Փաստ ինֆո

Նախկին դատախազ, ներկայումս դատավոր Տիգրան Սիմոնյանը կշարունակի քննել Սյունիքի մարզի ընդհանուր իրավասության դատարանի դատավոր Բորիս Բախշիյանի խափանման միջոցի հարցը. Նրա ինքնաբացարկի միջնորդությունը։ 

«Փաստինֆո»-ի թղթակցի հաղորդմամբ՝ Վերաքննիչ քրեական դատարանում՝ դատավոր Տիգրան Սիմոնյանի նախագահությամբ, երեկ կայացել է դատավոր Բորիս Բախշիյանի կալանավորման որոշման դեմ բողոքի հարցով դատական նիստը, սակայն բողոքի քննությունը դեռևս չի եղել։ Պաշտպանության կողմը բարձրացրել է բողոքի մակագրման ընթացքում օրենքով սահմանված կարգի պահպանման անհրաժեշտության հարցը, իսկ պատշաճ պարզաբանում չստանալով՝ ինքնաբացարկի միջնորդություն ներկայացրել։

Փաստաբան Երեմ Սարգսյանը «Փաստինֆո»-ի հետ զրույցում հայտնեց, որ ինքնաբացարկի միջնորդության հիմքում դրվել է այն հանգամանքը, որ այդպես էլ չի հիմնավորվել, որ մակագրությունն այբբենական կարգով է կատարվել։ Պաշտպանության կողմը դատարանի նախագահին ուղղված հարցում է կատարել՝ խնդրելով տրամադրել տեղեկատվություն՝ նույն օրը մուտքագրված գործերի հերթականության վերաբերյալ՝ պարզելու, թե արդյո՞ք այբբենական կարգը պահպանվել է, թե ոչ, սակայն փաստական տվյալներ չեն տրամադրվել, իսկ դատավոր Տիգրան Սիմոնյանը հրաժարվել է պարզել՝ նշելով, թե նման իրավասություն չունի, ինչը, փաստաբանի դիտարկմամբ, իհարկե սխալ է, վերջինս նման իրավասություն ունի։ Փաստաբանի խոսքով՝ հասկանալով, որ նախագահող դատավորն էլ է լավ գիտակցում, որ այբբենական կարգը չի պահպանվել, պարզապես չի ցանկանում միջոցներ ձեռնարկել, որ դա չհաստատվի, ինքնաբացարկի միջնորդություն է ներկայացվել։ Ըստ պաշտպանության կողմի՝ Սիմոնյանն օրենքի հիման վրա ստեղծված դատարան չէ։ Այդուհանդերձ, Վերաքննիչ քրեական դատարանը՝ դատավոր Տիգրան Սիմոնյանի նախագահությամբ, մերժել է ինքնաբացարկի միջնորդությունը և հետաձգել դատական նիստը։

Հաջորդ դատական նիստը նշանակվել է մարտի 18-ին՝ ժամը 11.00-ին։

Հիշեցնենք, որ Սյունիքի մարզի ընդհանուր իրավասության դատարանի դատավոր (լիազորությունները կասեցված են) Բորիս Բախշիյանի նկատմամբ քրեական հետապնդում է իրականացվում՝ Մանվել Փարամազյանի դեմ ցուցմունք տված Նիկոլ Փաշինյանի աջակցին կալանավորելու համար, թեև ամբաստանյալն ինքն էր դրսևորել ոչ պատշաճ վարքագիծ՝ չներկայանալով դատական նիստերին։ Ընդ որում՝ դատախազությունը չի բողոքարկել տվյալ որոշումը և առանց բողոքարկման՝ դատական ակտը կայացնելուց ամիսներ անց դատավորի նկատմամբ քրեական հետապնդում է նախաձեռնել։ Դատավորին մեղադրանք է առաջադրվել ՀՀ քրեական օրենսգրքի 348-րդ հոդվածի 3-րդ մասով՝ անձին ապօրինի կալանավորելու հատկանիշներով, որն առաջացրել է ծանր հետևանք։ Քրեական գործի շրջանակներում ԱԱԾ-ն միջնորդություն է ներկայացրել դատարան՝ դատավորի նկատմամբ կալանավորումը որպես խափանման միջոց ընտրելու մասին, որը փետրվարի 7-ին դատավոր Դավիթ Արղամանյանի կողմից բավարարվել է։

Հեղինակ՝ Իզաբել Սահակյան

Աղբյուր` Փաստինֆո