Փաստ ինֆո

«Հայաստանի այս իշխանությունները երբեք չեն թաքցրել իրենց արտաքին քաղաքական նախասիրությունները։ Սա ընդգծված արևմտամետ կառավարություն է, որը, սակայն, ստիպված է սերտ հարաբերություններ ունենալ Ռուսաստանի Դաշնության հետ։ Իրականում, սա բոլորովին էլ իրենց ընտրությունը չէ, այլ մեր տարածաշրջանում ստեղծված իրողությունների պարտադրանք» - «Փաստինֆո»-ի հետ զրույցում ասում է քաղաքագետ Հրանտ Մելիք - Շահնազարյանը՝ խոսելով ՀՀ իշխանությունների՝ հատկապես վերջին շրջանում ընդգծված արևմտամետ քաղաքականության մասին։

Վերջինս նկատում է՝ Ռուսաստանի Դաշնությունը հայկական պետությունների անվտանգային ամենակարևոր գործընկերն է. «Ուստի, կարծում եմ, որքան էլ Փաշինյանն ու իր թիմակիցները օգտվեն դեպի Արևմուտք վազելու բոլոր հնարավորություններից, այնուամենայնիվ, նրանք ստիպված են լինելու աչքի ծայրով հետևել Ռուսաստանից ստացվող արձագանքներին։ Ի դեպ, չեմ բացառում, որ հատկապես, վերջին օրերին տեղի ունեցող ինտենսիվ հեռախոսազրույցների մի մասն էլ այս իշխանությունը հենց Ռուսաստանի թելադրանքով է անում։ Ի վերջո, եկեք չմոռանանք, որ Ուկրաինայում ռազմական հատուկ գործողության պատճառով Ռուսաստանը արևմտյան ծավալուն պատժամիջոցների է արժանացել և հիմա նրանց դեպի համաշխարհային շուկաներ՝ հատկապես ֆինանսական, ելքեր են անհրաժեշտ։ Հայաստանը կարող է այդպիսի պատուհան լինել Ռուսաստանի համար»։

Հիշեցնենք, որ ռուս - ուկրաինական պատերազմի ֆոնին՝ հատկապես վերջին օրերին ՀՀ -ում վարչապետ աշխատող անձը հետևողական հեռախոսազրույցներ է ունենում հավաքական Արևմուտքի ներկայացուցիչներ հետ, այդ թվում՝ Կանադայի ղեկավար (ՌԴ-ում մուտքն արգելված) Ջաստին Թրյուդոյի, Հարավային Կովկասի ու Վրաստանի ճգնաժամի հարցերով Եվրոպական միության հատուկ ներկայացուցիչ Տոյվո Կլաարիի, ՀՀ-ում ԵՄ պատվիրակության ղեկավար, դեսպան Անդրեա Վիկտորիի, Ամերիկայի Միացյալ Նահանգների պետքարտուղար Էնթոնի Բլինքենի հետ։

Ինչպես հայտնում են պաշտոնական աղբյուրները՝ հեռախոսազրույցների ընթացքում ակտիվորեն քննարկվում են հայ – ադրբեջանական հաշտեցման օրակարգին առնչվող հարցեր, ինչպես նաև՝ սահմանազատման թեման։

Հարցին՝ կարո՞ղ են արդյոք Արևմուտքի հետ այսօրինակ խաղերը հանրային դժգոհության, բողոքների կամ փողոցային պայքարի առիթ հանդիսանալ, Հրանտ Մելիք – Շահնազարյանը պատասխանում է՝ մեր հանրությունն այսօր, ցավոք, չափազանց իներտ վիճակում է գտնվում.

«Սա, իհարկե, շատ պատճառներ ունի՝ պարտված պատերազմ, հազարավոր կորսված կյանքեր, հանձնված տարածքներ, հիասթափություն և այլն։ Եթե, նույնիսկ, այս ամենի հետ կապված հանրային դժգոհություն կա, ապա այդ դժգոհությունը մարդիկ, հիմնականում, իրենց ներսում են պահում։ Նրանք չեն վստահում ո՛չ իշխանություններին, ո՛չ ընդդիմությանը։ Հանրությունը քաղաքական խնդիրներ չի դնում իր էլիտաների առջև, վերջիններս էլ, օգտվելով այդ հանգամանքից, նախընտրում են ոչինչ չանել։ Սա, անկասկած, մեծ խնդիր է ազգի, միաժամանակ մեծ բոնուս՝ դավաճան իշխանությունների համար։ Հետևաբար, մինչեւ այս վիճակը չփոխվի, մինչեւ էլիտաները չգիտակցեն հայրենիքի ու պետության հանդեպ իրենց պատասխանատվության աստիճանը, իրական փողոցային պայքար մենք չենք տեսնելու»։

Աղբյուր` Փաստինֆո