Փաստ ինֆո

Արցախում այս օրերին հարաբերական անդորր է.պատգամավոր Արցախն արդեն ապահովված է գազով, կարող է որոշ հատվածներում տեխնիկական խնդիրներ լինեն, բայց, ընդհանուր առմամբ, գազի խնդիրը լուծված է: «Փաստինֆո»-ի հետ զրույցում ասաց Արցախի ԱԺ պատգամավոր Մետաքսե Հակոբյանը:

Այդուհանդերձ, ըստ նրա, մարդկանց մոտ անհանգստություն կա, որ Ադրբեջանը ցանկացած պահի կարող է Արցախը զրկել հոսանքից ու գազից. « Նման խնդիրներ մենք ունեցել ենք պատերազմից հետո, բայց արցախյան կողմն է լուծել՝ ռուս խաղաղապահների հետ, այս անգամ « Արցախգազ»-ը տեղյակ չէր՝ ինչ է կատարվում, իրենք որևէ ձևով մասնակցություն չեն ունեցել նորոգման աշխատանքներին, մարդկանց մոտ կասկածներ կան, որ եթե ադրբեջանական կողմն է վերանորոգել, կարող է այնպիսի կարգավորումներ է արել, որ այս վիճակին նորից կհասցնի»,-ասաց զրուցակիցը: Մետաքսե Հակոբյանի խոսքով՝ Արցախում հումանիտար ճգնաժամը դեռևս ամբողջությամբ չի լուծվել, եղանակի պատճառով Հայաստանի հետ կապող միակ ճանապարհն անանցանալի է, գնաճը սարսափելի է, այս ամենին էլ գումարած՝ անվտանգային մի շարք խնդիրներ:

Մեզ հետ զրույցում Մետաքսե Հակոբյանը հայտնեց, որ թեև Արցախի բնակչությունը երկար ժամանակ գազից զրկված լինելու հետևանքով շատ վնասներ է կրել, սակայն Արցախի կառավարությունը որևէ աջակցություն չի տրամադրել. «Իրենք լռում են, չեն էլ խոսում այդ մասին, երևի թե չեն էլ պատրաստվում որևէ փոխհատուցում տրամադրել, եթե տրամադրած լինեին, կհրապարակեին, իրենք այնպես չի որ օպերատիվ են, չհավատաք, որ օպերատիվ ինչ-որ քայլ ձեռնարկեն»,-ասաց նա:

Ինչ վերաբերում է սահմանային իրավիճակին՝ Մետաքսե Հակոբյանը նշեց, որ այս պահին հարաբերական անդորր է. «Մենք ամեն անգամ սպասում ենք նոր դեպքի, որ դա ևս հաղթահարենք, բայց հիմա հարաբերական լռություն է: Եղանակային պայմաններն անբարենպաստ են, իսկ քոչվոր ցեղը շատ շուտ է մրսում, իրենք մեզ պես դիմացկուն չեն, հենց տաքերն ընկնում է, նոր են ակտիվանում: Բարձրախոսով հնչեցվող սպառնալիքներին էլ այլևս ուշադրություն չեն դարձնում մերոնք, դրանց ի պատասխան հայրենասիրական երգեր են միացնում, պայքարի ձև են գտել»,-ասաց արցախցի պատգամավորը:

Աղբյուր` Փաստինֆո