Փաստ ինֆո

«Հայաստան» խմբակցության պատգամավոր Արեգնազ Մանուկյանը խորհրդարանում իր ելույթի ժամանակ հերթական անգամ անդրադարձավ ԱԺ նախագահ Ալեն Սիմոնյանի գլխավորած պատվիրակության Ինդոնեզիա այցին և ասաց.

«Սա առաջին դեպքը չէ, երբ պետբյուջեի հաշվին իշխող խմբակցության պատգամավորները դառնում են թանկարժեք զբոսաշրջիկներ»:

Փոխնախագահ Ռուբեն Ռուբինյանը կոչ արեց չշեղվել օրակարգային հարցերից:

Արեգնազ Մանուկյանը, այդուհանդերձ, շարունակեց իր ելույթը և նշեց՝ տպավորություն է, որ այս մարդկանց համար ԱԺ-ն վերածվել է տուրիստական գործակալության.

«Ռոտացիոն սկզբունքով արտասահման են մեկնում, մի լավ ման գալիս ու վերադառնում կառավարությունից իջեցված հերթական հրահանգը կատարելու: Շրջագայությունները մեծամասնության պատգամավորների համար յուրօրինակ բոնուս են՝ հնազանդորեն ենթարկվելու դիմաց: Մեկն ինձ կարո՞ղ է բացատրել, թե ինչ են անելու 8 օր 11 հոգով Բալիում եւ Նուսադուայում: Այդ ի՞նչ ճակատագրական հարցեր են լուծելու, գերիների հա՞րցն են լուծելու, սրընթաց աճող գների դե՞մն են առնելու, Արցախի հումանիտար աղե՞տն են կանխելու, թե՞ Ադրբեջանից դուրս Արցախի հարցն են կարգավորելու»,-ասաց Արեգնազ Մանուկյանը:

Ռուբեն Ռուբինյանն էլ կոռեկտության կոչ արեց Մանուկյանին.

«Տիկին Մանուկյան, ես ձեզ կոչ եմ անում կոռեկտ լինել, մնալ օրակարգի շրջանակներում և ԱԺ նիստերի դահլիճը չխառնել և չշփոթել 7or.am-ի հետ»:

Աղբյուր` Փաստինֆո