Փաստ ինֆո

ՀՀ քաղաքաշինության կոմիտեի նախկին նախագահ Վահագն Վերմիշյանը քաղաքական պատանդ է։ «Փաստինֆո»-ի հետ զրույցում նման գնահատականով է հանդես եկել պաշտպան Ալեքսանդր Կոչուբաևը։

«Քաղական հետապնդման դեպքում ֆորմալ ընթացակարգեր արվում են գոնե, իր պարագայում դա էլ չկա, բայց ընդդիմությանն այս դեպքը չի հետաքրքրում, քանի որ Վերմիշյանը եղել է իշխանական թևից»,- նշեց փաստաբանը՝ ընդգծելով, որ Վերմիշյանը թավշյա իշխանության և դրա անդամների հետ որևէ կապ չի ունեցել։ Կոչուբաևի խոսքով՝ Վերմիշյանը Հայաստանում չի ապրել երկար տարիներ և եկել էր հրավերով, որ գիտելիքներով բարելավի քաղաքաշինության ոլորտը, բայց պարզվեց, որ 2018թ իրադարձություններով իշխանության թափորը չէր եկել շենացնելու, այլ հստակ օրակարգ կար, որը մենք տեսանք։

Նշենք, որ ավելի վաղ պաշտպանը հայտարարել էր, որ Վերմիշյանն ասելիք ունի Նիկոլ Փաշինյանի կոռուպցիոն դրսևորումների վերաբերյալ։ Պաշտպանն այս պահին զերծ մնաց մանրամասնելուց, միայն նշեց, որ կապ տեսնում է այդ հանգամանքի և Վերմիշյանի՝ շարունակական կալանքի տակ պահելու հետ։

«Վերմիշյանը իշխանության ներսում ընկալվել է որպես ոչ յուրային պաշտոնյա, ով չէր մտնում որևէ սխեմաների մեջ և առաջ էր մղում բացառապես պետության շահերից բխող օրակարգեր»,- նշեց Կոչուբաևը։

Ինչ վերաբերում է փակագծեր բացելուն, ապա, ըստ փաստաբանի, առհասարակ չկա որևէ հարց, որին պատասխանելուց Վերմիշյանը կխուսափի, բայց մյուս կողմից՝ լինելով պետականամետ մարդ՝ լավ է հասկանում, որ կոռուպցիոն գործընթացները զուգորդված են պետական անվտանգության որոշ խնդիրներով, որոնց մասին խոսելը ներկա փուլում կվնասի անվտանգային համակարգին և այս պատճառաբանությամբ իր խոսքը ուշանում է։

Պաշտպանն այսօրվա դատական նիստում  միջնորդություն է ներկայացրել՝  Վերմիշյանի նկատմամբ ընտրված խափանման կալանավորումը գրավով փոխարինելու մասին՝ գրավի չափ առաջարկելով 18 միլիոն ՀՀ դրամը։ Միջնորդության հիմքում դրվել է՝ գործի քննությանը խոչընդոտելու ռիսկի վերացման հանգամանքը, ինչպես նաև այն, որ դատական նիստերը տևական ժամանակ չեն կայանում, շուրջ վեց ամիս դատական նիստերը չեն կայացել։  Այդուհանդերձ, Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, մերժել է  գրավով փոխարինելու մասին միջնորդությունը։

Ըստ առաջադրված մեղադրանքի՝ Վահագն Վերմիշյանը, 2019 թվականի մարտի 21-ից զբաղեցնելով ՀՀ քաղ.շին կոմիտեի նախագահի պաշտոնը, 2019թ սեպտեմբերից մինչև 2020թ փետրվարի 5-ն ընկած ժամանակահատվածում իր պաշտոնեական դիրքը ծառայության շահերին հակառակ օգտագործելով չարաշահել է իր պաշտոնեական լիազորությունները՝ խախտելով «Հանրային ծառայության մասին» ՀՀ օրենքի 31-րդ հոդվածի պահանջները, որն է՝ հանրային պաշտոն զբաղեցնող անձինք և հանրային ծառայողները չեն կարող զբաղեցնել որևէ պաշտոն առևտրային կազմակերպություններում, զբաղվել է ձեռնարկատիրական գործունեությամբ, ինչպես նաև ստացել է խոշոր և առանձնապես խոշոր չափերի հասնող կաշառք, պաշտոնեական դիրքն օգտագործելով խարդախությամբ հափշտակել ուրիշի՝ խոշոր չափերի հասնող գույքը։

Վազգեն Պողոսյանին մեղադրանք է առաջադրվել այն բանի համար, որ նա Գագիկ Գալստյանի հետ նախնական համաձայնությամբ, վերջինիս միջոցով պաշտոնատար անձին տվել է առանձնապես խոշոր չափերով կաշառք՝ իր և Գագիկ Գալստյանի օգտին պաշտոնատար անձի կողմից ծառայության գծով հովանավորչություն կատարելու, ինչպես նաև նրա լիազորությունների շրջանակում որևէ գործողություն կատարելու և պաշտոնեական դիրքն օգտագործելով իրենց օգտին գործողություն կատարելուն նպաստելու համար։

Ջոն Ֆարխոյանին մեղադրանք է առաջադրվել այն բանի համար, որ նա պաշտոնատար անձին անձամբ տրամադրել է 952.000 ՀՀ դրամին համարժեք 2.000 ԱՄՆ դոլար գումար կաշառք իր օգտին պաշտոնատար անձի կողմից պաշտոնեական դիրքն օգտագործելով որևէ գործողություն կատարելու կամ չկատարելուն նպաստելու, ծառայության գծով հովանավորչության համար։ Ռազմիկ Խուրշուդյանին մեղադրանք է առաջադրվել այն բանի համար, որ նա կազմակերպչական-տնօրինչական և վարչատնտեսական լիազորություններով օժտված, պաշտոնատար անձ հանդիսացող ՀՀ քաղաքաշինության կոմիտեի նախագահ Վահագն Վերմիշյանին տվել է կաշառք, մասնավորապես` անձամբ պաշտոնատար անձին առաջարկել է այլ անձի համար գույք` իր օգտին պաշտոնատար անձի կողմից իր լիազորությունների շրջանակում որևէ գործողություն կատարելու կամ պաշտոնատար անձի կողմից իր պաշտոնեական դիրքն օգտագործելով այդպիսի գործողություն կատարելուն նպաստելու համար:

Մուշեղ Ավետիսյանին մեղադրանք է առաջադրվել այն բանի համար, որ նա Նատալիա Չեռնիկովայի հետ նախնական համաձայնությամբ, «Ավետիսյան Քոնսթրաքշն» ՍՊ ընկերության հաշվապահներ Էլեն Գրիգորյանի և Վրեժ Ասրյանի օժանդակությամբ պատրաստել և օգտագործել են ակնհայտ կեղծ փաստաթղթեր: Էլեն Գրիգորյանին եւ Վրեժ Ասրյանին մեղադրանք է առաջադրվել Մուշեղ Ավետիսյանին և Նատալիա Չեռնիկովային ակնհայտ կեղծ փաստաթղթեր պատրաստելու և իրացնելու հարցում օժանդակելու համար։

Հեղինակ՝ Իզաբել Սահակյան

Աղբյուր` Փաստինֆո