Փաստ ինֆո

Ադրբեջանի կողմից փոխանցված առաջարկներում մեզ համար անընդունելի ոչինչ չկա: Հայաստանի համար ընդունելի է փոխադարձաբար տարածքային ամբողջականության և սահմանների անխախտելիության ճանաչման սկզբունքը: Կառավարության այսօրվա նիստում ասաց Նիկոլ Փաշինայնը և կրկին հայտարարեց, որ Հայաստանը պատրաստ է խաղաղության պայմանագիր կնքել Ադրբեջանի հետ:

Նա հիշեցրեց, որ Մարտի 10-ին Հայաստանին է փոխանցվել Ադրբեջանի 5 կետանոց առաջարկներ, որից 4 օրն անց Հայաստանը գրավոր պատասխանել է այդ առաջարկներին:

Նիկոլ Փաշինյանը շեշտեց, որ Բաքվի պնդումը, թե, իբր, Հայաստանն առաջարկները թողել է անարձագանք, բացարձակապես չի համապատասխանում իրականությանը:

Վարչապետը կրկին հիշեցրեց Հայաստանի դիրքորոշումը Բաքվի առաջարկների վերաբերյալ.

«Մարտի 10-ին Ադրբեջանի կողմից փոխանցված առաջարկներում մեզ համար անընդունելի ոչինչ չկա: Այլ բան, որ այդ առաջարկները չեն հասցեագրում Հայաստան-Ադրբեջան համապարփակ խաղաղության օրակարգի բոլոր հարցերը: ԵԱՀԿ ՄԽ համանախագահությանը փոխանցած մեր պատասխանով լրացրել ենք օրակարգը և հետևաբար՝ այդ հենքի վրա պատրաստ ենք խաղաղության բանակցությունների մեկնարկին»,- ասաց նա և հավալեց.

«Այս պատասխանը նշանակում է, որ Հայաստանի համար ընդունելի է փոխադարձաբար տարածքային ամբողջականության և սահմանների անխախտելիության ճանաչման սկզբունքը»,- հայտարարեց Նիկոլ Փաշինյանը։

Աղբյուր` Փաստինֆո