Փաստ ինֆո

Քանի դեռ ՀՀ-ից Արցախ մտնող միակ գազատարի մի հատվածը ադրբեջանական վերահսկողության տակ է, Ադրբեջանը երբ ցանկանա ու ինչ ցանկանա այդ գազատարի հետ կանի։ Այս հանգամանքը, ըստ, «Արցախի ժողովրդական կուսակցություն» խմբակցության քարտուղար Գեղամ Ստեփանյանի, ոչ մեկի մոտ կասկած չի հարուցել․ ավելին՝ սպասելի էր։

«Ադրբեջանի ձեռք տակ ինչ հնարավորություն եղավ, կօգտագործի։ Ակնհայտ է, որ Ադրբեջանն այսօր առիթը բաց չի թողնում ռուսական խաղաղապահ զորախմբի դերակատարություն Արցախում նվազեցնելու համար։ Ստեղծված իրավիճակում Արցախի կոմունիկացիոն անվտանգությունը հնարավոր կլինի ապահովել համակարգային լուծմամբ, որին կարող ենք հասնել խաղաղապահ զորախմբի միջնորդությամբ։ «Փաստինֆո»-ի հետ զրույցում ասել է ԱԺԿ խմբակցության քարտուղար Գեղամ Ստեփանյանը։

Ըստ Արցախի Աժ պատգամավորի՝ եթե ազդող գործիքակազմ չմշակվի, ապա որքան ժամանակ Ադրբեջանը կոմունիկացիան վերահսկելու հնարավորություն ունեցավ, այնքան արցախահայութունը տնտեսական ու հոգեբանական խնդիրների է առերեսվելու։ Ամենաբարդ խնդիրն այս պահին, ինչպես Ստեփանյանն է ասում, հենց այդ համալիր լուծումը գտնելն է։

Ստեփանյանը վստահեցրեց՝ եթե Արցախում որևէ մեկն իմանար լուծումը, ապա այդ խնդիրն արդեն չէր լինի։

«Հիմա պետք է գտնել խնդրի լուծման կայուն, ամենաերաշխավորված տարբերակը, բայց մյուս կողմից էլ պետք է հաշվի առնել, որ երկարաժամկետ երաշխիքների մասին խոսելը բարդ է։ Այսօր աշխարհում տեղի ունեցող իրադարձությունները՝ մասնավորապես Ուկրաինայում տեղի ունեցողը, բացի քաղաքական հետևանքներից, նաև նոր մեսիջներ են պարունակում։ Կարծում եմ, որ Ուկրաինայում իրավիճակի հանգուցալուծումից հետո Ադրբեջանի այս քայլերը համարժեք պատասխան են ստանալու»,-նշել է Ստեփանյանը։

Այս հարցում հայկական քաղաքական դաշտի պասիվությունը, մեղմ ասած, անընդունելի է համարում արցախցի պատգամավորը։ Ստեփանյանը շեշտում է՝ Արցախի քաղաքական ուժերը, անկախ տարբեր հարցերի շուրջ ունեցած տարակարծություններին, անվտանգությանը վերաբերող հարցերում միասնական են։ «Կումունիկացիոն անվտանգությունը կարմիր գիծ է մեզ՝ արցախյան քաղաքական ուժերիս համար։ Նման հարցերը պետք է համահայկական քաղաքական օրակարգի թիվ մեկ հարցրերը լինեն, բայց, ցավոք, դա չի զգացվում»,-եզրափակել է Արցախի ԱԺ պատգամավոր Գեղամ Ստեփանյանը։

Աղբյուր` Փաստինֆո