Փաստ ինֆո

Ադրբեջանի առաջարկներում Հայաստանի համար անընդունելի ոչինչ ըստ էության չկա: ԱԺ-ում հայտարարեց արտաքին գործերի նախարար Արարատ Միրզոյանը՝ պատասխանելով պատգամավոր Արուսյակ Ջուլհակյանի Բաքվի ներկայացրած 5 նախապայմանների վերաբերյալ հարցերին։

«Այն բանից հետո, երբ մենք ասացինք, որ պարզ պատասխանել ենք Ադրբեջանին, որոշակի մեկնաբանություններ եղան, որոնց մի մասը թյուր, սխալ մեկնաբանություններ էին, քանի որ գնահատականն այնպիսին էր, թե Հայաստանը մերժել է Ադրբեջանի առաջարկները։ Ես ուզում եմ ասել, որ Ադրբեջանի առաջարկներում Հայաստանի համար անընդունելի ոչինչ, ըստ էության, չկա։ Այլ բան, որ այդ առաջարկներն ամբողջովին չէին հասցեագրում հնարավոր բանակցությունների ողջ օրակարգը»,-ասաց Միրզոյանը:

Նա նաև հայտնեց, որ Հայաստանը Ադրբեջանի առաջարկները համալրել է իր առաջարկներով և փոխանցել է ԵԱՀԿ Մինսկի խմբի նամանախագահությանը, սակայն Բաքվից դեռևս արձագանք չկա.

«Համանախագահողներից ինձ տեղեկացրել են, որ այդ առաջարկները փոխանցվել են Բաքվին, Բաքվից առայժմ պատասխան չունենք։ Հայաստանի առաջարկները ամբողջովին, գրեթե 100 տոկոսով բացահայտված են իմ՝ Արմենպրեսին տված հարցազրույցում։ Չկա մի բան մեր առաջարկներում, որը բացակայում է այդ հարցազրույցից։ Եվ որևէ հետաքրքրվող անձ կարող է ամբողջությամբ պատկերացում կազմել մեր պատասխանի մասին՝ կարդալով այդ շատ համառոտ հարցազրույցը»,- ասաց Արարատ Միրզոյանը։

Արուսյակ Ջուլհակյանը Միրզոյանից նաև հետաքրքրվեց՝ արդյո՞ք ռուս-ուկրաինական պատերազմի ֆոնին ԵԱՀԿ Մինսկի խումբը կշարունակի զբաղվել ԼՂ հիմնախնդրի կարգավորմամբ:

Արարատ Միրզոյանն էլ նշեց, որ Ուկրաինայում ռազմական գործողությունները կտրուկ բարդացրել են ԵԱՀԿ համանախագահության աշխատանքները՝ ընդհուպ մինչև համատեղ քննարկումների դեպքում.

«Ելնելով որոշակի ազդակներից և ուղերձներից, որ ես եմ ստացել Մինսկի խմբի անդամ երկրներից, ես ուզում եմ վերահաստատել, որ միջազգային հանրությունը շարունակում է ԼՂ հիմնախնդրի կարգավորումը շարունակում է տեսնել ԵԱՀԿ Մինսկի խմբի ձևաչափում, ինչը շատ հուսադրող է»,-ասաց նա:

Ադրբեջանը վերջերս հայտարարեց, որ Հայաստանին ներկայացրել է «Խաղաղության պայմանագրի» իր առաջարկը, որտեղ կարեւոր 5 նախապայման կա։ Պաշտոնապես դրանք չեն հրապարակվել, սակայն, ըստ փորձագիտական հանրության, այդ կետերն են՝

- Հայաստանի կողմից Ադրբեջան տարածքային ամբողջականության ճանաչումը՝ այդ թվում Արցախի հանդեպ ցանկացած պահանջից հրաժարում

- Հայկական զորքերի դուրս բերում, ՀՀ տարածքից, այսպես կոչված, «անկլավներից», խոսքը Արարատի մարզմի մեկ և Տավուշի մարզի 5 գյուղերի մասին է
- Հայ-ադրբեջանական սահմանի դեմարկացիա և դելիմիտացիա՝ 1970 թվականի խորհրդային քարտեզի հիման վրա

- Տրանսպորտային հաղորդակցության ապաշրջափակում՝ այդ թվում հատուկ կարգավիճակ տալով, այսպես կոչված, «Զանգեզուրի միջանցքին»։

- Ադրբեջանի փախստականների՝ Հայաստան վերադառնալու հնարավորության քննարկում կամ նրանց նյութական վնասի փոխհատուցում։

Աղբյուր` Փաստինֆո