Փաստ ինֆո

ՀՀ գլխավոր դատախազությունը վերահաստատում է՝ դատական գործերի մակագրման էլեկտրոնային համակարգի բանալիները տրվել են Դատական դեպարտամենտին։ ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը ֆեյսբուքյան իր էջում հրապարակել է փաստաթուղթը՝ վերահաստատելով, որ համակարգի բանալիները փոխանցվել են Դատական դեպարտամենտին։

Ինչպես արդեն տեղեկացրել ենք՝ այսօր առավոտյան ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը ֆեյսբուքյան իր էջում հայտնել է, որ ՀՀ դատախազությունն անհրաժեշտ միջոցներ է ձեռնարկել քննությանն անհրաժեշտ տվյալները հնարավորինս սեղմ ժամկետում ստանալու և համակարգի գործարկման խոչընդոտները բացառելու ուղղությամբ։

«Մասնավորապես, քրեական գործով նշանակված փորձաքննությունը կատարող փորձագետի կողմից արդեն իսկ ուսումնասիրվել են հետազոտման ենթակա օբյեկտները, և համակարգի վերագործարկումն ու շահագործումը չի կարող բացասաբար անդրադառնալ փորձաքննության օբյեկտիվության և լիարժեքության վրա։ Հետևաբար քրեական գործով առգրավված՝ համակարգի գործարկման և շահագործման առգրավված բանալիները վերադարձվել են, և ՀՀ դատական դեպարտամենտի ղեկավարին հայտնվել է, որ մակագրման համակարգը կարող է վերագործարկվել»,- ֆեյսբուքյան իր էջում գրել է Աբրահամյանը։

Դատախազի խորհրդականի գրառմանն արձագանքել է Դատական դեպարտամենտը՝ պնդելով, թե բանալիները չեն վերադարձվել։

«Այսօր՝ մարտի 17-ին ՀՀ գլխավոր դատախազի խորհրդական՝ Գոռ Աբրահամյանը ֆեյսբուքի իր պաշտոնական էջում տեղադրել է հետևյալը. որ «…քրեական գործով առգրավված՝ համակարգի գործարկման և շահագործման առգրավված բանալիները վերադարձվել են, և ՀՀ դատական դեպարտամենտի ղեկավարին հայտնվել է, որ մակագրման համակարգը կարող է վերագործարկվել » մինչդեռ համակարգի գործարկման և շահագործման առգրավված բանալիները Դատական դեպարտամենտ չեն վերադարձվել»,- նշված է դատական դեպարտամենտի տարածած հաղորդագրությունում։

Դեպարտամենտի կողմից հերքում տարածելուց հետո Աբրահամյանը ֆեյսբուքյան իր էջում հրապարակել է փաստաթուղթը, համաձայն որի՝ 2022թ մարտի 16-ին քրեական գործով մինչդատական վարույթի օրինականության նկատմամբ հսկողություն իրականացնող դատախազի կողմից գրություն է հասցեագրվել «Փորձաքննությունների ազգային բյուրո» ՊՈԱԿ-ի դատահամակարգչատեխնիկական փորձաքննությունների բաժնի պետին՝ ծրագրային ապահովման սերվերներն ուսումնասիրած լինելու պայմաններում այն վերագործարկելու հնարավորության վերաբերյալ։

«Հիմք ընդունելով վերոգրյալը՝ տեղեկացնում եմ, որ «Դատական համակարգ» ծրագրային ապահովումը կարող է վերագործարկվել և շահագործվել, ինչը չի կարող բացասական ազդեցություն ունենալ քրեական գործով վարույթի ընթացքի վրա»մ- նշված է դատական դեպարտամետի ղեկավար Արմեն Հարությունյանին հասցեագրված գրությունում։

Հիշեցնենք, որ շուրջ 9 ամիս շարունակ ԱԱԾ-ում քննվող քրեական գործի շրջանակներում Երևանի ընդհանուր իրավասության դատարանում, Վերաքննիչ քրեական և քաղաքացիական, ինչպես նաև՝ Սնանկության և Վարչական դատարաններում գործերի բաշխման էլեկտրոնային համակարգն առգրավվել է, ինչից հետո գործերը մակագրվում են դատարանների նախագահների կողմից՝ «ձեռքով»։ Նման եղանակով գործերի մակագրումը մտահոգություններ է առաջացրել մասնագիտական հանրությունում, փաստաբանական համայնքն արդեն իսկ ահազանգել է, որ քաղաքականապես զգայուն մի շարք գործերով դատարանների նախագահները գործերը մակագրում են, այսպես կոչված, իշխանությունների «սրտի» դատավորներին։

Աղբյուր` Փաստինֆո