Փաստ ինֆո

ԲԴԽ նախագահ (լիազորությունները կասեցված են) Ռուբեն Վարդազարյանի պաշտպանները պնդում են՝ դատավոր մանվել Շահվերդյանի նախագահությամբ դատարանը չի կարող համարվել օրենքով ստեղծված, խախտվել է գործերի բաշխման ընթացքում օրենքով սահմանված այբբենականը կարգը։ 

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Մանվել Շահվերդյանի նախագահությամբ, այսօր կայացել է Ռուբեն Վարդազարյանի գործով դատական նիստը, որի ընթացքում պաշտպանության կողմը բարձրացրեց դատավորին ինքնաբացարկի հարցը։

Ինքնաբացարկի միջնորդության հիմքում դրվել է գործերի մակագրման ընթացքում օրենքով սահմանված կարգի խախտումը։ Մասնավորապես, գործերը մակագրվել են ոչ թե էլեկտրոնային, այլ՝ դատարանի նախագահի կողմից, ինչը չի համապատասխանում օրենսդրական կարգավորումների պահանջներին և պաշտպանության կողմին հայտնի չէ տեղեկատվություն՝ անհաղթահարելի ուժի մասին, որի արդյունքում մակագրումը կլիներ դատարանի նախագահի կողմից, այս պարագայում՝ դա հիմնավորված և արդարացված չէ։

«Նման պայմաններում մեզ մոտ առկա է ողջամիտ կասկած առ այն, որ քրեական գործերի բաշխման էլեկտրոնային համակարգի աշխատանքի խափանումը պայմանավորված է եղել սույն և նմանատիպ այլ քրեական գործերի այլ կազմերով մակագրելու անհրաժեշտությամբ, ինչն անթույլատրելի է իրավական պետությունում»,- նշեց պաշտպան Հունան Բաբայանը։

Պաշտպան Երեմ Սարգսյանն էլ ներկայացրեց դատարանի նախագահին հասցեագրված դիմումի պատասխանը, որով ևս հաստատվել է, որ մակագրման ընթացքում այբբենական կարգը խախտվել է, գործերը դատարաններին են հանձնվել պարկերով, արկղերով, հետևաբար, հաջորդականությունը, որպես այդպիսին, չի արձանագրվել։

Մեղադրող դատախազ Աշոտ Ժամկոչյանն էլ առարկություններ ներկայացրեց միջնորդության վերաբերյալ՝ նշելով, որ ստեղծված է օբյեկտիվ իրավիճակ, որ համակարգչային տեխնիկայի միջոցով մակագրումն անհնարին է, ինքը գտնում է, որ դա անհաղթահարելի ուժ է։

Դատարանը լսելով կողմերին՝ հեռացել է խորհրդակցական սենյակ՝ որոշում կայացնելու, որը կհրապարակվի այսօր։

Հիշեցնենք, որ ՀՀ ԲԴԽ նախագահ Ռուբեն Վարդազարյանին ՀՔԾ-ում մեղադրանք է առաջադրվել՝ ՀՀ քրեական օրենսգրքի 332-րդ հոդվածի 3-րդ մասի՝ պաշտոնեական դիրքն օգտագործելով արդարադատության իրականացմանը խոչընդոտելու հատկանիշներով, նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։ Վարդազարյանի դեմ քրեական գործ է հարուցվել՝ առանց նրա անձեռնմխելիության հաղթահարման՝ նախկին դատավոր, ԱԱԾ տնօրենի նորանշանակ տեղակալ Անդրանիկ Սիմոնյանի հաղորդման հիման վրա։

Նրա դեմ հետապնդումներն սկսվել են 2020 թվականի նոյեմբերի 15-ի հայտարարությունից հետո, երբ դատավորներին կոչ արեց հավատարիմ մնալ ժողովրդի առջև տված երդմանը և զերծ մնալ բոլոր տեսակի քաղաքական ճնշումներից և ազդեցություններից։

Հեղինակ՝ Իզաբել Սահակյան

Աղբյուր` Փաստինֆո