Փաստ ինֆո

Եկել ենք Արաբաթին հիշեցնելու, ասելու, որ ինքը որևէ բարոյական իրավունք չունի խոսելու հայ ժողովրդի, հայ հասարակության անունից։ Այս մասին լրագրողների հետ զրույցում ասաց ՀՀԿ անդամ Լևոն Նազարյանը։ 

Հիշեցնենք, որ ԱԳՆ շենքի դիմաց բողոքի ակցիա է իրականացվում՝ ԱԳՆ նախարար Արարատ Միրզոյանին հիշեցնելով, որ ինքը չի ներկայացնում հայ ժողովրդի իրական շահերը։

Լրագրողների հետ զրույցում Նազարյանը նշեց, որ Հայաստանի անկախության հռչակագիրը Հայաստանի հիմնարար փաստաթղթերից մեկն է, որտեղ 11-րդ կտում հստակ նշված է, որ ՀՀ-ն անկախություն ստանալուց ի վեր հետամուտ է լինելու Հայոց ցեղասպանության միջազգային ճանաչմանը։

Նազարյանի խոսքով՝ մի քանի օր առաջ վարչապետի պաշտոնը զբաղեցնող անձը հայտարարեց, որ Հայոց ցեղասպանության ճանաչման արշավը Սփյուռքի բեռն է, իրենք դրա հետ կապ չունեն:

«Հասկանալի է դառնում, որ ուզում են ձեռքները լվանալ եւ դրանով իսկ արդեն թուրքական առաջին նախապայմանը տեղի է ունեցել»,- նշեց նա։

Նրա խոսքով՝ մարտի 10-12-ին Թուրքիայում դիվանագիտական ֆորումին գնացել էին՝ ի՞նչ անեին: «Արաբաթը գնացել էր իմանար, թե Մևլութը թեյ խմելուց շաքարը կծում է, թե լեզվի տակ է դնում, այն պարագայում, երբ Թուրքիան ասում է՝ գնացեք, Ադրբեջանի հետ ձեր հարաբերությունները կարգավորեք, եւ թե մեզ, թե Ադրբեջանի հետ այդ կարգավորման մեջ երրորդ կողմեր չպետք է լինեն: Միջազգային հանրությանը նկատի ունեն, եւ իրենց պետք էհիշեցնենք, որ Արցախի հակամարտության կարգավորման հարցում Մինսկի խմբի համանախագահության ֆորմատը դեռ գործում է: Այս տեսանկյունից ՄԽ համանախագահ երկրները չեն կարող կարգավորման փաթեթներ առաջարկել հայ-ադրբեջանական գործընթացում, եւ մենք տեսնում ենք, որ այս իշխանությունները Արցախը հանձնում են Ադրբեջանին»,- ընդգծեց Նազարյանը՝ հավելելով, որ արդեն ԱԺ-ից, կառավարությունից կարծիքներ են հնչում, որ այո, ինչու ոչ, կարող են դիտարկել Արցախն Ադրբեջանի կազմում, հաջորդ քայլը լինելու է Թուրքիայի հետ հարաբերությունների կարգավորումը, որից հետո ռուսական ռազմաբազան կարող է ՀՀ-ում չլինել, որովհետեւ Թուրքիայի հետ կարգավորված հարաբերություններ ունենք և դրա ավարտը կլինի այն, որ մենք կդառնանք թուրքերի նոքյարը։

Աղբյուր` Փաստինֆո