Փաստ ինֆո

Խորհրդարանում կայացած հրատապ քննարկման ժամանակ, որի թեման Արցախում ստեղծված հումանիտար ճգնաժամն ու դրան ուղղված լուծումներն էին, ըստ էության իրենց նպատակին չծառայեցին։ ԱԺ նիստին հայտարարեց «Պատիվ ունեմ»  խմբակցության պատգամավոր Տիգրան Աբրահամյանը։

Ըստ ընդդիմադիր պատգամավորի՝ իշխանության ամենամեծ խնդիրն այն է, որ չնայած ճգնաժամի հաստատմանը, կառավարությունը չներկայացրեց «գործողություններ  և միջոցառումներ» ծրագիրը, որը պետք է ուղղված լիներ Արցախում ապրող մեր հայրենակիցների խնդիրների վերացմանը։  

Աբրահամյանի արձանագրմամբ՝ ստեղծվել է մի իրավիճակ, երբ Ադրբեջանը փորձում է մեծացնել ոչ միայն Արցախի և Հայաստանի դեմ ուղղված ճնշումները, այլ Արցախը տանել հայաթափման ճանապարհով, իսկ դա անում են կամ տարատեսակ ճգնաժամեր հրահրելով կամ, ըստ էության, ահաբեկչական գործողություններ անելու միջոցով։

«Հայաստանի ցանկացած իշխանութուն, անկախ բանակցությունների ընթացքից, պետք է գիտակցի, որ Արցախի անվտանգությունն ու արցախցիների բնականոն կյանքի ապահովումը իր առաջին առաքելությունն է»,-նշեց ընդդիմադիր պատգամավորն՝ ընդգծելով, որ Արցախի անվտանգության ապահովումը ուղիղ կապ ունի Հայաստանի պաշտպանողականության և կենսաապահովման հետ, ու ցանկացած գործընթաց, որը թիրախավորում է Արցախը կամ խոցելի դարձնում Արցախին, ուղիղ ազդում է Հայաստանի անվտանգության վրա։   

Արցախում ապրող մեր հայրենակիցները պատրաստ են հաղթահարել բազում դժվարություններ և բարդություններ, սակայն նրանք պետք է համոզված լինեն, որ իրենց թիկունքում Հայաստանն է։

«Հայաստանի կառավորության ասօրվա պահվածքը, անտարբերությունն ու անկարողությունը, ցավոք հուշում է , որ իշխանությունն իրավիճակին ոչ միայն հրատապ արձագանքելու քայլեր չի ձեռնարկում, այլ առկա սպառնալիքներին հաղթահարելուն ուղղված լուրջ միջոցառումներ իրականացնելու  կամք և ցանկություն չունի»,-եզրափակեց իր խոսքը Տիգրան Աբրահամյանը։

Աղբյուր` Փաստինֆո