Փաստ ինֆո

Հայաստանը փորձում է փոխել իր աշխարհաքաղաքական վեկտորը դեպի Արևմուտք, հայկական կողմն անգամ պատրաստ է շատ լուրջ զիջումների գնալ Արցախի հարցում, ճանաչել Ադրբեջանի տարածքային ամբողջականությունը, քանի որ Փաշինյանը և իր թիմակիցները կարծում են, որ դրանից հետո Ռուսաստանի՝ Հայաստանի վրա ազդելու հնարավորությունները կկրճատվեն: «Փաստինֆո»-ի հետ զրույցում նման հայտարարությամբ է հանդես եկել քաղաքական մեկնաբան Հայկ Խալաթյանը:

Նշենք, որ Նիկոլ Փաշինյանը և իր թիմակիցները Արցախի Փառուխ գյուղում ստեղծված իրավիճակի վերաբերյալ իրենց հայտարարություններում մշտապես կարմիր թելի նման տանում են այն թեզը, որ իրավիճակի պատասխանատուն Արցախում տեղակայված ռուս խաղաղապահներն են: Այսօր էլ կառավարության նիստին Նիկոլ Փաշինյանը, խոսելով հակառակորդի՝ Փառուխ գյուղ ներխուժման մասին, հայտարարել է, որ «Փառուխում ռուս խաղաղապահների աչքի առաջ ադրբեջանցիները մուտք են գործել նրանց պատասխանատվության գոտի»:

Հատկանշական է, որ այս ամենի ֆոնին՝ ապրիլի 6-ին Բրյուսելում սպասվում է Փաշինյան-Ալիև հանդիպում՝ Եվրոպական խորհրդի նախագահ Շառլ Միշելի միջնորդությամբ:

Վերլուծելով փաստերը՝ քաղաքական մեկնաբան Հայկ Խալաթյանն արձանագրում է, որ Հայաստանը փորձ է անում փոխել իր աշխարհաքաղաքական ուղղվածությունը Ռուսաստանից դեպի Արևմուտք, ավելին՝ ըստ քաղաքագետի՝ Հայաստանի իշխանությունները պատրաստ են անգամ լուրջ զիջումների՝ Ռուսաստանի ազդեցությունը Հաայստանի վրա թուլացնելու համար.

«Ռուսաստանը շատ ազդեցության միջոցներ ունի Հայաստանի վրա, բայց հիմնական միջոցը անվտանգայինն է: Մենք ինչո՞ւ ենք սերտ համագործակցում Ռուսաստանի հետ, քանի որ Թուրքիան և Ադրբեջանը մեր թշնամիներն են, բայց Հայաստանի ներկայիս վարչակարգը վստահ է, որ եթե մենք «բարիշենք» Ադրբեջանի և Թուրքիայի հետ, ապա Ռուսաստանի հետ սերտ անվտանգային համագործակցության կարիք չի լինի, բայց այստեղ շատ կարևոր հարց կա՝ իսկ Թուրքիայում և Ադրբեջանում պատրա՞ստ են հայերին դրանից հետո չընկալել որպես թշնամի, ստիպված եմ հիասթափեցնել՝ ոչ»,-ասաց Խալաթյանը:

Ըստ նրա ՝ աշխարհաքաղական ուղղվածության այս փոփոխությունը Հայաստանի համար շատ ծանր հետևանքներ է ունենալու. «Մինիմում՝ Արցախի կորուստ, մաքսիմում՝ չի բացառվում այլ կորուստներ, օրինակ՝ Սյունիքի»,-ասաց նա:

Ինչ վերաբերում է ռուս խաղաղապահների հասցեին հնչող քննադատական հայտարարություններին՝ փորձագետը նկատում է՝ Նիկոլ Փաշինյանը և իր թիմակիցները փորձում են ամբողջ մեղքը բարդել Ռուսաստանի վրա, որովհետև հասարակությանը պետք են մեղավորներ ստեղծված իրավիճակում.

«Այդ մեղավորը լինելու է կա՛մ Փաշինյանը, որն իրական մեղավորն է, կա՛մ Ռուսաստանը, կա՛մ էլ որևէ այլ երկիր, քանի որ նախկինների թեման այլևս ակտուալ չէ հանրության համար: Սրա նպատակը Ռուսաստանի, ռուս խաղաղապահների և Ռուսաստանի հետ հարաբերությունները վարկաբեկելու նպատակով են արվում »,-ասաց զրուցակիցը՝ նկատելով, որ ռուս խաղաղապահների քննադատող հայտարարություններ են հնչում այն պարագայում, երբ Հայաստանի իշխանությունները ոչինչ չեն անում՝ ո՛չ երկրի անվտանգությունը ապահովելու, ո՛չ բանակի մարտունակությունը բարձրացնելու ուղղությամբ, ո՛չ Արցախի անվտանգությունն ապահովելու համար։

«Այնպես չէ, որ ռուս խաղաղապահների գործողությունները իդեալական են, լավն են, այո՛, արժանի են քննադատության, բայց եթե դու ինքդ քո պարտականությունները նույնիսկ Հայաստանի, էլ չեմ ասում Արցախի անվտանգության հետ կապված չես իրականացնում, արդարացնում ես ադրբեջանցիների գործողությունները, իսկ հետո էլ փորձում ես էմոցիոնալ արձագանքել Արցախում տեղի ունեցողին, հարց է առաջանում, որքանով ես դու անկեղծ »,-ասաց Խալաթյանը:

Արձանագրելով, որ ռուս խաղաղապահները որոշ դեպքերում թերանում են իրենց գործառույթներում՝ զրուցակիցն ընդգծեց, որ նրանց գործառույթները սահամանփակ են և պետք չէ ակնկալել, որ ռուս խաղաղապահները կրակելու են ադրբեջանցիների վրա, քանի որ նրանք այդ մանդատը չունեն. «Ադրբեջանցիներն էլ են հասկանում, որ Հայաստանը ոչինչ չի անելու, Արցախի ռազմական կարողությունները շատ փոքր են, որպեսզի կարողանան պատշաճ դիմադրություն ցույց տալ, իսկ խաղաղապահները սահմանափակ են, դրա համար էլ ադրբեջանցիները ագրեսիվ քայլերի են գնում՝ հասկանալով, որ որքան էլ Ռուսաստանը դժգոհ լինի, չի կարող ինքն իր համար երկրորդ ճակատ բացել, որովհետև այս իրավիճակում Ադրբեջանի հետ բախումը լինելու է Թուրքիայի հետ բախում, դրա համար էլ սանձարձակ են պահում »,-ասաց Հայկ Խալաթյանը:

Աղբյուր` Փաստինֆո