Փաստ ինֆո

Ադրբեջանի վարչապետ Ալի Ասադովը հաստատել է Արցախի բռնազավթած տարածքներում շինությունների ժամանակավոր ռեեստրի կանոնադրությունը, որն, ըստ էության, սահմանում է ադրբեջանական օկուպացիայի մեջ գտնվող հայկական տարածքներում առկա շինությունների վերափոխման և նորերի կառուցման ընթացակարգը։ Այս մասին գրում են ադրբեջանական լրատվամիջոցները։

Համաձայն այդ ապօրինի որոշման՝ պետական մարմինը, որը նախատեսում է շինարարական աշխատանքներ իրականացնել ՝ այդ թվում ձևափոխել առկա շինությունները, դիմելու է գրանցող մարմնին, որպեսզի այնտեղ արտացոլվեն սպասվող փոփոխությունները՝ մասնավորապես՝ վերանորոգման, վերակառուցման պլանները։

Այս, այսպես կոչված, նախաձեռնությունը, ոչ պակաս վտանգավոր ու անդառնալի հետևանքներ կարող է ունենալ, որքան որ, այսպես կոչված, աշխատանքային խմբի ստեղծումը, որի նպատակն Արցախի մշակութային կոթողներից դրանց հայկականության մասին փաստող գրությունները վերացնելն է։

Հիշեցնենք նաև, որ Արցախի Ազգային ժողովն ընդունել է «Արցախի բռնազավթած տարածքների մասին» օրենքը, որով արգելվում է այդ տարածքներում իրականացնել տնտեսական ցանկացած գործունեություն, շինարարություն՝ ներառյալ լիցենզիա, թույլտվություն, գրանցում պահանջող գործունեություն, որը հակասում է Արցախի Հանրապետության օրենսդրությանը։ Այդ կարգի խախտումն առաջացնում է Արցախի Հանրապետության օրենսդրությամբ սահմանված պատասխանատվություն:

Բռնազավթված տարածքներում Արցախի Հանրապետության օրենսդրության խախտմամբ իրականացված տնտեսական ցանկացած գործունեության արդյունքում ստացված եկամուտները, գույքը և միջոցները, ինչպես նաև շինարարության արդյունքում կառուցված շինությունները հանդիսանում են անօրինական ճանապարհով ստացված և առաջացնում են Արցախի Հանրապետության օրենսդրությամբ սահմանված հետևանքներ:

Աղբյուր` Փաստինֆո