Փաստ ինֆո

Դատավոր Աննա Դանիբեկյանը կարծում է, թե ԱԺ «Հայաստան» խմբակցության պատգամավոր Արմեն Գևորգյանը կարող է ԵԽԽՎ նիստերին մասնակցել, իսկ մեկ ժամանոց ընդմիջումների ժամանակ շտապել դատարան՝ դատական նիստերին մասնակցելու։ 

Ինչպես արդեն տեղեկացրել ենք՝ դեռևս մարտի 1-ին Արմեն Գևորգյանը միջնորդություն էր ներկայացրել դատարան՝ խնդրելով իրեն թույլ տալ հատել ՀՀ սահմանը և ժամանակավորապես բացակայել ՀՀ-ից՝ ԵԽԽՎ նիստերին մասնակցելու համար։ Գևորգյանը տեղեկացրել էր, որ մարտի 14-15-ին տեղի են ունենալու ԵԽԽՎ արտահերթ լիագումար նիստեր՝ կապված Ուկրաինայում ստեղծված իրավիճակի հետ ու խնդրել , հերթական դատական նիստը նշանակելիս հաշվի առնել, որ այդ օրերին նա մասնակցելու է ԵԽԽՎ նիստերին և չի կարող ներկայանալ դատարան։ Դատավոր Աննա Դանիբեկյանը մերժել էր միջնորդությունը՝ գտնելով, թե Գևորգյանը կարող է մասնակցել նիստերին առցանց եղանակով։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, ՀՀ երկրորդ նախագահ Ռոբերտ Քոչարյանի և ՀՀ նախկին փոխվարչապետ, ԱԺ «Հայաստան» խմբակցության պատգամավոր Արմեն Գևորգյանի գործով այսօր նշանակված դատական նիստն ընդմիջվել է, քանի որ Արմեն Գևորգյանը չի կարողացել ներկայանալ դատական նիստին՝ ԵԽԽՎ նիստին առցանց մասնակցելու համար։ Պաշտպան Լուսինե Սահակյանը ներկայացրել է Արմեն Գևորգյանի դիմումը, որով նա հիշեցրել է դատարանին ԵԽԽՎ նիստերի մասին և խնդրել հետաձգել այսօրվա դատական նիստը, սակայն Դանիբեկյանը դատական նիստը ոչ թե հետաձգեց, այլ՝ ընդմիջեց մինչև ժամը 16.00-ն։ ԵԽԽՎ նիստերի ընթացքում մեկ ժամ ընդմիջում է տրվում և դատարանը գտնում է, որ Գևորգյանը կարող է ընդմիջման ընթացքում ներկայանալ դատական նիստին։ Ընդ որում, ԵԽԽՎ նիստն ընդմիջվում է ժամը 16.00-ին, հետևաբար, այդ ժամին, միևնույն է, Գևորգյանը կարող է և չհասցնել ներկայանալ դատարան, ինչն արձանագրեց նաև փաստաբան Լուսինե Սահակյանը։

Ըստ մեղադրական եզրակացության՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։ Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Հեղինակ՝ Իզաբել Սահակյան

Աղբյուր` Փաստինֆո