Փաստ ինֆո

Նիկոլ Փաշինյանն այսօր «հուզվել էր», արցախահայության մասին սրտացավ հայտարարություններ էր անում, վտանգների մասին էր խոսում, բայց սա կանցնի, Փաշինյանի համար Արցախը կրկին անցյալի հուշ կմնա, չի էլ հիշի, որ արցախահայություն կա: «Փաստինֆո»-ի հետ զրույցում նման դիտարկում է արել ռազմական փորձագետ Հայկ Նահապետյանը՝ անդրադառնալով Նիկոլ Փաշինյանի՝ Արցախի վերաբերյալ հնչեցված հայտարարություններին:

Նշենք, որ Նիկոլ Փաշինյանն այսօր կառավարության նիստի ժամանակ վերջապես արձագանքել էր Արցախում ստեղծված հումանիտար ճգնաժամին և նշել, որ «Ադրբեջանը խնդիր է դրել Արցախում էթնիկ զտումների քաղաքականությունը ավարտին հասցնելու համար»։

«Արցախում հենց այս պահին շուրջ 117 հազար հայ է ապրում, Ադրբեջանը համարում է իր ամենամեծ պարտությունն ու խնդիր է դրված՝ ամեն ինչ անել Արցախում էթնիկ զտումների քաղաքականությունը ավարտին հասցնելու համար»,- հայտարարել էր Նիկոլ Փաշինյանը:

Ըստ Հայկ Նահապետյանի՝ Նիկոլ Փաշինյանի հայտարարությունները մի շարք վտանգավոր թեզեր են պարունակում, նախ՝ այս հայտարարություններով նա խուճապ է առաջացնում արցախահայության շրջանում, ինչպես նաև թիրախավորում է ռուս խաղաղապահներին՝ կասկածի տակ դնելով նրանց գործառույթը.

«Էթնիկ զտում նշանակում է, որ Արցախում բնակվող հայ բնակչությունը ֆիզիկական բռնությունների, ջարդերի կամ ցեղասպանվելու վտանգի ներքո պետք է այդ տարածքը լքի, էթնիկ զտման դեպքում դու պարտադրում ես բնակչությանը՝ դուրս գալ իր բնակավայրից, Փաշինյանն այսպիսով խուճապ է առաջացնում Արցախում բնակվող մեր հայրենակիցների այն մասի մոտ, որոնք դեռևս հավատում են Նիկոլ Փաշինյանի ինչ-ինչ խոսքերին»,-ասաց փորձագետը։

Նրա արձանագրմամբ՝ Ադրբեջանը ցանկանում է հայաթափել Արցախը՝ կարճ ժամանակահատվածում։ «Այդ հայաթափումը տեղի է ունենալու այն ժամանակ, երբ մարդիկ զգան, որ իրենց կյանքի անվտանգությունը երաշխավորված չէ, իսկ այնտեղ իրենց կյանքի անվտանգությունն առաջին հերթին երաշխավորում են ռուս խաղաղապահները, իսկ Փաշինյանն անուղղակիորեն ասում է, որ ռուս խաղաղապահներն իրենց գործառույթները չեն իրականացնելու, մարդիկ էլ իրենց պաշտպանված չեն զգալու, իրենց ընտանիքի անդամների կյանքը վտանգված է լինելու, ստիպված լքելու են բնակավայրերը: Նա, ըստ էության, ասում է՝ Ադրբեջանն է այլևս որոշելու Արցախում, իսկ ռուս խաղաղապահներն առ ոչինչ են:Փաշինյանը կարող է ասել՝ ես դա նկատի չեմ ունեցել, դուք լավ չեք ընկալել, իմ խոսքերը օդի մեջ պտտվել են, ձեր լսողական օրգաններով սխալ եք ընկալել, բայց ինքն ուղղակիորեն թիրախավորել է ռուս խաղաղապահներին»,-ասաց Նահապետյանը:

Թեև Արցախում տևական ժամանակ է հումանիտար աղետ է, բայց Նիկոլ Փաշինյանը ամեն կերպ խուսափում էր որևէ գնահատական տալ դրան, այս ամենի ֆոնին՝ այսօր կառավարության նիստի ժամանակ նրա արված հայտարարությունները համեմատաբար կարելի է կոշտ համարել:

Թե ինչո՞վ է պայմանավորված հայտարարությունների այսպիսի կտրուկ փոփոխությունը, փորձագետը նկատեց՝ Փաշինյանի այսօրվա հայտարարությունների վրա արտաքին գործոններ են ազդել, ըստ զրուցակցի՝ «եթե ինքը բարձրաձայնում է, որ արցախահայության կյանքին վտանգ է սպառնում, սա նշանակում է, որ դրսում ինչ-որ գործոն փոխվել է».

«Օրերս ՌԴ ցամաքային զորքերի խաղաղապահ ստորաբաժանման փոխհրամանատարը հանդիպել է Ադրբեջանի ԶՈՒ բարձրագույն հրամկազմի հետ, ամենայն հավանականությամբ, այնտեղ քննարկվել է Արցախում ստեղծված հումանիտար իրավիճակը, ռուսական կողմը կոշտ խոսակցություն է ունեցել ադրբեջանցիների հետ, հավանաբար, այդ հանդիպման մասին ինչ-որ բաներ Նիկոլ Փաշինյանն իմացել, ոգևորվել է, դրա համար է արցախահայության մասին սրտացավ հայտարարություններ արել, վտանգների մասին բարձրաձայնել , եթե Ռուսաստանի բարձրաստիճան զինվորականները Բաքվում չհանդիպեին իրենց կոլեգաների հետ, Փաշինյանը որևէ կերպ չէր արձագանքի, հիմա, երբ հանդիպում է եղել, ինքն էլ է «հուզվել», որ մեր հայրենակիցները Արցախում սառում են, սա կանցնի կգնա, Փաշինյանի համար Արցախը կրկին անցյալի հուշ կմնա, նա չի էլ հիշի, որ նման խնդիր կա, արցախահայություն կա»,-ասաց Նահապետյանը:

Նշենք, որ Փաշինյանն այսօր կրկին խոսել էր խաղաղության հաստատելու մեծ ցանկության մասին և ցիտել էր Սերժ Սարգսյանի խոսքերը.

«Մենք պատրաստ ենք խաղաղության բանակցությունների մեկնարկին, ինչպես իրավացիորեն նշել է Սերժ Սարգսյանը` «մենք ֆաշիստ չենք»,-հայտարարել էր Փաշինյանը:

Անդրադառնալով Նիկոլ Փաշինյանի այս հայտարարությանը՝ փորձագետն արձանագրեց.

«Նիկոլ Փաշինյանը փորձում է բոլոր կորուստները որևէ կերպ բարդել նախկինների վրա, ինչպես անում էր պատերազմի ժամանակ, երբ փորձում էր, այսօր էլ իր մունետիկները փորձում են ամեն կերպ մեր ժողովրդին համոզել, որ պարտության առյուծի բաժինը նախկինների վրա, ինքը փորձում է նախկինների հետ կապել այն գործընթացները, որ հիմա շուտով պատրասվում է անել՝ լինի դա դեմարկացիա, դելիմիտացիա, խաղաղության պայմանագրի կնքում, տարածքների զիջում այս ամենը կապելու է նախկինների հետ»,-ասաց Հայկ Նահապետյանը:

Աղբյուր` Փաստինֆո