Փաստ ինֆո

Արցախում տեղի ունեցողը դավաճանական իշխանության հետևանք է, կազմակերպված դավադրություն: Արցախն արդեն թշնամու ստամոքսում է, կոկորդը պետք է պատռել: «Փաստինֆո»-ի հետ զրույցում հայտարարեց ազատամարտիկ Պավլիկ Մանուկյանը՝ գնահատելով Արցախում ստեղծված իրավիճակը:
Նրա արձանագրմամբ՝ թշնամու նպատակը պարզ է՝ հայաթափել Արցախը և տիրանալ ողջ Արցախին.

«Արցախով չի վերջանալու, Մոնթեն դեռ 90-ականներին է ասել՝ կորցրեցինք Արցախը, շրջելու ենք մեր պատմության վերջին էջը, մեր լինել-չլինելը Արցախով է պայմանավորված,

Այս դրությամբ էլ, եթե մնանք չենք կարող Արցախին տեր կանգնել, Արցախն արդեն թշնամու ստամոքսում է, կոկորդը պետք է պատռել, իսկ մեր իշխանությունները կազմակերպված բանակ են քանդում, ամեն ինչ կազմաքանդելով գնում են»,-հայտարարեց ազատամարտիկը:

Իսկ թե ի՞նչ է անում մեր իշխանությունը վերահաս վտանգը կանխելու համար, զրուցակիցը արձագանքեց.

«Մենք խաղաղ դարաշրջան ենք բացելու, այսինքն՝ խաղաղ մեռնել, առանց պայքարի մեռնել, Փաշինյանի համար սա ոչինչ է , նա հենց դրա համար է եկել ոչնչացնելու հայկական բանակը և պետականությունը»,-ասաց Մանուկյանը:

Ինչպես արդեն տեղեկացրել ենք՝ Ադրբեջանի զինված ուժերը, խախտելով եռակողմ հայտարարության պահանջները, մարտի 24-ին՝ ժամը 16:00-ի դրությամբ, Ասկերանի շրջանի Փառուխ գյուղի ուղղությամբ խախտել են շփման գիծը, գրավել գյուղն ու առաջացել Քարագլուխ ռազմավարական բարձունքի ուղղությամբ։ Նրանց առաջխաղացումը կասեցրել են ռուս խաղաղապահները, ու բանակցություններ են ընթանում նրանց ելման կետ վերադառնալու ուղղությամբ։

Թե ռազմավարական ի՞նչ նշանակություն ունի Քարագլուխը մեզ համար, ազատամարտիկը պատասխանեց. «Քարագլուխն այնպիսի մի հատված է, որով թշնամին ամբողջությամբ Արցախն առնում է աքցանի մեջ, Շուշին նրանց ձեռքն է, Քարագլուխը նրանց ձեռքն է , այսինքն՝ բոլոր բարձունքները նրանցն են, Ասկերանի նախ առաջին երեք գյուղերը կդատարկվեն, հետո հերթը կհասնի մյուսներին »,-ասաց Մանուկյանը:

Հարցին՝ ի՞նչ լուծում է տեսնում այս իրավիճակին, ի՞նչ պետք է անի ժողովուրդը, ազատամարտիկը նշեց.

«Նախ շատ արագ պետք է սրանից ձերբազատվի, կազմակերպվեն զորամասերին կից՝ թեթև մանյովրային զորամասեր, պետք է ազգային ոգուն հարիր ռազմական կանոնագիրք, որը մենք չունենք, այս օրենսդրության մեջ միակ ելքն այն է, որ բոլոր զորամասերը տեղայնացվեն, բայց այս նախարարի հետ ես հույսեր չունեմ, եթե պաշտպանության նախարարի տեղակալը հայտարարում է, որ Ներքին Հանդեր գյուղը ադրբեջանական է , սա բացահայտ դավաճանություն է՝ վերևից»,-ասաց Պավլիկ Մանուկյանը:

Աղբյուր` Փաստինֆո