Փաստ ինֆո

«Մեզ համար անհասկանալի է մնում Հայ Առաքելական եկեղեցու հայտնած երկրորդ դիրքորոշումը, որովհետև, երբ մենք առաջին անգամ հայտարարեցինք, որ պատրաստվում ենք Հայաստանում տեղադրել Հիսուս Քրիստոսի արձանը, Հայ Առաքելական եկեղեցին դրական արձագանքեց դրան։ Հայր Ասողիկի ներկայությամբ, նույնիսկ, օրհնվեց մտահաղացումը, և հանկարծ, որոշ ժամանակ անց, եկեղեցին դեմ է հանդես գալիս այս նախաձեռնությանը՝ նշելով, որ արձանապաշտությունը Հայ Առաքելական եկեղեցու դավանապաշտական ավանդույթների մեջ չի մտնում», - «Փաստինֆո»-ի հետ զրույցում ասել է մշակույթի գործիչ, բեմադրիչ Ռուբեն Հովհաննիսյանը։

Հիշեցնենք, որ դեռևս տարեսկզբին «Գագիկ Ծառուկյան» բարեգործական հիմնադրամը ազդարարեց հայ ժողովրդին վերածննդի ու լույսի ճանապարհ ցուցանող բացառիկ ծրագրի մեկնարկի, այն է՝ Հայաստանում
կանգնեցնել Հիսուս Քրիստոսի արձանը։ Մրցույթի առաջին փուլն արդեն ավարտվել է, որի արդյունքներն ամփոփվել են եւ 21 հեղինակի հնարավորություն է տրվել լրամշակել՝ ներկայացված նախագծերը։

Օրեր առաջ Հայ առաքելական եկեղեցին հայտարարեց, որ ընդունելի չի համարում Տիրոջ՝ Հիսուս Քրիստոսի արձանի տեղադրումը՝ նկատի առնելով, որ այն հարիր չէ Հայ Եկեղեցու դարավոր պատկերագրական և պաշտամունքային ավանդույթին։ Հոգևոր խորհուրդը հավելել էր՝ եկեղեցու համար ընդունելի կարող է համարվել Փրկիչ Տիրոջ հարթաքանդակի կառուցումը՝ «Ամենափրկիչ» խաչքարերի սկզբունքով:

«Փաստինֆո»-ի հետ զրույցում, սակայն, Ռուբեն Հովհաննիսյանն ընդգծում է՝ այն տարբերակը, որն առաջարկվել է Հայ Առաքելական եկեղեցու կողմից, որևէ կերպ չի տեղավորվում նախագծի՝ իրենց պատկերացումների մեջ. «Տեսանելիության մակարդակում այդ առաջարկն, ուղղակի, հնարավոր չէ իրականացնել։ Պատկերացնո՞ւմ եք 33 մետր բարձրության խաչքարն ինչպես կարող է նայվել։ Եթե սրան էլ գումարենք պատվանդանի բարձրությունը, ապա դա, ուղղակի, անհնար կլինի պատկերացնել։ Բացի այդ, այդպիսի ծավալների մեծության խաչքարի վրա Քրիստոսի հարթաքանդակը, պարզապես, տեսանելի չի լինի։ Հույս ունեմ, մենք կգտնենք հուշարձանի պատրաստման՝ բոլոր համար ընդունելի լուծման տարբերակը»։

Ռուբեն Հովհաննիսյանը հավելում է ՝ այժմ արձանների մակետներ ներկայացրած քանդակագործներին մեկ ամիս ժամանակ է տրամադրվել՝ քանդակների վրա լրամշակումներ անելու համար.«Սա սովորական մահկանացուի արձան չէ, Աստծու որդու արձանն է, հետևաբար, այն պետք է թեթև և եթերային լինի՝ աստվածային էությանը համապատասխան։ Մյուս կողմից՝ այս ժամանակը պետք կգա բոլոր այն կառույցների և մարդկանց, ովքեր ինչ – ինչ պատճառներով դեմ են արտահայտվել գաղափարի իրականացմանը։ Գիտե՞ք, հատկապես պատերազմից հետո, մեր առջև դված առաջնայնություններն այլ ընթացք են ստացել, դրանց, այլևս, այլ տեսակի պատասխաններ են անհրաժեշտ։ Նայելով մեր հասարակության ներսում տիրող պառակտումերին և անհամաձայնություններին, կարծում ենք մեզ, հատկապես հիմա, նման նախաձեռնությունը շատ անհրաժեշտ կլինի։ Ուստի, մենք հույս ունենք, որ եկեղեցին կվերանայի իր դիրքորոշումը և մենք ընդհանուր եզրեր կգտնենք, քանի որ բոլորս՝ սկսած գաղափարի հեղինակ Գագիկ Ծառուկյանից, հանձնախմբի բոլոր անդամներից և հասարակության այն հատվածից, ովքեր լինելով Հայ Առաքելական եկեղեցու խորը հավատավոՐ հոտի անդամ, ուզում ենք մեր իրականության մեջ տեսնել մեզ համախմբող մի նոր երևույթ, որը, ինչո՞ւ չէ, կարող է լինել նաև այս արձանը»։

Խոսելով արձանի տեղադրման վայրի ընտրության մասին, Ռուբեն Հովհաննիսյանը նկատում է՝ եթե Մշակույթի նախարարությունն ասում է, որ Պատմամշակութային հուշարձանների տարածքում արձանի տեղադրումը հնարավոր չէ, իսկ եկեղեցին թույլ չի տալիս այն տեղադրել եկեղեցապատկան տարածքներում, ապա մեր երկրում հոգևոր բացառիկ նշանակությամբ օժտված և արժանի տեղանքներ շատ կան, որտեղ էլ կարելի կլինի տեղադրել Տիրոջ՝ Հիսուս Քրիստոսի արձանը։

Ամփոփելով զրույցը՝ Ռուբեն Հովհաննիսյանը տեղեկացնում է՝ շուտով հանձնախմբի անդամների կողմից պաշտոնական հայտարարություն կտարածվի, որտեղ կհնչեն արձանի տեղադրման հետ կապված բոլոր անպատասխան և խնդրահարույց հարցերի պատասխանները, այդ թվում՝ անդրադարձ կկատարվի նաև եկեղեցու հայտնած վերջին դիրքորոշման առնչությամբ։

Աղբյուր` Փաստինֆո