Փաստ ինֆո

Քարագլխի նկատմամբ վերահսկողություն իրականացնում են հայկական համապատասպան ուժային ստորաբաժանումները և ռուս խաղաղապահները։ Այս մասին լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը։ 

«Օպերատիվ իրավիճակը բավականին արագ է փոփոխվում, բայց այս պահին այն տեղեկատվությունը, որին ես եմ տիրապետում, Քարագլխի նկատմամբ վերահսկողություն իրականացնում են հայկական համապատասպան ուժային ստորաբաժանումները և ռուս խաղաղապահները։ Ադրբեջանը երեկ ներխուժել է Ասկերանի շրջանի Փառուխ գյուղ, շարժվել է առաջ՝ դեպի Քարագլխի ուղղությամբ, բայց գլխավոր նպատակը՝ հասնել Քարագլխի այն հատվածին, որը նրան լիակատար վերահսկողության հնարավորություն կտար՝ չի հաջողվել»,- նշել է Աբրահամյանը՝ հավելելով, որ ռուսական խաղաղապահ ուժերը մի քանի հատվածից կանխել են ներխուժումը, հայկական ստորաբաժանումները բավականին արագ փորձել են գալ և հնարավոր ներթափանցման ներխուղժման ուղղությունները փակել, բայց դրանից իրավիճակը չի լիցքաթափվել, չի հանգուցալուծվել։

«Փաստացի Փառուխի և Փառուխի հարակից հատվածների նկատմամբ Ադրբեջանը շարունակում է վերահսկողություն սահմանել։ Որոշակի տեղեկություններ ունեմ, Ադրբեջանը նաև փորձում է այդ հատվածներում, որտեղ ներխուժումն ապահովել է, ամրաշինարարական աշխատանքներ իրականացնել, ինչը դժվարացնում է բանակցությունների ընթացքը»,- նշեց Աբրահամյանը՝ հավելելով, որ Ադրբեջանի գործողություններն այս պահին փաստում են ավելի շատ ամրանալու, տեղում ուժեղանալու, համալրվելու, քան՝ ելման դիրքեր վերադառնալու։

Աբրահամյանը նշեց, որ Քարագլուխ բարձունքը հնարավորություն է տալիս Ասկերանի ուղղությամբ բավականին կարևոր հատվածներում ճանապարհների, հարակից հատվածների վերահսկողություն հաստատելու, մեծ տեսադաշտ ունի դեպի Ակնա, մեծ ռազմավարական խնդիրներ է լուծում։

Աղբյուր` Փաստինֆո