Փաստ ինֆո

Առուշ Առուշանյանն այն տեսակը չէ, որ պետությունից փոխհատուցում պահանջի։ Այս մասին «Փաստինֆո»-ի հետ զրույցում ասաց Գորիսի համայնքապետ Առուշ Առուշանյանի փաստաբան Էրիկ Ալեքսանյանը։ 

Ինչպես արդեն տեղեկացրել ենք՝ Սյունիքի մարզի ընդհանուր իրավասության դատարանը՝ դատավոր Գնել Գասպարյանի նախագահությամբ, հրապարակել է Առուշ Առուշանյանի և մյուսների գործով վճիռը, որով Առուշանյանն արդարացվել է իրեն մեղսագրվող ընտրական հանցավոր ենթադրյալ արարքների դրվագով, իսկ մյուս դրվագով՝ մեղավոր ճանաչվել և դատապարտվել ազատազրկման՝ 1 տարի 6 ամիս ժամկետով, որին հաշվակցելով Առուշանյանի՝ ութ ամիս արգելանքի տակ գտնվելու ժամկետը, դատարանը որպես վերջնական պատիժ սահմանել է ազատազրկումը՝ 6 ամիս ժամկետով, որը պայմանականորեն չի կիրառվել. Դատարանն Առուշանյանի նկատմամբ փորձաշրջան է սահմանել 1.5 տարի ժամկետով, միևնույն ժամանակ, Առուշանյանի նկատմամբ որպես պատիժ է կիրառվել տուգանքը և 5 տարի ժամկետով ՏԻՄ ղեկավար պաշտոն զբաղեցնելու սահմանափակումը։ Արդարացվել են նաև Քարահունջ բնակավայրի ղեկավար Լուսինե Ավետյանը և ամբաստանյալներից ևս երկուսը՝ Սամվել Դինունցը և Հրայր Բաղդասարյանը, իսկ Էրիկ Աղաջանյանը և Հարութ Լալազարյանը՝ մեղավոր են ճանաչվել։

Ընտրական հանցավոր ենթադրյալ արարքների դրվագով արդարացման համար Առուշանյանը փոխհատուցման հարց չի բարձրացնի։ Փաստաբան Էրիկ Ալեքսանյանը «Փաստինֆո»-ի հետ զրույցում ասաց, որ Առուշ Առուշանյանն այն տեսակը չէ, որ պետությունից փոխհատուցում պահանջի, նա կարող է միայն պետության համար անել և անում է։

Ինչ վերաբերում է վճռին, ապա փաստաբանը հայտնեց, որ պատրաստվում են բողոքարկել դատական ակտը՝ պահանջելով Առուշանյանին արդարացնել նաև մյուս դրվագներով։ Անդրադառնալով դատական ակտի՝ ՏԻՄ ղեկավար պաշտոն զբաղեցնելու իրավունքից զրկելուն՝ փաստաբանը նշեց, որ այդ դրույթը չի գործելու՝ մինչև դատական ակտի օրինական ուժի մեջ մտնելը։ Այլ խոսքով՝ Առուշ Առուշանյանը կշարունակի մնալ Գորիսի համայնքապետ՝ մինչև դատավճռի օրինական ուժի մեջ մտնելը, սակայն ուշագրավ է այն հանգամանքը, որ ՀՀ քրեական օրենսգրքի համաձայն՝ 308-րդ հոդվածով որպես պատիժ նախատեսվում է նաև որոշակի պաշտոններ զբաղեցնելու իրավունքից զրկումը, սակայն ընտրությունների արդյունքում ՏԻՄ ղեկավար պաշտոն զբաղեցնելու արգելքը կոնկրետ մատնանշված չէ, ինչը մասնագիտական հանրության գնահատմամբ՝ կարող է սահմանադրականության հարց առաջացնել։ Փաստաբան Էրիկ Ալեքսանյանը տեղեկացրեց, որ այդ հարցը ևս կբարձրացվի։

Հեղինակ՝ Իզաբել Սահակյան

Աղբյուր` Փաստինֆո