Փաստ ինֆո

ՀԱԿ-ը հրաժարվում է մեկնաբանել ՀՀ ԱԳՆ տարակուսելի հայտարարությունը՝ Ադրբեջանի՝ խաղաղության պայմանագրին առնչվող առաջարկների վերաբերյալ:

Ավելի վաղ հայտնել էինք, որ Ադրբեջանը Հայաստանին է ներկայացրել «Խաղաղության պայմանագրի» իր տարբերակը, որը պարունակում է 5 կետանոց նախապայման։ ՀՀ ԱԳՆ այսօր հայտարարել է, որ պատասխանել են Ադրբեջանի կողմից փոխանցված խաղաղության պայմանագրի վերաբերյալ առաջարկներին և Ադրբեջանի հետ խաղաղության պայմանագրի կնքման նպատակով բանակցություններ կազմակերպելու համար դիմել է ԵԱՀԿ ՄԽ համանախագահությանը։

Այս առիթով «Փաստինֆո»-ն փորձեց մեկնաբանություն ստանալ ՀԱԿ փոխնախագահ Լևոն Զուրաբյանից, վերջինս, սակայն պատասխանեց, որ մեկնաբանություն չունեն.

«Մեկնաբանություն առայժմ չկա, եթե ավելի լուրջ մանրամասներ լինեն, նոր կկարողանանք մեկնաբանություն տալ, չկա այն ինֆորմացիան, որի հիման վրա կարող ենք մեկնաբանություն տալ»,-ասաց նա:

ՀՀ ընդդիմադիր ուժերն այրդեն իսկ հայտարարել են, որ Ադրբեջանի հետ Հայաստանի երկկողմ հարաբերությունների հարցը ԵԱՀԿ մինսկի խմբի համանախագահների մանդատից դուրս է ու Հայաստանը, փաստորեն, ձեւախեղում է այն։

Փորձագիտական համայնքի կողմից ներկայացված տվյալների համաձայն՝ Ադրբեջանն իր նախապայմաններով պահանջել է Հայաստանի կողմից Ադրբեջանի տարածքային ամբողջականության ճանաչումը՝ այդ թվում Արցախի հանդեպ ցանկացած պահանջից հրաժարում, Հայկական զորքերի դուրս բերում այսպես կոչված, «անկլավներից», խոսքը Արարատի մարզի մեկ և Տավուշի մարզի 5 գյուղերի մասին է, հայ-ադրբեջանական սահմանի դեմարկացիա և դելիմիտացիա՝ 1970 թվականի խորհրդային քարտեզի հիման վրա, տրանսպորտային հաղորդակցության ապաշրջափակում՝ այդ թվում հատուկ կարգավիճակ տալով, այսպես կոչված, «Զանգեզուրի միջանցքին», Ադրբեջանի փախստականների՝ Հայաստան վերադառնալու հնարավորության քննարկում կամ նրանց նյութական վնասի փոխհատուցում։

Աղբյուր` Փաստինֆո