Փաստ ինֆո

Արցախն իսկական հումանիտար աղետի մեջ է, անմարդկային պայմաններ են, գազ չկա, տաք ջուր չկա, եղանակային պայմաններն էլ շատ վատ են, ցուրտ է, բնակիչները, մեկը մյուսին օգնելով, մի կերպ ապրում են: «Փաստինֆո»-ի հետ զրույցում ահազանգում է Արցախի ԱԺ պատգամավոր Մետաքսե Հակոբյանը:

Նրա փոխանցմամբ՝ գազի հետ կապված խնդիրն Արցախում դեռևս չի կարգավորվել, Ադրբեջանը հրաժարվում է թույլ տալ վերանորոգել գազատարը, ինչի հետևանքով եղանակային ցուրտ պայմաններում Արցախում արդեն տևական ժամանակ է ջեռուցում չկա.

«Պատկերացնել հնարավոր չէ, պետք է աչքով տեսնել, 90-ականների նման մարդիկ տներում փորձում են վառարաններ տեղադրել, ինչ-որ ձևով այս իրավիճակից դուրս գալ՝ հույս ունենալով, որ հարցը կկարգավորվի առաջիկայում: Արցախի ժողովուրդն ինքն իրենով, ինքնակազմակերպվելով, իրար հույս տալով, գոյատևում են, բայց իրականում անմարդկային վիճակ է, հումանիտար աղետի մեջ ենք»,-ասաց Հակոբյանը:

Նրա խոսքով՝ Արցախի իշխանությունը ոչինչ չի անում գազի բացակայության պայմաններում մարդկանց օգնելու համար.

«Արցախում իշխանություն գոյություն չունի, տեսանք երեկ էլ շքեղ տեսքով ու դեմքերով, կարծես բոլոր խնդիրները լուծել էին, մի մեծ պատվիրակություն Արցախից եկել էր ՀՀ նախագահի ինագուրացիային: Իրենք դարձել են պարզապես լրատվության միջոց, ժամանակ առ ժամանակ թեթև լուր են տալիս ու բնակչությանը ավելի են խուճապի մեջ գցում իրենց լուրերով: Այստեղի իշխանական պատգամավորներն էլ ամեն բան թողած պայքարում են ընդդիմության դեմ, ամբողջ օրն իրենց վիրտուալ կյանքում Արցախ են փրկում, ընդդիմության հետ են պատերազմում, երբ հարց ես տալիս, դուք ինչով եք զբաղված, ասում են՝ մենք ինչ անենք, պետք է նստենք, սպասենք»,-ասաց Հակոբյանը:

Աղբյուր` Փաստինֆո