Փաստ ինֆո

Սերժ Սարգսյանի և մյուսների գործով մահացած մեղադրյալներ Սերգո Կարապետյանի և Սամվել Գալստյանի ցուցմունքները կհրապարակվեն ամբաստանյալների հարցաքննության ընթացքում։ «Փաստինֆո»֊ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Վահե Միսակյանի նախագահությամբ, ՀՀ երրորդ նախագահ Սերժ Սարգսյանի և մյուսների գործով այսօր կայացած դատական նիստին հետազոտվեցին գործում առկա գրավոր ապացույցները։ Մինչ վկաների հարցաքննությանն անցնելը, նախագահող դատավոր Վահե Միսակյանը նշեց, որ կան ավելի վաղ ներկայացված միջնորդություններ, որոնց պետք է անդրադառնալ։

Մեղադրող դատախազը հայտարարեց, որ գրավոր ապացույցների հետազոտման փուլում պետք է հրապարակվեն նաեւ գործով մահացած մեղադրյալներ Սերգո Կարապետյանի և Գալստյանի՝ նախաքննության ընթացքում տրված ցուցմունքները։ Սակայն նախագահող դատավոր Վահե Միսակյանն արձանագրեց, որ, ի սկզբանե, որոշվել էր ամբաստանյալների հարցաքննությունն իրականացնել վերջում, հետևաբար այս պահին դատարանը հնարավոր է տեսնում Սերգո Կարապետյանի և Գալստյանի ցուցմունքներին անդրադառնալը վերջում։ Այսինքն՝ ամբաստանյալների հարցաքննության ընթացքում դատարանը կհրապարակի նաև Կարապետյանի և Սամվել Գալստյանի ցուցմունքները։ Միսակյանն արձանագրեց, որ անձի մահը չի հանգեցնում ապացույցի տեսակի փոփոխման, ապացույցը շարունակում է մնալ մեղադրյալի ցուցմունք՝ կասկածյալի կամ մեղադրյալի կարգավիճակում տրված։ Դատախազն էլ շարունակեց պնդել իր դիրքորոշումը՝ վերջիններիս ցուցմունքն այս փուլում հրապարակելու վերաբերյալ, բայց դատավորը մնաց անդրդվելի ու վերահաստատեց իր դիրքորոշումը, այն է՝ մահացած մեղադրյալների ցուցմունքները կհրապարակվեն ամբաստանյալների հարցաքննության ընթացքում։

Հիշեցնենք, որ քրեական գործով կա 3 մեղադրյալ։ Սերժ Սարգսյանից բացի մեղադրանքներ են առաջադրվել նաեւ փոխնախարար Սամվել Գալստյանին, գործարար Բարսեղ Բեգլարյանին։ Ըստ մեղադրական եզրակացության՝ ՀՀ երրորդ նախագահ Սերժ Սարգսյանի կազմակերպմամբ և Ֆլեշ ՍՊ ընկերության սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գևորգ Հարությունյանի օժանդակությամբ, ՀՀ նախկին գյուղատնտեսության նախարար Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը:

Դատական նիստը հետաձգվեց մինչև ապրիլի 28֊ը, ժամը՝ 14։30֊ը։

Հեղինակ՝ Իզաբել Սահակյան

Աղբյուր` Փաստինֆո