Փաստ ինֆո

Եղեգնաձորում դաժանաբար ծեծի ենթարկված փոխգնդապետ Արա Մխիթարյանի գործով արդարացված Զավեն Գրիգորյանը, որը Վայոց ձորի նախկին քպական մարզպետի օգնականի եղբայրն է, պահանջում է քրեական հետապնդում իրականացնել իր դեմ ցուցմունք տված զինվորականների նկատմամբ։ 

Ինչպես արդեն տեղեկացրել ենք՝ նախաքննական մարմնի որոշմամբ՝ Արա Մխիթարյանին դաժանաբար ծեծի ենթարկելու գործով մեղադրյալ Զավեն Գրիգորյանի նկատմամբ 2021թ քրեական հետապնդումը դադարեցվել է՝ արդարացման՝ հանցակազմի բացակայության հիմքով, թեեւ դեպքի վայրում Արա Մխիթարյանի հետ գտնված ընկերները, պատմել էին, որ Գրիգորյանը եղել է դեպքի վայրում։

Փաստաբան Լևոն Սահակյանը «Փաստինֆո»-ի հետ զրույցում հայտնեց, որ Զավեն Գրիգորյանի նկատմամբ քրեական հետապնդումը դադարեցնելու որոշում կայացվելու հետ միաժամանակ որոշել են նաև քրեական հետապնդում չիրականացնել զինվորականների նկատմամբ՝ սուտ մատնության հատկանիշներով, ինչը բողոքարկվել է դատախազին, ապա՝ դատարան։ Այժմ բողոքը գտնվում է Երևանի ընդհանուր իրավասության դատարանի դատավոր Դավիթ Բալայանի վարույթում։ Լևոն Սահակյանն ընդգծում է՝ սուտ մատնություն կատարած անձինք պետք է պատասխանատվություն կրեն։

Նշենք, որ Զավեն Գրիգորյանը պահանջում է նաեւ բարոյական վնասի փոխհատուցում։ Մասնավորապես, քրեական հետապնդումը դադարեցվելուց հետո Զավեն Գրիգորյանը հայցադիմում է ներկայացրել դատարան՝ ընդդեմ ՀՀ-ի՝ ի դեմս ՀՀ ֆինանսների նախարարության՝ պահանջելով պատճառված վնասի փոխհատուցում։ Հայցվորը պահանջում է բռնագանձել 333.000.000 ՀՀ դրամի չափով գումար, որից 2.262.630 ՀՀ դրամը՝ որպես նյութական վնաս, 330.737.370 ՀՀ դրամը՝ որպես ոչ նյութական վնասի՝ կիրառված խափանման միջոցների և որպես մեղադրյալ ներգրավված լինելու արդյունքում կրած բարոյական վնասի փոխհատուցում: Երևանի ընդհանուր իրավասության դատարանը՝ դատավոր Սարգիս Երիցյանի նախագահությամբ, վարույթ է ընդունել հայցադիմումը։

Հիշեցնենք, որ փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում եւ արդեն շուրջ 2.5 տարի է, ինչ գտնվում է կոմայի մեջ։ Հարազատների պնդմամբ՝ փոխգնդապետի նկատմամբ կիրառված բռնությանն անմիջական մասնակցություն է ունեցել նաեւ Տրդատ Սարգսյանը, որը հենց այս աղմուկի հետեւանքով հայտարարեց մարզպետի պաշտոնից հրաժարական տալու մասին։

Միջադեպին մարզպետի ներկայության հանգամանքը իրենց ցուցմունքներում պնդել են նաեւ 3 վկաները, այդուհանդերձ նախկին մարզպետին մեղադրանք չի առաջադրվել։ Քրեական գործով մեղադրանք էր առաջադրվել երկու անձի, որոնցից մեկը՝ Զավեն Գրիգորյանի նկատմամբ նախաքննական մարմնի որոշմամբ հետապնդումը դադարեցվել է, իսկ Հարություն Գրիգորյանի վերաբերյալ դրվագն անջատվել և ուղարկվել դատարան։ Արարատի և Վայոց Ձորի մարզի ընդհանուր իրավասության դատարանը՝ դատավոր Հարություն Պետրոսյանի նախագահությամբ, Հարություն Գրիգորյանը մեղավոր է ճանաչվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով՝ մի խումբ անձանց կողմից անձի առողջությանը դիտավորությամբ ծանր վնաս պատճառելու համար և դատապարտվել ազատազրկման՝ 5 տարի ժամկետով։ Հարություն Գրիգորյանին մեղսագրվող 118-րդ հոդվածով՝ ծեծի դրվագով, վերջինիս նկատմամբ քրեական հետապնդումը դադարեցվել է՝ վաղեմության ժամկետներն անցած լինելու հիմքով։ Դատավճռի դեմ վերաքննիչ բողոք է ներկայացվել։

Հեղինակ՝ Իզաբել Սահակյան

Աղբյուր` Փաստինֆո