Փաստ ինֆո

«Մարտի 1»-ի գործով ցուցարար Զաքար Հովհաննիսյանի սպանության մեջ մեղադրվող ոստիկանության զորքերի շտաբի նախկին պետ Գեղամ Պետրոսյանի գործը շարունակում է մնալ «օդում կախված»։ Նախաքննական մարմինը Պետրոսյանի մասնակցությամբ տևական ժամանակ է, ինչ որևէ գործողություն չի իրականացնում, բայց քրեական գործն էլ՝ չի կարճում։ Ասել է՝ թե Հատուկ քննչական ծառայությունը, որն այժմ վերափոխվել է Հակակոռուպցիոն կոմիտեի, առհասարակ մոռացել է գործի գոյության մասին. Դրել է չհրկիզվող պահարանում ու փակել։

Փաստաբան Վաղարշակ Գևորգյանը «Փաստինֆո»-ի հետ զրույցում հայտնեց, որ Գեղամ Պետրոսյանի նկատմամբ քրեական հետապնդումը դադարեցնելու վերաբերյալ որևէ որոշում չի կայացվել։ Ավելին՝ Պետրոսյանի մասնակցությամբ որևէ գործողություն այս ընթացքում չի եղել, փաստաբանը տեղեկություն չունի գործի ընթացքից։

Ի դեպ, ամիսներ առաջ գործի վարույթը կարճելու միջնորդություն էր ներկայացվել, որի լուծումը վարույթն իրականացնող մարմինը հետաձգել էր՝ պատճառաբանելով, որ անհրաժեշտ է պարզել որոշ հանգամանքներ պարզել, իսկ թե այս ընթացքում ինչ են պարզել՝ հայտնի չէ։

Նշենք, որ «Մարտի 1»-ի գործով երկու մեղադրյալի՝ Սաշա Աֆյանի և Հովհաննես Թամամյանի նկատմամբ վարույթն իրականացնող մարմինը քրեական հետապնդումը դադարեցնելու մասին որոշում է կայացրել՝ քրեական պատասխանատվության ենթարկելու վաղեմության ժամկետներն անցած լինելու հիմքով։ Գեղամ Պետրոսյանը մեղադրվում է ՀՀ ՔՕ 104-րդ հոդվածով՝ սպանության հատկանիշներով և նրա պարագայում ենթադրյալ հանցագործության համար պատասխանատվության ենթարկելու վաղեմության ժամկետները դեռևս չեն ավարտվել։ Բացի այդ՝ վաղեմության հիմքով գործի վարույթը կարճելու համար անհրաժեշտ է, որ մեղադրյալներն ընդունեն իրենց մեղքը։ Իսկ այս պարագայում անգամ ՀՔԾ-ն գիտի, որ նման ծանր մեղադրանքի համար չունի որեւէ հիմք, ապացույց։

Հիշեցնենք, որ շուտ 3 տարի առաջ ՀՔԾ-ն հայտարարեց, թե, իբր, բացահայտել են 2008 թվականի մարտի 1-ին արձանագրված 10 մահվան դեպքերից մեկը եւ հրազենի գործադրմամբ Զաքար Հովհաննիսյանին դիտավորությամբ կյանքից զրկելու համար մեղադրանք է առաջադրվել 2008 թվականի մարտի 1-ի դրությամբ ՀՀ ոստիկանության զորքերի հրամանատարի տեղակալի, շտաբի պետի պաշտոնը զբաղեցրած Գեղամ Պետրոսյանին։ Իսկ 2019 թվականի հունիսի 7-ին հայտնի դարձավ, որ դատարանը բավարարել է նրան կալանավորելու միջնորդությունը։

Զաքար Հովհաննիսյանը հրազենային վնասվածք է ստացել որովայնի շրջանում՝ Մաշտոցի պողոտայի մոտակայքում՝ 2008 թվականի մարտի 1-ի ուշ երեկոյան՝ Մակարով տեսակի ատրճանակի արձակված կրակոցի հետեւանքով։ Գ.Պետրոսյանին մեղադրանք առաջադրելու մասին հայտարարելով ՀՔԾ-ն այդպես էլ չէր մանրամասնել, թե արդյոք սպանությունը կատարվել է տաբելային զենքով եւ արդյոք հանցագործության գործիք հանդիսացած ատրճանակը հայտնաբերվել է։ Հետագայում արդեն պարզ դարձավ, որ զենքը չի հայտնաբերվել, հետեւաբար չկա որեւէ ապացույց, որ Գ.Պետրոսյանին ամրակցված զենքով է արձակվել կրակոցը, որով Զ.Հովհաննիսյանին պատճառվել է կյանքի համար անհամատեղելի վնասվածք։ ՀՔԾ-ի կեղծ փուչիկը պայթեց, երբ ընդամենը երկու ամիս անց՝ 2019 թվականի օգոստոսի 4-ին, Գ.Պետրոսյանն ազատ արձակվեց Երևան-Կենտրոն քրեակատարողական հիմնարկից, քանի որ լրացել էր կալանքի երկամսյա ժամկետը, իսկ նախաքննական մարմինը՝ ՀՔԾ-ն, կալանավորման ժամկետը երկարացնելու մասին միջնորդություն չէր ներկայացրել։

Հեղինակ՝ Իզաբել Սահակյան

Աղբյուր` Փաստինֆո