏԻՄ ընտրության արդյունքներն ամրագրող որոշումը, սակայն ավագանին նիստ չի կարողանում անել, քանի որ չի վերացվել նիստ հրավիրելն արգելող դատարանի որոշումը։

Արդյունքում՝ Վանաձորում քաոսային վիճակ է, իսկ ԼՀԿ ղեկավար Էդմոնդ Մարուքյանն էլ խրախուսվեց ու դիվանագետ նշանակվեց։

Աղբյուր` Փաստինֆո