Փաստ ինֆո

Երևանի ընդհանուր իրավասության դատարանը՝ դատավոր Դավիթ Հարությունյանի նախագահությամբ, հեռացել է խորհրդակցական սենյակ՝ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով դատավճիռ կայացնելու։

«Փաստինֆո»-ի թղթակցի հաղորդմամբ՝ գործով շուրջ 6 տարի տևած քննությունից հետո ամբաստանյալներն այսօրվա նիստում հանդես են եկել վերջին խոսքով՝ խնդրելով կայացնել արդար դատական ակտ։

Վերջին խոսքով առաջինը հանդես եկած ամբաստանյալներից Վաչե Սահակյանը հայտարարել է, թե մարդու խոսքը մահաբեր ուժ ունի, որի միջոցով հնարավոր է մարդկային կյանքեր կործանել։

«Արդեն յոթ տարի է, այդ խոսքի ազդեցությունը զգում եմ ինձ վրա։ Ինձ ասել են, որ, եթե անմեղ ես, քեզ դատարանը հնարավորություն կտա դա ապացուցելու, բայց երբ սկսում եմ դա անել, ասում են թե՝ բնական է, դու քեզ պետք է արդարացնես, պաշտպանես։ Քաղաքացի դատավոր, եթե ես թեկուզ աննշան իմ մասնակցությունն ունենայի Հայկազի մահվան մեջ, ես կընդունեի իմ մեղքը և առաջինը ներողություն կխնդրեի, հետո՝ իմ մորից, որը ստիպված կրում է այն տանջանքները, որի միջոցով անցնում ենք բոլորս։ Հիմա ցանկանում եմ ներողություն խնդրել Հայկազի ծնողներից, որ այնքան թույլ հրամանատար էի, որ չկարողացա կանխատեսել և կանխարգելել այդ դեպքերը, որոնք հանգեցրին Հայկազի մահվանը»,- հայտարարեց ամբաստանյալը։

Վերջին խոսքով հանդես եկավ նաև ամբաստանյալ Նորիկ Սահակյանը՝ նշելով, որ երկար ու ձիգ ձգձգվող քրեական գործով այս տարիների ընթացքում չի խոչընդոտել դատական պրոցեսին՝ հույսով սպասելով այս օրվան, որ արդարացի դատավճիռ կլսի։

«Այսքան խառնիխուռն վկաների ցուցմունքների և իմ մեղավորությունը չապացուցող փորձաքննությունների մեջ միայն ես ու իմ Աստված գիտենք իմ մեղավորության և անմեղության բաժինը, քանզի՝ ես մարդ չեմ սպանել, ոչ մի կապ չեմ ունեցել մարդկային կորստի մեջ։ Յոթ տարի շարունակ գտնվել եմ կալանքի տակ՝ հանրության առաջ մարդասպանի պիտակով։ Ճիշտ է, էլ չեմ կարող հետ բերել կյանքիս այս ամենաթանկ տարիները, որը պետք է օգտագործեի իմ կյանքը կառուցելու նպատակով»,- նշեց ամբաստանյալը՝ հայտարարելով, որ յոթ տարին արդեն իսկ շատ է չարած հանցանքի համար ճաղերի ետևում գտնվելու համար։

Ամբաստանյալ Գնել Թևոսյանն էլ նշեց՝ դատախազությունը յոթ տարիների ընթացքում փորձել է ամեն ինչ անել՝ դատապարտելու չարած բանի համար։

«Հիմնավոր ապացույցը բերում է, որ մի վկան 12 անգամ իր խոսքը փոխել է, ոչ մի ապացույց չունի, որ ես հանցանք եմ կատարել։ Դատախազության կողմից բերված հակասական ցուցմունքները զրպարտություն է»,- հայտարարել է Թևոսյանը։

Ամբաստանյալներից մյուսը՝ Մովսես Ազարյանը, վերջին խոսքով հանդես գալ չցանկացավ։

Գործի քննությունն ավարտվեց։ Երևանի ընդհանուր իրավասության դատարանը՝ դատավոր Դավիթ Հարությունյանի նախագահությամբ, հեռացել է խորհրդակցական սենյակ՝ վճիռ կայացնելու, որը կհրապարակվի ապրիլ ամսին։

Նշենք, որ մեղադրական ճառով դատախազը պահանջել է մեղավոր ճանաչել ամբաստանյալներին և դատապարտել ազատազրկման՝ 18-20 տարի ժամկետով, ինչի հետ, տուժող կողմը համաձայն չէ։ Տուժողի իրավահաջորդ Արկադի Բարսեղյանը պահանջում է ցմահ ազատազրկման դատապարտել ամբաստանյալներին։

Հիշեցնենք, որ կուրսանտի դին հայտնաբերվել է 2015թ. հունվարի 29-ին՝ ՊՆ Վազգեն Սարգսյանի անվան ռազմական ինստիտուտի մարզահրապարակում պտտաձողի վրա պարանով կախված վիճակում: Ըստ գործի նյութերի՝ մի քանի զինծառայողներ բռնել են անկողնում պառկած կուրսանտի ոտքերը և ձեռքերը, փակել բերանը՝ զրկելով օգնություն կանչելու հնարավորությունից, ապա սուր կտրող-ծակող գործիքով կտրել նրա աջ նախաբազկի արմնկափոսի երակը, որին հաջորդել են հարվածներ կուրսանտի կրծքավանդակին և դեմքին, այնուհետև սեղմելով պարանոցը՝ կոտրել են կուրսանտի ենթալեզվային ոսկորը, ապա հագցրել են կուրսանտի հագուստները և տեղափոխել զորամասի մարզահրապարակ, որտեղ և պտտաձողից կախել են այս դաժան գործողությունների արդյունքում շնչահեղձությունից մահացած Հայկազ Բարսեղյանին: Սույն գործով ամբաստանյալի կարգավիճակում են Հայկազ Բարսեղյանի չորս համածառայակիցները՝ Գնել Թևոսյանը, Նորիկ Սահակյանը, Վաչե Սահակյանը, Մովսես Ազարյանը, որոնք մեղադրվում են Հայկազ Բարսեղյանի սպանության համար։ Չորս ամբաստանյալներից բացի մեղադրանք էր առաջադրվել նաև նույն զորամասի կուրսանտ Վարազդատ Սաֆարյանին, որի նկատմամբ դատաքննության ընթացքում քրեական հետապնդումը դադարեցվել է՝ վաղեմության ժամկետներն անցած լինելու հիմքով։

Հեղինակ՝ Իզաբել Սահակյան

Աղբյուր` Փաստինֆո