Փաստ ինֆո

Այս իշխանություններին այլընտրանք ով էլ լինի, այս իշխանություններից վատ չի լինի։ Ոչ մի բան չեն անում՝ սկսած հայրենիքը պաշտպանելուց, վերջացրած՝ փոքր հարցերով։ Այս մասին Կառավարության շենքի դիմաց՝ պատերազմի հետևանքով տեղահանված արցախցիների բողոքի ակցիայի ընթացքում ասաց «Հանուն Հադրութի» ՀԿ ղեկավար Լևոն Հայրիյանը։

Հայրիյանը հիշեցրեց, որ հունվարի համար տեղահանված արցախցիներին խոստացել են 20.000-ական դրամներ. « Այդ 20.000 դրամներից որևէ մեկը ստացե՞լ է։ Հունվարի համար էին խոստացել էին, հիմա՝ մարտ է։ Չնչին հարցը, որը չի կարողանում լուծել այս կառավարությունը, ինչպե՞ս պետք է լուծի հայրենիքի պաշտպանության հարցը»։

Հայրիյանը նշեց, որ, թեև կոչ էր արել, որ Արցախի տեղահանված փախստական ժողովրդին միանա նաև հայ ժողովրդի այլ զավակներ, բայց հայ ժողովուրդն այս իշխանությունների անալոգով քնած է,

«Ալպիական մանուշակ»-ի քնած բզեզի նման քնած է հայ ժողովուրդը, չի լինելու այդպես։

«Մտածում ենք՝ Հադրութը, Շուշին վերցրել են, մի քիչ էլ կվերցնեն՝ կհանգստանան։ Լա՛վ իմացեք, թուրքերի նշանառության հիմնական թիրախը Երևանն է։ Թուրքերը, որպեսզի, իրենց կեղտոտ պետության գոյությունը պահեն, պետք է հայկական հարցը հանեն օրակարգից։ Դրա համար պետք է մտնեն Երևան։ Սա չի տեսնում միայն Հայաստանի իշխանությունը, ամբողջ աշխարհի համար պարզ երևում է»,- նշեց Հայրիյանը՝ ընդգծելով, որ թուրք հրոսակների նշանառության հիմնական թիրախը Երևանն է, պետք չէ քնել։

«100 տարի առաջ թուրքերին կանգնեցրինք Սարդարապատում։ Հայ ժողովուրդը պետք է հասկանա, որ այսօր Սարդարապատը Ստեփանակերտում է, պետք է հասկանա, որ թուրքը Ստեփանակերտում չի կանգնելու։ Եթե հայ ժողովուրդը որոշել է չապրել, իր գործն է։ Այս իշխանությունը ոչինչ չի անում, չի հասկանում նույնիսկ, որ պետք է ամաչի»,- նշեց Հայրիյանը, ինչից հետո Կառավարության շենքի դիմաց հավաքված բողոքի ակցիայի մասնակիցները դիմեցին կառավարությանը՝ «ամոթ» վանկարկումներով. «Ազգ եք սպանում, ամո՛թ ձեզ, պետություն ենք կորցնում, ամոթ ձեզ։ Ամոթ, ամոթ, ամոթ»։

Աղբյուր` Փաստինֆո