Փաստ ինֆո

Կառավարությունն այսօրվա նիստում հավանություն տվեց «ՀՀ բյուջետային համակարգի մասին», «Տեղական ինքնակառավարման մասին», «Երևան քաղաքում տեղական ինքնակառավարման մասին» օրենքներում փոփոխությունների նախագծին:

Նախագիծը կառավարության նիստին ներկայացրեց ՏԿԵ նախարար Գնել Սանոսյանը և նշեց, որ նախագծի նպատակը համայնքի համար միջնաժամկետ ծախսերի ծրագրերի կազմման գործընթացի օրենսդրական կարգավորումն է, որը հնարավորություն կստեղծի կառավարել համայնքի

ֆինանսական միջոցները, ինչն էլ էլ հիմք կհանդիսանա համայնքի բյուջեի նախագծի մշակման համար.
«Օրենսդրական փոփոխությամբ նախատեսվում է, որ համայնքի ավագանին մինչև այս տարվա հոկտեմբերի 10-ը հաստատի համայնքի միջնաժամկետ ծախսերի ծրագիրը՝ առաջիկա 3 տարիների համար և ներկայացնի մարզպետին»,-ասաց Սանոսյանը:

Նիկոլ Փաշինյանն էլ ասաց, թե սա կար ևոր որոշում է. «Հանրային ֆինանսների արդյունավետ կառավարումը ամենամեծ մարտահրավերներից մեկն է ցանկացած երկրում, առավել ևս՝ մեզ մոտ: Մենք այս որոշումը կարևոր ենք համարում այն տրամաբանությամբ, որ կառավարություն-ՏԻՄ համագործակցության և համատեղ ներդրումների որոշակի համակարգ է ստեղծվել, այս առումով կարևոր է, որ ՏԻՄ-երի ֆինանսների կառավարման տրամաբանությունը հնարավորինս սինքրոնացնենք կառավարության հետ»,- ասաց Փաշինյանը:

Էկոնոմիկայի նախարար Վահան Քերոբյանն էլ իր հերթին հայտարարեց, որ սա խոշոչ ռեֆորմ է.

«Երբեմն մեզ ասում են, որ մենք ռեֆորմներ չենք անում, բայց սա շատ մեծ ռեֆորմ է, սրա արդյունքում հանրային ներդրումների արդյունավետությունը կբարձրացնենք»,-ասաց Քերոբյանը:

Քերոբյանին արձագանքեց Նիկոլ Փաշինյանը.

«Էդ ո՞վ ա ասում, որ մենք ռեֆորմներ չենք անում: Այսօրվա մեր նիստի երկու թեմաները ամենախոշոր երկու ռեֆորմների մասին են: Ես ուզում եմ հիշեցնել, որ երեկվանից ուժի մեջ է մտել հանրային սննդի օբյեկտներում ծխելու արգելքի վերաբերյալ որոշումը, որը կարևորագույն ռեֆորմ է: Այս բոլոր ռեֆորմները չունեն մեկ ուղղություն: Դրանք և՛ քաղաքակրթական են, և՛ առողջապահական են, և՛ կառավարչական են: Սա շատ կարևոր ուղղություն է, հույս ունեմ, որ մենք այս ճանապարհը կշարունակենք», - ասաց Նիկոլ Փաշինյանը:

Աղբյուր` Փաստինֆո