Փաստ ինֆո

Սյունիքի նորանշանակ մարզպետ Ռոբերտ Ղուկասյանը այսօր չի այցելել Ներքին Հանդ՝ տեղում իրավիճակին ծանոթանալու համար, բայց վստահեցնում է, որ հակառակորդի առաջխաղացման մասին տեղեկությունները չեն համապատասխանում իրականությանը:

Նշենք, որ ավելի վաղ Ներքին Հանդի վարչական ղեկավար Խաչատուր Բաղդասարյանը «Փաստինֆո»-ի հետ զրույցում ահազանգել էր, որ ադրբեջանցիները գյուղի ուղղությամբ մոտ մեկ կիլոմետր առաջ են եկել, 5 վրան տեղադրել ու իրենց հսկողության տակ վերցրել ջրի ակունքը, նշանառության տակ պահում գերեզմանոցը։

Այս առիթով «Փաստինֆո»-ն կապ հաստատեց Սյունիքի մարզպետի հետ՝ գյուղում տիրող իրավիճակի մասին տեղեկություններ ստանալու համար:

Սյունիքի մարզպետն էլ մեզ հետ զրույցում նշեց, որ դեռևս չի այցելել Ներքին Հանդ, վաղն է այցելելու գյուղ, բայց վստահեցրեց, որ կապի մեջ է տեղի բնակիչների հետ.

«Ֆիզիկապես չեմ եղել Ներքին Հանդում, բայց եթե լինել էի, չէի կարող այդ պահին նկատել այդ ամենը: Ես վաղն եմ մեկնում Ներքին Հանդ, կհանդիպեմ բնակիչների հետ՝ տեղում իրավիճակին հասկանալու համար: Ինձ հասած տեղեկություններով՝ գյուղապետն ինչ-որ անհատի տված տեղեկատվության հիման վրա է նման հայտարարություն արել, վաղը կգնամ, կխոսեմ իր հետ, բնակիչների հետ, կհասկանամ՝ որտեղից է եկել այս ամեն ինչը»,-ասաց Ռոբերտ Ղուկասյանը:

Սյունիքի մարզպետը թեև չի եղել Ներքին Հանդում, բայց վստահեցնում է, որ հակառակորդի առաջխաղացման մասին տեղեկությունները չեն համապատասխանում իրականությանը.

«Ես առաջնորդվում եմ միայն ՊՆ հաղորդագրությամբ, կապվել եմ սահմանապահ զորքերի և ՊՆ հատուկ բանակային կորպուսի հրամանատարի հետ և արդեն համոզվել եմ, որ այդ ամենն ապատեղեկատվություն է»- ասաց Ռոբերտ Ղուկասյանը:

Ի դեպ, նշենք, որ ՀՀ ՊՆ-ն իրականում չի հերքել, որ ադրբեջանցիները նշված տեղանքում դիրքավորվել են, այլ պնդում է, թե դա առաջխաղացում չէ, քանի որ ավելի վաղ այն արդեն անցել էր նրանց հսկողության տակ, ուղղակի չէինք դիրքավորվել։ «Նշված հատվածում, որը գտնվում է ադրբեջանական վերահսկողության տակ, ադրբեջանական ստորաբաժանումներն ունեն մի քանի դիրք, որոնք կահավորված չլինելու պատճառով ձմեռային ժամանակահատվածում հնարավոր չէ օգտագործել։ Հիմա, կապված եղանակային պայմանների փոփոխության հետ, ադրբեջանական զինվորականներն ընդամենը վերադառնում են այդ դիրքեր»,- ասվում է ՊՆ-ի հայտարարության մեջ։

Բացի այդ, այսօր տեղեկություններ կան, որ հակառակորդը նաև թեթև զինտեխնիկա է կուտակել Ներքին Հանդի հատվածում, Սյունիքի մարզպետ ասաց.

«Այդպիսի ինֆորմացիա ես չունեմ, ընդհանրապես նման տեղեկատվություն չկա, չեմ կարող ասել՝ կուտակում կա, թե չկա, բայց ավելի շուտ՝ չկա, եթե լիներ մենք դրա մասին կիմանայինք»:

Մեզ հետ զրույցում Սյունիքի համայնքապետը արձագանքեց նաև ահազանգերին, որ Կապան-Մեղրի նորակառույց ճանապարհը նույնպես հայտնվում է թշնամու վերահսկողության տակ.

«Ես չեմ կարող մեկնաբանել նման խոսակցությունները:

Ենթադրաբար խոսքը Շվանիձոր անցնող ճանապարհի մասին է,եթե չեմ սխալվում, այդպես էր ինչ-որ մեկի ֆանտազիան հերիքում, որ պետք է հակառակորդն այդքան առաջ գար, սա էլ ամբողջովին ապատեղեկատվություն է»,-ասաց նա:

Աղբյուր` Փաստինֆո