Փաստ ինֆո

«Քանի դեռ սրանցից չենք ազատվել, արաբատ միրզոյաններն ի՜նչ ասես կարող են անել՝ խոսել մեր անունից թուրքերի հետ հաշտվելու, նրանց սիրելու, նրանցից պարտք ու պահանջ չունենալու հեքիաթների մասին և այլն։ Հետևաբար, ես այլևս անիմաստ եմ համարում՝ քննարկել, թե ի՞նչ ասաց այս կամ այն արաբատը։ Խնդիրը հիմա մեկն է ու հստակ՝ ինչպե՞ս ազատվել սրանցից և հնարավորինս արագ։ Ինձ համար, այսքանից հետո, արդեն, բացառապես, բոլոր մեթոդներն ընդունելի են։ Ազատագրական պայքար է պետք»-«Փաստինֆո»-ի հետ զրույցում ասել է Արևմտահայոց հարցերի ուսումնասիրության կենտրոնի տնօրեն, հայագետ Հայկազուն Ալվրցյանը՝ նշելով, որ եթե ունենար դրա հնարավորությունը, ապա անձամբ զինված ապստամբություն կկազմակերպեր։

«Բայց, քանի որ ես մտավորական մարդ եմ՝ չունեմ ո՛չ ռազմական, ո՛չ զինված ուժ, չունեմ նաև դավադրական կառույցներ, այդ ճանապարհով հարցին լուծում տալ անձամբ չեմ կարող»,- արձանագրել է մեր զրուցակիցը։

Ըստ նրա՝ այս արտգործնախարարը հայերի անունից խոսելու իրավունք չունի, նախ, որովհետև նշանակովի պաշտոն է զբաղեցնում, հետևաբար կարող է խոսել միայն պետության անունից։ Իսկ, եթե նրանք խոսում են ինչ - որ թվերի մասին, որոնց շնորհիվ իրենք իշխանության են եկել և հիմա, դա ներկայացնում են որպես լեգիտիմության ցուցիչ, ապա, նույնիսկ, այդ մարդիկ ոչ թե իրենց են ձայն տվել, այլ իրենց կուսակցությանը.«Երբ սրանք մուրճը ձեռքերին քարոզարշավ էին իրականացնում ողջ Հայաստանով մեկ, չէին իրազեկում մարդկանց, այսինքն՝ իրենց ընտրողներին, որ իշխանության գալուց հետո, հաշտվելու են թուրքերի հետ, ուրանալու են Ցեղասպանության միջազգային ճանաչումն ու պահանջատիրությունը և այլն։ Նման հարցերը, սովորաբար, հանրաքվեի միջոցով են լուծվում, ոչ թե թաքուն Թուրքիա վազելով, անատոլիաներում կորած հորեղբորը գտածի դեմքով, այսպես ասած, բանակցություններ վարելով, որի իրական բովանդակության մասին մեր երկրում՝ իրենց իսկ ընտրողները ոչինչ չեն իմանում։ Այնտեղ իրենց տեր են, անգամ, հարկ չհամարեցին ճիշտ գրել դրա անունը և դա արվեց հատուկ, դիտմամբ, որովհետև թուրքերն, ուղղակի, չէին կարող գրել Արարատ անունը։ Փոխարենը, տեսնում ենք որբի դեմքով՝ լայն ժպիտով մեկին, ով, վերջապես, գտել էր իր տիրոջը»,- պատկերավոր նկարագրում է հայագետը։

Մեկնաբանելով ԱԳ նախարարի վերջին աղմկահարույց հայտարարությունը, թե, իբր, Հայաստանի բնակչությունն, ընդհանուր առմամբ ցանկանում են Թուրքիայի հետ կարգավորել հարաբերությունները՝ պարոն Ալվրցյանը նկատել է՝ սրանք մարդիկ են, ովքեր ընդունակ են, բառացիորեն, ամեն ինչի.«Սրանք հազարավոր երիտասարդ զինվորների կյանքը տվեցին թուրքի երախը, սրանք վաճառքի են հանել Հայրենիքը, խաբում, թալանում, ստորացնում , դավաճանում ու խոշտանգում են իրենց իսկ ձայն տվողներին։ Սրանք որևէ սրբություն չունեն, այլ կերպ ասած՝ սատանայի սպասավորներ են, որ իշխանությունը զավթել են թուրք – ադրբեջանական, իսրայելական, անգլո – սաքսոնական ուժերի կողմից և ամեն ինչ անելու են՝ մինչև վերջ սպասարկելու իրենց իշխանության բերած այդ ուժերի շահերը։ Իսկ ի՞նչ են ուզում այդ ուժերը մեր երկրից՝ վերացնել տարածաշրջանում հայկական ուժի գործոն լինելու հանգամանքը, ամբողջությամբ հանձնել Արցախն ու հայաթափել Հայաստանը։ Այդ ուժերի կողմից տասնյակ տարիներով պատրաստված այս կադրերին միայն փող տուր և նրանք կանեն այն ամենը, ինչ պետք է իրենց տերերին։ Եվ պետք չէ զարմանալ, որ Արաբատ Միրզոյանը լայն ժպտում է՝ նույնիսկ այն պարագայում, երբ թուրքերը միտումնավոր կերպով խեղաթյուրում են իր անունը և նվաստացնում իրեն ամբողջ աշխարհով մեկ»։

Ամփոփելով զրույցը, Հայկազուն Ալվրցյանը վստահություն է հայտնում ՝ չնայած Թուրքիայում տարիներ շարունակ լավ պատրաստված գործակալների, այդ թվում նաև Արաբատ Միրզոյանի թափած ջանքերին, մենք չենք հաշտվելու մեզ ցեղասպանած և կրկին ցեղասպանել փորձող թուրքի հետ։ Խնդիրն այլ է՝ թուրքին պետք է հաղթել.«Այս պահի դրությամբ, մեր ամենավտանգավոր թշնամին ներքին թուրքն է՝ իր քաղաքական առաջնորդի գլխավորությամբ, որ ազգի պետական շահը տանում է թուրք թաթարական, իսրայելական, անգլո – սաքսոնական երախը։ Հետևաբար, վերադառնալով մեր զրույցի սկզբին, մեկ անգամ ևս կրկնեմ ու հաստատեմ՝ քանի դեռ մենք սրանցից չենք ազատագրել մեր ազգը, մենք չենք կարող հաղթել դրսի թուրքին»։

Հիշեցնենք, որ Անթալիայի դիվանագիտական ֆորումի շրջանակներում ՀՀ ԱԳ նախարար Արարատ Միրզոյանը հարցազրույց էր տվել «Անադոլու» գործակալությանը, որտեղ, խոսելով հայ – թուրքական հաշտեցման ծրագրի մասին, մասնավորապես նշել էր.«Ընդհանուր առմամբ, Հայաստանի բնակչությունը ցանկանում է կարգավորել հարաբերությունները Թուրքիայի հետ։ Դա արտացոլված է նաև հասարակական կարծիքի վերաբերյալ հարցումներում։ Իհարկե, և՛ հայկական, և՛ թուրքական հասարակություններում կան խմբեր, որոնք, այսպես ասեմ, թերահավատորեն են վերաբերվում այս գործընթացին»։

Հայաստանում, սակայն, Արարատ Միրզոյանի այս խոսքերը բուռն քննարկման և դժգոհության մեծ ալիք է բարձրացրել հասարակության լայն շրջանակների կողմից, ովքեր քննադատում և անընդունելի են համարում ԱԳՆ ղեկավարի հայտնած տեսակետը։ Անգամ IRI վերջին հարցումների համաձայն՝ հայ հասարակության 68-90%-ը Թուրքիան համարում է սպառնալիք (ըստ ոլորտի՝ տնտեսական, քաղաքական, անվտանգային) եւ միայն 5%-ն է համարում, որ անհրաժեշտ է առաջնահերթ հենց այդ երկրի հետ բարելավել հարաբերությունները։

Աղբյուր` Փաստինֆո