Փաստ ինֆո

Քարագլուխ կոչվող բարձունքից ադրբեջանցի զինծառայողները չեն հեռացել. շարունակում են մնալ դիրքավորված մի քանի հատվածում։ Բաքվից չեն ստացել։ 

Հիշեցնենք, որ Ռուսաստանի պաշտպանության նախարարությունը մարտի 27-ին հայտնել էր, թե բանակցությունների արդյունքում ադրբեջանական կողմն իր զորքերը դուրս է բերել Փառուխ բնակավայրից։

Ուշադրություն դարձնենք այն փաստի վրա, որ տեղեկագրում նշված է «Փառուխի բնակավայրից», իսկ Քարագլուխ տեղանքը մտնում է ոչ թե Փառուխ բնակավայրի վարչական տարածքի մեջ, այլ՝ Խարամորթի։ Ամեն դեպքում, փաստ է մնում այն, որ ադրբեջանական զորքերը ներխուժել են և մինչև այս պահը գտնվում են խաղաղապահ զորախմբի պատասխանատվության գոտում՝ գրավելով Փառուխը ու առաջանալով դեպի Քարագլուխ։

Ինչպես «Փաստինֆո»-ին վստահեցրեց Ասկերանի շրջվարչակազմի ղեկավարի տեղակալ Անահիտ Պետրոսյանը, ներկա դրությամբ գագաթն անառիկ է․ Քարագլխի մի լանջին մերոնք են, մյուսին՝ ադրբեջանցիները։ Իսկ Փառուխը, Անահիտ Պետրոսյանի խոսքով, ռուս խաղաղապահների հսկողության տակ է։

Համացանցում տարածվում են նոր տեսանյութեր՝ ադրբեջանցիների հետ իրականացվող բանակցությունների մասին, դժվար է ասել, թե դրանք երբ են արվել, սակայն փաստն այն է, որ թեեւ ՌԴ ՊՆ-ն հայտարարել է, որ ադրբեջանական զորքերը խախտել են հրադադարը, տեղաշարժել զորքը՝ Լեռնային Ղարաբաղի Ասկերանի շրջանում, այդուհանդերձ, որեւէ տեսանելի քայլ չի արվել արբեջանցիներին իրենց ելման դիրքեր վերադարձնելու ուղղությամբ։

Ավելին՝ տեղեկություններ են ստացվում , որ Փառուխից հեռանալով ադրբեջանցիները տեղաշարժվել են այլ բարձունքի ուղղությամբ ու արդյունքում կասկածի տակ է դրվում նաեւ տարածաշրջանում խաղաղապահների ներկայության արդյունավետությունը։
Աներկբա է, որ Արցախի անվտանգության պատասխանատուները, նախեւառաջ, Արցախի ու Հայաստանի իշխանություններն են, ապա միայն Ռուսաստանը, որն իր խաղաղապահ առաքելությունն ուղարկելով Արցախ՝ստանձնել է 2020 թվականի նոյեմբերի 9-ի եռակողմ համաձայնագրի կատարման պատասխանատվության իր բաժինը։

Քանի դեռ ադրբեջանցիները չեն վերադարձել իրենց ելման դիրքերը՝ մարտի 23-ի դրությամբ՝ կարող ենք արձանագրել, որ ոչ Հայաստանի իշխանություններն են կատարումը Արցախի անվտանգության երաշխավորի իր պարտականությունը, ոչ Ռուսաստանը՝ հեղինակազրկելով իր խաղաղապահների գոյությունը, ինչն, անշուշտ, ձեռնտու է նախեւառաջ արհեստածին ադրբեջանին։

Որքան էլ դառը լինի ճշմարտությունը՝ պետք է խոստովանենք, որ այս պահին Հարավային Կովկասում Ռուսաստանն իր դիրքերը զիջում է՝ հանդուրժելով Ադրբեջանի հանդուգն ու ցինիկ վարքագիծը։

Աղբյուր` Փաստինֆո