Փաստ ինֆո

«Իսկ ի՞նչ էինք ակնկալում թշնամուց, որ ասելո՞ւ էր՝ վա՜յ, կներեք, մի բողոքեք, հենց հիմա վազելու եմ գազի փականը բացե՞մ… Թշնամին իր նախաձեռնությունների օրակարգն ունի, որոնք հերթով, կարգով կյանքի է կոչում։ Այստեղ հարցն այլ կերպ պետք է հնչեցնել՝ իսկ ի՞նչ են անում Արցախի և Հայաստանի իշխանությունները՝ բացառելու նմանօրինակ զարգացումները կամ՝ ի՞նչ պետք է անել, որ թշնամին չկարողանա իրականացնել իր մշակած այսօրինակ ռազմավարությունը, թե չէ պարզ է՝ պարտվող կողմի հետ ինչպես կուզենաս, կվարվես,», - «Փաստինֆո»-ի հետ զրույցում ասել է, հասարակական, քաղաքական գործիչ Թևան Պողոսյանը։

Հիշեցնենք՝  Արհեստածին Ադրբեջանի ԱԳՆ-ն չի հերքել, որ դադարեցրել են Արցախի գազամատակարարումը, ինչը քննադատող ՀՀ ԱԳՆ-ի հայտարարությունը գնահատել  են որպես Ադրբեջանի ներքին գործերին միջամտելու փորձ։

Թևան Պողոսյանը նկատում է՝ եկեք ինքներս մեզ հարց տանք՝ վերջին 30 տարիների ընթացքում ե՞րբ էր, որ թշնամին չի կարողացել ո՛չ հոխորտալ, ո՛չ խելքին փչածն անել, ո՛չ էլ Արցախ մտնող գազը սեփական հայեցողությամբ բացել – փակել. «Դա եղել է միայն այն ժամանակ, երբ հայկական կողմը նրա սադրանքներին համարժեք, մի բան էլ ՝ ավելի լուրջ պատասխան է տվել։ Մինչև նա այս գործողությունները չտեսնի, մինչև ռեալ իրականության մեջ չհասկանա, որ, եթե դեպի Արցախ մտնող գազատարը փակեց, իր մոտ մի 20 տեղ գազը կպայթի, նա խելքը գլուխը չի հավաքելու, իսկ ինչո՞ւ սա չի արվում՝ հարցրեք Արցախի և Հայաստանի իշխանություններին։ Մի թշնամի, որ միայն ուժի լեզուն է հասկանում, նրա հետ միայն և բացառապես ուժի լեզվով պետք է խոսել, այն էլ՝ բիրտ ուժի, ընդ որում՝ ազգային միասնության և միասնականության դիրքերից»։

Հարցին՝ ինչպե՞ս կամ ո՞վ պետք է համարժեք պատասխան տա նմանօրինակ թշնամուն, երբ, նույնիսկ, 44 օրյա ակտիվ պատերազմական գործողությունների օրերին, անգամ, չխոցվեցին թշնամու գազամուղները, Թևան Պողոսյանը պատասխանում է՝ պատերազմի մեկնարկի հենց առաջին օրերին Արցախից մեկ անգամ չէ, որ հանդես է եկել նման կոչով՝ խոցել թշնամու ռազմավարական նշանակության օբյեկտներն, այդ թվում՝ նաև  գազամուղները. «Արցախում մեր հայտնի շուշաբանդից տեղական և միջազգային լրատվամիջոցների եթերներից տասնյակ անգամներ հայտարարել եմ՝ պետք է թիրախավորել թշնամու ռազմավարական նշանակության օբյեկտները, անհրաժեշտ է շարքից հանել Ադրբեջանի տարածքով անցնող գլխավոր գազատարները, մանավանդ, որ Ստեփանակերտին հարվածելուց հետո, մենք ունեինք դրա բոլոր լեգիտիմ հիմքերը։ Լսողն ո՞վ էր…»։

Թևան Պողոսյանի գնահատմամբ՝ նույնիսկ ավելորդ է ասել, որ Հայաստանի Հանրապետության և Արցախի իշխանությունները պետք է առաջնորդվեն սեփական պետությունների կենսական նշանակության շահերով։

«Արդեն, նույնիսկ ուշացած է հիշեցնել՝ պարոնայք,  եթե դուք դա չեք կարողանում անել, ապա  գիտակցված և կամավոր կերպով հեռացեք, փոխանցեք իշխանությունը նրանց, ովքեր ի զորու են պաշտպանել մեր պետության սահմաններն ու  շահերը, ձևավորելու Ազգային միասնության հնարավորություն՝ դուրս գալու համար ստեղծված իրավիճակից։ 10 միլիոնանոց հայության մեջ կգտնվեն  այնպիսիք, ովքեր կկարողանան ճգնաժամերի հաղթահարման պատասխանատվություն ստանձնել, նախաձեռնել այնպիսի գործողություների կուռ համակարգ, որտեղ միասնական դարձած հայ ժողովուրդը՝ մի բռունցք դարձած,  կտա – կկոտրի թշնամու ատամները։ Իսկ, եթե օրվա իշխանություններն, այնուամենայնիվ, համառորեն հեռանալու նախաձեռնություն չեն ստանձնում՝ ինքնակամ անելու այդ քայլը, ապա դրան հասնելու համար տարատեսակ  և բազմաթիվ միջոցներ կան։ Ուզո՞ւմ եք պետություն, պետականություն և Հայրենիք ունենալ՝  պետք է գործել, դուրս գալ կոմֆորտի զոնայից, քայլեր անել՝ համատարած գործադուլներ, սկսել փողոցային պայքար, մի այլ ուժ, օրինակ, ստորագրահավաք է նախաձեռնել և այլն։ Պայքարի յուրաքանչյուր տարբերակ ընդունելի է, եթե այս իշխանությունները չեն գիտակցում կամ չեն ուզում հասկանալ, որ մեր պետության գլխին կախված ահռելի վտանգների աղբյուրը հենց իրենք են»,- արձանագրել  է գործիչը։

Աղբյուր` Փաստինֆո