Փաստ ինֆո

Հայաստանում ռուս խաղաղապահների դեմ հակաքարոզ է իրականացվում: Սա առաջին դեպքը չէ, երբ օրվա իշխանությունները Ռուսաստանի դեմ քայլեր են իրականացնում՝ նախապատրաստելով քարոզչական հող: «Փաստինֆո»-ի հետ զրույցում նման դիտարկում արեց ռազմական փորձագետ Հայկ Նահապետյանը:

Փորձագետը մեզ հետ զրույցում նկատեց, որ հայտնվել են տելեգրամյան ալիքներ, որոնք իբրև արցախյան են, ժողովրդին կոչ են անում դուրս գալ և հրաժարվել ռուս խաղաղապահների ծառայությունից, նրանց փոխարինել ՄԱԿ-ի խաղաղապահներով.

«Սա հիմարություն է, ՄԱԿ-ին դիմելը խանութ գնալ և ապրանք գնել չի, ինչ-որ մեկի ասելով ՄԱԿ-ը խաղաղապահ չի ուղարկում, դա քննարկվում է ՄԱԿ-ի Անվտանգության խորհրդում, իրավիճակ է գնահատվում, սա մի ամբողջ գործընթաց է: ՄԱԿ անվտանգության խորհուրդը պետք է համաձայնություն տա կոնսենսուսով , այսինքն՝ 5 մշտական անդամ պետք է «այո» ասեն, այդ դեպքում Ռուսաստանը և Չինաստանը կարող է «ոչ» ասեն, ի՞նչ է ստացվում, որ ՄԱԿ-ի խաղաղապահ առաքելության զորախումբ չի գալիս, ռուսներն էլ դուրս գան, հարց՝ Փաշինյան Նիկոլը և իր նման մտքի գիգանտնե՞րն են ընտանիքներով գնալու և 100 հազարից ավելի արցախահայությանը պաշտպանելո՞ւ»,-ասաց Հայկ Նահապետյանը:

Բացի սա՝ փորձագետը նկատեց, որ ՄԱԿ-ին դիմելով Հայաստանը կխախտի Ռուսաստանի հետ փաստաթղթային պարտավորությունները, ինչից օգտվելու է Ադրբեջանը և մեծացնելու է իր ճնշումները Հայաստանի և Արցախի վրա.

«Հայաստանի օրվա իշխանությունները «և-և» են խաղում, սա լուրջ հետևանքներ է ունենալու, այնպես, ինչպես 2018թ-ին, երբ Նիկոլ Փաշինյանը բերվեց իշխանության։ Նրա կեցվածքը և հայտարարությունները ստեղծեցին իրավիճակ, երբ Ադրբեջանը գնահատեց, որ Հայաստանի և իր ռազմավարական դաշնակից Ռուսաստանն ունեն որոշակի խնդիրներ, այսինքն՝ Ադրբեջանն օգտվեց այդ առիթից, հիմա, երբ Հայաստանի իշխանությունները դիմում են այլ կառույցների՝ ներգրավելու մի գործընթացի մեջ, որը Ռուսաստանը չի ցանկանում, ի՞նչ եք կարծում, Ադրբեջանն այս մասին իմանալով արդյո՞ք Հայաստանի և Արցախի վրա ճնշումները չի մեծացնի, վստահաբար մեծացնելու է»,-հայտարարեց Հայկ Նահապետյանը և ընդգծեց՝ Հայաստանի իշխանությունների վարած քաղաքականությունը հանգեցնեու է կորուստների:

Ըստ փորձագետի՝ ռուս խաղաղապահների դեմ ուղղված հակաքարոզի իմաստը Արցախը հայաթափելն է, քանի որ ռուս խաղաղապահների դուրս գալուն զուգահեռ՝ Արցախի ողջ բնակչությունն է դուրս գալու.

«Եթե հիշում եք պատերազմի օրերին Սամվել Բաբայանն ասում էր՝ դիմենք ռուսներին, միջամտեն, տասը օր հրադադար լինի, որ արցախահայությունը դուրս գա, իսկ , ըստ Ադրբեջանի և Թուրքիայի, Արցախի հարցը լուծված կլինի, երբ արցախցիները դուրս գան Արցախից, իսկ եթե ռուս խաղաղապահը դուրս է գալիս, իր հետ զուգահեռ Արցախի ողջ բնակչությունն է դուրս գալու, մարդիկ չեն տեսնելու ուժային կենտրոն, որը կապահովի իրենց անվտանգությունը»,-ասաց Հայկ Նահապետյանը:

Աղբյուր` Փաստինֆո