Փաստ ինֆո

Անցյալ տարվա պատմություններն են կրկնվում։ Դեժավյու է։ Բնականաբար, ոչ մեկս չենք մոռացել, թե ինչպես անցյալ մայիսի 12-ին Սյունիքի Սև լճի հատվածում ադրբեջանական զինուժը մտավ ՀՀ վարչական տարածք ու ներկա իշխանությունների թողտվությամբ և ՀՀ զինուժին տրված՝ զենքի չդիմելու հրամանի պայմաններում՝շարունակաբար առաջացավ ու առաջացավ։ Ինչպես այս օրերին է ադրբեջանցիներին հայտնաբերող հովիվը փաստում, որ՝ Սյունիքի Ներքին Հանդում առնվազն 10 օր ադրբեջանցի զինվորները տեղակայված են, այնպես էլ՝ անցյալ տարի էին տեղացիներն ահազանգում։ Սակայն, ինչպես նախկին մարզպետն էր հերքում ստույգ տեղեկատվությունն ու հետո՝ խոսքը փոխում, ներկա մարզպետն էլ նույն՝ կեղծիքը տիրաժավորելու ճանապարհով է փորձում գնալ։

Մինչ խորհրդարանում բուն, կարևոր թեմաներից շեղեղ օրակարգեր են բերվում, Սյունիքում ճակատագրական գործընթացներ են ծավալվում, ըստ էության, անցյալ տարվա՝ «դեմարկացիա-դելիմիտացիա» արդեն իսկ սկսված գործընթացը ադրբեջանի օգտին շարունակելու և արագի մեջ ավարտելու համատեքստում։

Եվ մեկ էլ հանկարծ պարզվում է՝ ադրբեջանցիները Սյունիքի մարզի Ներքին Հանդ գյուղի ուղղությամբ մոտ մեկ կիլոմետր առաջ են եկել, բայց թե ե՞րբ՝ հայտնի չէ։ Թշնամու առաջխաղացումը պատահաբար հայտնաբերել է գյուղի հովիվը՝ նկատելով թշնամական վրանները Ներքին Հանդի տարածքում։

«Փաստինֆո»-ի հետ զրույցում Ներքին Հանդի գյուղի վարչական ղեկավարն Խաչատուր Բաղդասարյանն էլ փաստել է սույն տեղեկատվությունը։ Այսինքն, հովիվն իր աչքով տեսել է և հայտնել գյուղապետին։ Վերջինս տեղեկացրել է նաև, որ ադրբեջանցիները հինգ վրան են դրել գյուղի տարածքում և, փաստացի, նշանառության տակ առել գյուղի գերեզմանոցը, իսկ գյուղի խմելու ջրի ակունքը մնացել է թշնամու հսկողության տակ անցած տարածքում, իսկ գյուղացիներն այդ նույն ջուրն են խմում։ Վախենալով, բայց խմում են՝ ասել է։

Ահա այսպես են մեր ոխերիմ հարևանները սողոսկում ՀՀ սահմանից ներս՝ գիշերով, թաքուն, դավադրաբար, վստահաբար, ՀՀ իշխանությունների հետ ներքին պայմանավորվածություններով՝ մեր գյուղացիներին զրկվելով արոտատեղիից, անվտանգ ապրելուց, անվտանգ ջուր խմելուց և օդ շնչելուց։ ։

Թերևս, անցյալ տարվա «օպերացիան» կրկնվում է՝ ՀՀ զինված ուժերին թշնամու առաջխաղացումը չնկատելու տալու հանձնարարականով։ Չխոչընդոտելու, չկրակելու։

Հայաստանի իշխանությունն այսպես հայ զինվորին մղում են հանցագործության՝ իմանալ՝ չհայտնելու, ՀՀ սահմանը չպահելու, զենքը ձեռքին՝ թշնամուն հակահարված չտալու․․․

Եվ այսպես, ունենք փաստ՝ ադրբեջանցի զինվորականները մարտի 3-ից 5-ն ընկած ժամանակահատվածում մեկ կիլոմետր առաջ են եկել Սյունիքի մարզի Կապան համայնքի Ներքին Հանդի վարչական տարածքում, նոր վրաններ խփել ու ամրացել։

Տեղեկատվությունը պաշտոնական աղբյուրից ճշտելու պարտավորություն է՝ աղբյուրն էլ ՀՀ ՊՆ-ն է, որին և դիմում է լրատվամիջոցը։ Բայց դե, ՀՀ ՊՆ-ն փաշինյանական կառավարության պաշտպանական գերատեսչությունը չէր լինի, եթե չհերքեր Սյունիքից ստացված տեղեկատվությունը։

ՀՀ պաշտպանության նախարարությունից ի պատասխան «Արմենպրես»-ի հարցմանը՝ տեղեկացրել են, թե՝ ադրբեջանական ԶՈՒ ստորաբաժանումների առաջխաղացման մասին շրջանառվող լուրերն ապատեղեկատվություն են։ Ասելին, ասել են՝ «կտրականապես հերքում ենք այդ լուրը»։

Ապա՝ ավելացրել են՝ «Նշված հատվածում, որը գտնվում է ադրբեջանական վերահսկողության տակ, ադրբեջանական ստորաբաժանումներն ունեն մի քանի դիրք, որոնք կահավորված չլինելու պատճառով ձմեռային ժամանակահատվածում հնարավոր չէ օգտագործել։ Հիմա, կապված եղանակային պայմանների փոփոխության հետ, ադրբեջանական զինվորականներն ընդամենը վերադառնում են այդ դիրքեր։ Ոչ մի առաջխաղացման մասին խոսք լինել չի կարող»,- հայտնել են ՊՆ-ից:

Ինչ-որ շատ մանրամասն է ՀՀ ՊՆ-ն տիրապետում ադրբեջանական «ինչքին», չեղած՝ «ունեցվածքին», թերևս, նույն ՊՆ գիտությամբ՝ մեզնից գողացված, սեփականած՝ «դիրքին»։

Այսօր հովվի և գյուղապետի պատմածին գումարվել է Ներքին Հանդի մեկ այլ բնակչի հայտարարությունը, ըստ որի՝ Պն-ի պարզաբանումն իրականությանը չի համապատասխանում. «Դա սուտ է, կատեգորիչսկի սուտ է։ Եթե իրենք ցանկանում են, թող գան ու ականատես լինեն, թե որտեղ է գտնվում մեր հողը ու նոր խոսեն։ Եղանակը եթե վատ չլիներ մենք կարայինք բարձրանայինք ու դուք ձեր աչքով դիրքը տեսնեիք։ Դա մեր տարածքն է, մեր պապական տարածքն է»։

Այսինքն, պաշտպանության նախարարությունը ստում է։

Հետաքրքիր է՝ մասնագիտությամբ պատմաբան պաշտպանության նախարարը տեղյա՞կ է, որ Հայաստանի պաշտպանության նախարարությունը հայկական դիրքերը և տարածքները ադրբեջանին վերագրելու գործին է լծված։ Անկեղծ ասած, այս իշխանության որևէ պաշտոնյայի կողմից՝ վարչապետից սկսած՝ պաշտպանության նախարարով, գլխավոր դատախազով ու ԱԱԾ-ով վերջացրած՝ մինչ օրս չենք տեսել Հայաստանի՛ համար այսպես ճակատային լինեն, ՀՀ սահմանների անխախտելիության համար այսպես թունդ պահանջատեր լինեին։

Ընդ որում, ուշադրություն դարձրեք կանխամտածված, կանխակալ ձևակերպումներին՝ «նշված հատվածում, որը գտնվում է ադրբեջանական վերահսկողության տակ, ադրբեջանական ստորաբաժանումներն ունեն մի քանի դիրք»։ Ասել է, թե՝ հայկական գյուղում, մեր գյուղացիների հանդամասում գոյություն ունեին ազիկների վերահսկողության տակ գտնվող դիրքեր, բայց ոչ թշնամին գիտեր, ո՛չ էլ՝ գյուղացիները գիտեին այսքան ժամանակ։ Եվ միայն ՀՀ ՊՆ-ն է, որ բացահայտում , պարզում է, որ մերը մերը չէ, այլ՝ ադրբեջանինը։ Սա չի՞ նշանակում, որ փաշինյանաալիևական եղբայրությունը սկսել է դեմարկացիա-դելիմիտացիա «օպերացիան», ըստ որի հայկական տարածքները ադրբեջանական ձևակերպելու դավաճանական փուլն է հիմա։

Ինչ վերաբերվում է ՊՆ հորդորին՝ սահմանային իրադրության վերաբերյալ տեղեկություն տարածելիս բացառապես պաշտոնական տեղեկատվությամբ առաջնորդվելու մասին, ապա այդ կերպ՝ Հայաստանից մեկ թիզ անգամ չի մնա։

Թուրքից ավելի թուրք, ադրբեջանցուց ավելի ադրբեջանցի են այս իշխանությունները, որոնց հեռացումն է միայն, որ Հայաստանը կարող է փրկել։

Աղբյուր` Փաստինֆո