Փաստ ինֆո

Արցախի հարցով փակ նիստի ընթացքում բանակցությունների հետ կապված որոշակի տեղեկատվություն փոխանցվեց, որն ամբողջական համարելը դժվար է։ Ամենամեծ խնդիրն այն է, որ իշխանությունը չունի միջոցառումների և գործողությունների ցանկ, որը ենթադրում է այս կամ այն ճգնաժամի դեպքում Արցախում ապրող մեր հայրենակիցների բեռը թեթևացնելու կամ նրանց ուղղվող սպառնալիքները չեզոքացնելու ուղղությամբ։ Այս մասին լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը։

Պատգամավորը տեղեկացրեց, որ երկու խնդիր կար՝ հասկանալու, թե ինչ է բակացվում գազատարի շուրջ, որովհետև կան բազամթիվ վարկածներ, որ ադրբեջանական կողմն այդ ահաբեկչության միջոցով փորձում է ճնշում գործադրել և ստանալ այլ զիջումներ՝ Հայաստանից և Արցախից։ Երկրորդ խնդիրն էր հասկանալ՝ ճգնաժամերի պարագայում կառավարությունն ունի գործիքակազմ, կատարել է ռիսկերի հաշվարկ, որպեսզի հետագայում կարողանա այդ ռիսկերը կառավարել որևէ ձևով։

Փակ նիստի ընթացքում Արցախում գազամատակարարման խնդրի վերաբերյալ կառավարության ներկայացուցիչն արձանագրել է, որ իրականում բարդ իրավիճակում ենք, արագ լուծումներ չենք կարող գտնել, բայց գլխավոր խնդիրն այն է, որ նույնիսկ միջնաժամկետ կամ երկարաժամկետ ժամանակահատվածի համար որևէ լուրջ միջոցառման մասին տեղեկություն չի փոխանցվել։

«Այսինքն, հասկանալի է, որ այն, ինչ այսօր տեղի է ունենում Արցախում, բավականին բարդ իրադրություն է ստեղծել, բարդ է լուծումների առումով, բայց միևնույն ժամանակ շատ խնդրահարույց է, որ կառավարությունն իր համար անհրաժեշտ արձանագրումները չի արել և դրա հիման վրա հետագայում այդ խնդիրների հաղթահարմանը կամ որոշակի առումով թեթևացմանն ուղղված որևէ լուրջ քայլ այս պահին չունեն»,- արձանագրեց Տիգրան Աբրահամյանը։

Նրա խոսքով՝ կառավարության ներկայացուցիչները փորձել են վստահեցնել, որ ոչ միայն ռուսական կողմի հետ, այլև՝ այլ գործընկերների հետ աշխատում են, փոխանցում են իրավիճակը, ակնկալում են համապատասխան ճնշումներն Ադրբեջանի վրա՝ կանխելով այն գործողությունները, որոնք տեսանելի են։ Աբրահամյանի դիտարկմամբ՝ ունենք երկու իրավիճակ՝ բանեցնել դիվանագիտական ողջ ներուժը՝ հասնելու Ադրբեջանի զսպմանը, բայց ցանկացած կառավարություն պետք է ստեղծված իրավիճակի պայմաններում ունենա բոլոր ռիսկերի և սպառնալիքների վերլուծությունը, հասկանա, թե այս կամ այն իրավիճակում ինչպես պետք է գործի, որպեսզի Արցախում ստեղծված ճգնաժամը լինի հնարավորինս հաղթահարելի։

Աղբյուր` Փաստինֆո