Փաստ ինֆո

«Հարցը գերլուրջ է։ Անձամբ ես, այդ մասին որևէ տեսակի պաշտոնական ինֆորմացիա, այս պահի դրությամբ, չունեմ, հետևաբար խնդրին կանդրադառնամ այլ տեսանկյունից։ Ռուս խաղաղապահների և, առհասարակ, ռուսական գործոնի՝ տարածաշրջանից դուրս մղումը հանդիսանում է թուրք – ադրբեջանական տանդեմի հիմնական կոնցեպտներից մեկը՝ եթե ոչ այս պահի ամենագլխավորը,- «Փաստինֆո»-ի հետ զրույցում ասում է ԲՀԿ քաղխորհրդի անդամ Արման Աբովյանը։

Նշենք, որ այսօր տեղեկություններ տարածվեցին այն մասին, թե Նիկոլ Փաշինյանի՝ մարտի 8-ին Փարիզ կատարած աշխատանքային այցի ընթացքում, երկու պետությունների ղեկավարները քննարկել են նաև Լեռնային Ղարաբաղի շուրջ ստեղծված իրավիճակը: Իշխանական աղբյուրների փոխանցմամբ, փակ հանդիպման ընթացքում, Փաշինյանն ու Մակրոնը քննարկել են Արցախից ռուս խաղաղապահների դուրս բերման հարցը։ Ըստ աղբյուրների, առաջարկը հնչել է Ֆրանսիայի նախագահ Մակրոնի կողմից։ Փաշինյանը խոստացել է մտածել այդ ուղղությամբ և անհրաժեշտության դեպքում՝ կրկին քննարկել հարցը։

Հարցին՝ արդյո՞ք հավաքական Արևմուտքի՝ Հարավային Կովկասում հիմնական շահերի ջատագով հանդիսացող Թուրքիան չէ՞ր կարող Ֆրանսիայի Հանրապետության միջնորդությամբ նմանօրինակ ծուղակ լարել Հայաստանի դեմ, Արման Աբովյանը պատասխանում է՝ իհարկե, Թուրքիան ձեռնարկելու է հնարավոր և անհնարին բոլոր քայլերն, այս տարածաշրջանից դուրս մղելու համար ռուսական գործոնը.«Հենց այստեղ է, որ մենք, այլևս, պետք է դուրս գանք ռուսամետություն, արևմտամետություն և նմանօրինակ կաղապարներից ու հստակ հասկանանք, թե ո՞րն է մեր երկրի և հայ ժողովրդի շահը։ Առավել քան վստահ եմ, որ ռուսական գործոնի դուրսմղումը Հարավային Կովկասից, բոլորովին չի բխում հայ ժողովրդի և մեր պետության շահերից։ Հակառակ պարագայում, մի գեղեցիկ օր, մենք ուղղակի, կարձանագրենք, որ տարածաշրջանն անցել է Թուրքիայի տիրապետության տակ։ Ինչ խոսք, սա, իհարկե, հավաքական Արևմուտքի և, մասնավորապես, Թուրքիայի հիվանդագին ձգտումն է։

Հետևաբար, ով կհամաձայնի այսօրինակ գործարքին կամ հույսեր կփայփայի, թե Հայաստանը կարող է գնալ նման քայլի, այսինքն՝ դառնալ Թուրքիայի վիլայեթը Հարավային Կովկասում, այլ բան չէ, քան պետական դավաճանը»,- ամփոփելով զրույցն, ասում է Արման Աբովյանը։

Աղբյուր` Փաստինֆո