Փաստ ինֆո

Ուրցաձորի նախկին համայնքապետ Ռաֆիկ Անդրեասյանի համար անակնկալ էր Վեդիում երեկ կայացած ընտրությունների արդյունքները, որտեղ երկրորդ փորձից հաղթել է ՔՊ-ն, որի ցուցակը գլխավորում էր նախկին մարզպետ Գարիկ Սարգսյանը։

«Բան չեմ կարող ասել, երևի այս ապագան է ընտրել ժողովուրդը, թող գնան, վայելեն»,-«Փաստինֆո»-ի հետ զրույցում վրդովված ասաց Անդրեասյանը:

Ավելի վաղ հայտնել էինք, որ Վեդի համայնքում երեկ ՏԻՄ ընտրություններ են տեղի ունեցել, որին մասնակցում էին երկու ուժ՝ իշխող «Քաղաքացիական պայմանագիր» և «Իմ հզոր համայնք» կուսակցությունները։ ՔՊ-ի ցուցակը գլխավորում էր Վեդի համայնքապետի պաշտոնակատար Գարիկ Սարգսյանը, իսկ «Իմ հզոր համայնք» կուսակցության ցուցակը՝ Թարթիկյանը: ԿԸՀ-ի նախնական տվյալներով՝«Քաղաքացիական պայմանագիր» կուսակցությունն ստացել է 13 139 ձայն, «Իմ հզոր համայնք» կուսակցությունը՝ 9 694 ձայն։

Ընդդիմադիր թեկնածուն նշեց, որ թեև խախտումներ իրենք չեն արձանագրել, սակայն ընտրություններն անցել է լարված մթնոլորտում՝ աննախադեպ թվով ոստիկանների ներկայությամբ.

«Բոլոր վարչական լծակներն օգտագործել են, բացի սա, այստեղ ներքին բան է կատարվում՝ մեզ համար անհայտ, այսպիսի ընտրություն, համենայնդեպս Ուրցաձորում, չէր եղել, երկու ոստիկանից ավել չի եղել, բայց այս անգա շատ-շատ էին»,-ասաց նա:
Ռաֆիկ Անդրեասյանը նաև հայտնեց, որ չեն վիճարկելու ընտրության արդյունքները.

«Իմաստ չունի, ընտել են, թող գնան, վայելեն, ի՞նչ ասեմ, ապագա են ընտրել, թող իրենց համար վայելեն»,-ասաց Ռաֆիկ Անդրեասյանը:
Հիշեցնենք, որ սա Վեդիում արդեն երկրորդ ընտրությունն է: 2021թ. դեկտեմբերի 5-ին Վեդի խոշորացված համայնքում տեղի ունեցած ավագանու ընտրությունների ժամանակ Գարիկ Սարգսյանը դարձյալ գլխավորում էր «Քաղաքացիական պայմանագիր» կուսակցության ցուցակը։ Այդ ժամանակ ամենաշատ ձայները ստացել էր «Իմ հզոր համայնք» կուսակցությունը՝ 43,06%, «Քաղաքացիական պայմանագիրը»՝ 38,21%, իսկ «Հանրապետություն» կուսակցությունը՝ 16,39%: Քանի որ որևէ քաղաքական ուժ մեծամասնություն չուներ, իսկ կոալիցիա կազմել չստացվեց, եւ ՔՊ-ն ու «Հանրապետություն կուսակցությունները հայտնեցին մանդատները վայր դնելու մասին։

Աղբյուր` Փաստինֆո