Փաստ ինֆո

Առուշ Առուշանյանի՝ ՏԻՄ ղեկավար պաշտոն զբաղեցնելու արգելքի մասով դրույթը չի գործելու՝ մինչև դատավճռի օրինական ուժի մեջ մտնելը։ Ֆեյսբուքյան ուղիղ եթերում ԱԺ «Հայաստան» խմբակցության պատգամավոր Արամ Վարդևանյանը, անդրադառնալով Գորիսի համայնքապետ Առուշ Առուշանյանի գործով կայացված դատական ակտին, նկատեց՝ պարզից էլ պարզ է, որ դատական համակարգի նկատմամբ ճնշումները չափազանց բարձր մակարդակի վրա են, ակնկալել, որ դատավորները լիարժեք անկախ կլինեն, կկարողանան ամբողջական արդարադատություն իրականացնել, առնվազն անկեղծ չի լինի, սակայն տեսնում ենք, որ կան արհեստավարժ դատավորներ, ինչպես՝ Գնել Գասպարյանը։ Վարդևանյանի համար ակնհայտ էր, որ ճնշումներ են տեղի ունեցել, կարևոր չէ՝ ուղղակի կամ անուղղակի։

«Պատկերացրեք դատական համակարգի վիճակը, երբ կալանավորված է դատավոր Բորիս Բախշիյանը՝ իր կողմից կայացված որոշման համար»,- նշեց Վարդևանյանը՝ հավելելով, որ փաստ է, որ Առուշանյանն ազատության մեջ է գտնվում, սակայն դեռևս պնդում կատարել չի կարող, որ դատական ակտում ամբողջը դրական էր։

Ինչ վերաբերում է դատական ակտի՝ ՏԻՄ ղեկավար պաշտոն զբաղեցնելու իրավունքից զրկելուն, Վարդևանյանն արձանագրեց, որ այդ դրույթը չի գործելու՝ մինչև դատական ակտի օրինական ուժի մեջ մտնելը, հետևաբար վաղ է դեռ այդ մասին կատեգորիաներից խոսելը, սակայն Վարդևանյանն ուշադրություն հրավիրեց այն հանգամանքին, որ նշված դրույթը՝ որոշ պաշտոնների, հատկապես՝ ընտրվող մասով կարող է կիրառելիության սահմանադրականության խնդիր ունենալ։ Մասնավորապես, Քրեական օրենսգիրքը կարգավորում է իրավահարաբերություններ, այդ թվում, որպես հիմնական կամ լրացուցիչ պատիժ նախատեսում է հենց այդ պաշտոններ զբաղեցնելու իրավունքներից զրկելը, սակայն ՔՕ-ն չի կարող անտեսել այն իրավիճակները, երբ ժողովուրդն ինքն է մանդատ տալիս կոնկրետ պաշտոն զբաղեցնողին, կան պաշտոններ, որոնք ընտևովի են, կան պաշտոններ, որոնց համար անձը նշանակվում է և համայնքապետի պաշտոնը ժողովրդի մանդատից բխող պաշտոնի զբաղեցում է։

«Այսինքն՝ արդյոք ՔՕ-ն այդ իրավիճակներում պետք է սահմանափակի ժողովրդի կամքի արտահայտումը»,- նշեց Վարդևանյանը՝ հարց բարձրացնելով նաև, թե արդյոք այն կարող է տարածվել նաև մինչ քրեական գործով դատական ակտը ձևավորված իրավահարաբերության վրա, որովհետև Առուշ Առուշանյանն ընտրվել է այն պայմաններում, երբ նման դատական ակտ չի եղել։ Վարդևանյանը գտնում է. որ այս հարցերով պետք է դիմել ՍԴ։

Աղբյուր` Փաստինֆո