Փաստ ինֆո

Ադրբեջանական կողմը մեծ հավանականության կգնա ռազմական լայն էսկալացիայի Արցախի և Հայաստանի սահմաններին, չի բացառվում՝ հենց Նախիջևանի ուղղությամբ:

Միակ զսպող գործոնը ռուսական և իրանական ուժերն են, այս պահի դրությամբ այդ երկու գործոնն է, որ դեռևս հետ է պահում Ադրբեջանին, Ռուսաստանը և Իրանն այս պահին իրենց վրա են վերցրել Հայոց պետականության շահերի պաշտպանումը, քանի որ այստեղ կա կապիտուլյանտական ռեժիմ, որը անգլոսաքսոնական, հայկականից էապես տարբերվող օրակարգ է սպասարկում: «Փաստինֆո»-ի հետ զրույցում հայտարարել է ռազմական փորձագետ Դավիթ Ջամալյանը:

Ինչ վերաբերում է Արցախում հակառակորդի շարունակական սադրանքներին ՝ փորձագետն արձանագրեց՝ Ադրբեջանի նպատակն է անգլոսաքսոնական ուղղորդմամբ երկրորդ ճակատ բացել Ռուսաստանի դեմ՝ Ուկրաինայում հատուկ ռազմական օպերացիայի բեկումնային փուլում, միաժամանակ օգտվելով առիթից Ադրբեջանն անում է հնարավոր ամեն բան՝ Արցախը հայաթափելու և հնարավորինս մեծ տարածք պոկելու համար.

«Ըստ էության՝ ադրբեջանական կողմի այս քայլերը համահունչ են Հայաստանի կապիտուլյանտական ռեժիմի նպատակներին, որովհետև Ադրբեջանի ագրեսիվ քայլերի վրա հիմնվելով է, որ նրանք պետք է գնան ազգադավ զիջումների և հիմնավորեն, թե Ադրբեջանի հնարավոր նոր ագրեսիան կանխելու միակ ելքը բանակցել, զիջել, ամեն ինչ հանձնելն է, այսինքն՝ ադրբեջանական ագրեսիան որպես ապացույց մատուցեն հասարակությանը, ահաբեկեն նոր պատերազմով և այս ֆոնին գնան նոր զիջումների՝ վստահ լինելով, որ իրենց որևէ մեկը չի ընդդիման »,-ասաց փորձագետը

Զրուցակիցը մեզ հետ զրույցում բարձ գնահատեց ռուսական կողմի քայլերը՝ Արցախում ստեղծված իրավիճակը լուծելու ուղղությամբ:

Ըստ Ջամալյանի՝ ռուսական կողմն այս օրերին լուրջ քայլեր է ձեռնարկել, որի արդյունքում հնարավոր է եղել կանխել Ադրբեջանի առաջխաղացումը Փառուխում, ավելին, փորձագետը պնդեց՝ այն, որ Քարագլուխը ամբողջովին չի անցել Ադրբեջանի վերահսկողության տակ, այստեղ ևս առկա է ռուսական «անտեսանելի աջակցությունը».

«Ամենայն հարգանքով ՀՀ զինված ուժերի և Արցախի ՊԲ-ի հանդեպ՝ նրանց մարտունակությունն անգամ այս պահին բավարար է լոկալ մարտական գործողություններում հաջողության հասնելու համար, բարոյակամային որակների մասին խոսք չկա, մեր բանակը կոտրված չէ, ունակ է իր խոսքն ասելու, մենք Արցախում ունենք մարտունակ ստորաբաժանումներ, Արցախն իր ողնաշարը շտկում է, բայց պետք է ընդունենք, որ մեր բանակը վիրավոր է և ապաքինված չէ, այնպես որ ռուսական կողմի աջակցությունն անհրաժեշտ է: Ռուսաստանը նախ շատ հատու պատասխան տվեց դիվանագիտական հարթությունում, փոխհամաձայնեցված աշխատեցին Արցախի ռազմաքաղաքական ղեկավարության, Արցախի նախագահի և Անվտանգության խորհրդի դիմումը Ռուսաստանի նախագահին տեղին էր, փաստորեն, Արայիկ Հարությունյանը և Արցախի ազգային անվտանգության խորհուրդն արեցին այն, ինչ չարեց Նիկոլ Փաշինյանը 44-օրյա պատերազմի ժամանակ: Ռուսական կողմն անմիջապես քայլի դիմեց, մենք համացանցում տարածված տեսանյութերից անգամ տեսանք, որ ռուսական լրացուցիչ ուժեր մտնում են Արցախ, ես վստահ եմ՝ Քարագլխի մյուս հատվածից ադրբեջանական ուժերի դուրս բերումն ընդամենը ժամանակի հարց է » ,-ասաց Ջամալյանը:

Զրուցակցի արձանագրմամբ՝ Ռուսաստանին այս պահին ձեռնտու չէ Արցախում էսկալացիան, բայց Ռուսաստանը շատ լավ հասկանում է, որ

Ադրբեջանը, անգլոսաքսոնական ուղղորդմամբ, դիմելու է ինչ-որ քայլերի.

«Իրենք սկզբում դիվանագիտական ուղիներով կփորձեն լուծել հարցը, բայց եթե տեսնեն, որ բանը բանից անցնում է, առավել քան վստահ եմ, որ Արցախի ՊԲ-ի հետ համատեղ հատուկ պատասխան են տալու, և մենք այս իրավիճակից շահող ենք դուրս գալու, այդ կտրուկ գործողություններն անխուսափելի կլինեն, եթե դիվանագիտական ջանքերը արդյունք չտան »,-ասաց փորձագետը:

Աղբյուր` Փաստինֆո