Փաստ ինֆո

Գեղարքունիքի մարզի Վարդենիս համայնքի ավագանին այսօր՝ մարտի 16-ին, արտահերթ նիստ է գումարել, օրակարգում համայնքի ղեկավարի ընտրության հարցն է: Արտահերթ նիստը հրավիրվել է ընդդիմադիր «Ահարոն Խաչատրյան» և «Միասնական Վարդենիս» խմբակցությունների անդամների նախաձեռնությամբ: Նշենք, որ համայնապետի պաշտոնում առաջադրվել է երկու թեկնածու՝ ՔՊ-ի թեկնածուն նախկին համայնքապետ Արամ Մելքոնյանն է, իսկ ընդդիմությունն առաջադրել է մեկ միասանական թեկնածու՝ Ահարոն Խաչատրյանին:

Հիշեցնենք, որ դեկտեմբերի 5-ի ՏԻՄ ընտրություններից մինչ օրս Վարդենիսը համայնքապետ չունի:

Ճիշտ է՝ ընդդիմությունն այստեղ ունի մեծամասնություն. «Քաղաքացիական պայմանագիր»-ը ստացել էր 13 մանդատ, «Ահարոն Խաչատրյան» դաշինքը՝ 10, «Միասնական Վարդենիս»-ը՝ 4 մանդատ։ Ընդդիմադիր ուժերն ընտրություններից հետո կոալիցիա կազմելու հուշագիր էին ստորագրել, եւ մանդատների քանակն արդեն բավարարում էր համայնքապետ ընտրելու համար, սակայն ՔՊ-ն տապալում է համայնքի կառավարումը։

Վարդենիսի ավագանու դեկտեմբերի 30-ի նիստում ընդդիմադիր «Ահարոն Խաչատրյան» և «Միասնական Վարդենիս» խմբակցությունները համայնքապետ էին ընտրել Ահարոն Խաչատրյանին, իսկ ՔՊ-ն շտապեց դիմել դատարան՝ պահանջելով չեղյալ համարել ավագանու անդրանիկ նիստը, որի ժամանակ համայնքապետ էր ընտրվել ընդդիմության թեկնածուն: Դատարանը մասնակի բավարարել էր ՔՊ-ի հայցը՝ անվավեր ճանաչելով Վարդենիս համայնքի ղեկավար ընտրելու որոշումը, իսկ ընտրությունների արդյունքները թողել անփոփոխ։

Աղբյուր` Փաստինֆո