Փաստ ինֆո

Իշխող «Քաղաքացիական պայմանագիր» խմբակցությունը Թալինում նոր ընտրություններ անցկացնելու մտադրություն ունի:

Ընդդիմությունը պնդում է, որ ՔՊ-ին դուր չի գալիս այն փաստը, որ մանդատների առումով ընդդիմությունն առավելություն ունի Թալինում և կարողանում է ազդել քաղաքական գործընթացների վրա, ուստի այսկերպ ՔՊ-ն փորձում է Թալինում ամբողջովին յուրացնել իշխանությունը և «քանդել» ընդդիմությունը:

«Փաստինֆո»-ի հետ զրույցում ընդդիմադիր «Զարթոնք» կուսակցության քարտուղար Անդրանիկ Մարգարյանը, անդրադարձավ մամուլում շրջանառվող տեղեկություններին, որ Թալինում նոր ընտրություններ են սպասվում և նշեց, որ ընդդիմությունը նոր ընտրություններ անցկացնելու հարց այս պահին չի քննարկում. «դրանք իշխանության կողմից շրջանառվող խոսակցություններ են»։

«Չգիտեմ, ի՞նչ է տալու իրենց նոր ընտրությունները, լավագույն դեպքում՝ ձևավորված կոալիցիոն ընդդիմությունը քանդեն, նվազագույնը սա կարող են անել»,-ասաց Անդրանիկ Մարգարյանը:

Նրա արձանագրմամբ՝ Թալինում ստեղծվել է մի իրավիճակ, որ թեև ավագանու առաջին նիստի արդյունքներով համայնքի ղեկավար է ընտրվել ՔՊ-ի թեկնածուն, սակայն մանդատների մեծամասնությունը ընդդիմությանն է, հետևաբար, ընդդիմությունը մեծ ազդեցություն ունի այնտեղ տեղի ունեցող քաղաքական գործընթացների վրա, ինչը դուր չի գալիս իշխանությանը.

«Ձայների բաշխվածության արդյունքում կոալիցիա կազմած ուժերի ընդհանուր մանդատները 11-ն են, իսկ ՔՊ-ինը՝ 10-ը, այսինքն՝ ընդդիմությունը մանդատների առումով առավելություն ունի, բայց քանի որ իշխանությունները կառչած են իրենց աթոռներից, փորձում են Թալինում իշխանություն զավթել,այս տրամաբանությունից ելնելով՝ գուցե նաև ձեռք կտա նոր ընտրությունները»,-ասաց

Հիշեցնենք, որ Թալինում կայացած ՏԻՄ ընտրությունների արդյունքում ՔՊ-ն ստացել էր 46.6 տոկոս ձայն, իսկ ընդդիմադիր «Զարթոնք», «Հայք» և «Մեր համայնքը» չնայած քիչ ձայներ էին հավաքել, սակայն կոալիցիա ձևավորեցին և ավագանիում մեծամասնություն դարձան։ Նշենք, որ քվեարկության արդյունքում ավագանին Թալինի համայնքապետ էր ընտրել ՔՊ-ի թեկնածու Տավրոս Սափեյանը, նրան կողմ էր քվեարկել ավագանու 11 անդամ, ՔՊ-ի թեկնածուին կողմ էր քվեարկել ընդդիմության համայնքապետի նախկին թեկնածու Կարեն Գրիգորյանը, որն ընտրություններին մասնակցել էր «Հայք» կուսակցության ընտրական ցուցակով։

«Փաստինֆո»-ի հետ զրույցում ընդդիմադիր «Զարթոնք» կուսակցության քարտուղարը պնդեց, թեև ՔՊ-ի թեկնածու Տավրոս Սափեյանը ճնշումների միջոցով ընտրվել է համայնքի ղեկավար, բայց օրինական ղեկավար չի կարող համարվել, քանի որ անգամ երդման արարողությունը չի կայացել, ավագանու նիստեր էլ չեն գումարվում.

«Իշխանությունները ամեն կերպ փորձում են Թալինում իշխանությունն իրենց ձեռքին պահել, հաշվի չեն նստում համայնքի բնակիչների շահերի հետ, այս ամբողջ ընթացքում Թալինը պահում են անիշխանության մեջ, չեն թույլ տալիս, որ ժողովրդի կողմից ձայների մեծամասնություն ստացած ուժերը միասնաբար կոալիցիոն կառավարման համակարգ ձևավորեն»,-եզրափակեց Անդրանիկ Գրիգորյանը:

Աղբյուր` Փաստինֆո