Փաստ ինֆո

Նարեկ Մանթաշյանի համար մեղադրանքի էությունը պարզ չէ։ Այս մասին «Դրոշ»-ի գործով դատական նիստի ընթացքում ասաց ինքը՝ Նարեկ Մանթաշյանը։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Կարեն Ֆարխոյանի նախագահությամբ, այսօր կայացել է «Այլընտրանք» ՀԿ նախագահ Նարեկ Մանթաշյանի գործով դատական նիստը, որի ընթացքում մեղադրանքի կողմը հրապարակել է մեղադրական եզրակացությունը, ինչից հետո Նարեկ Մանթաշյանը հայտարարեց, որ իրեն հասկանալի չէ առաջադրված մեղադրանքի էությունը։ Այդուհանդերձ, դատարանը սահմանեց ապացույցների հետազոտման հաջորդականություն, համաձայն որի՝ առաջինը կհետազոտվեն գրավոր փաստերը, ապա՝ կլսեն վկաներին, վերջում՝ ամբաստանյալին։

Մինչ դատարանը կանցներ գործում առկա գրավոր ապացույցների հետազոտմանը՝ պաշտպան Ալեքսանդր Կոչուբաևը միջնորդություն ներկայացրեց՝ Նարեկ Մանթաշյանի նկատմամբ ընտրված խափանման միջոց կալանավորումը գրավով փոխարինելու մասին։ Միջնորդության հիմքում դրվել է Մանթաշյանի՝ առողջական վիճակի վատթարացման հանգամանքը։ Ըստ փաստաբանի՝ շաքարային դիաբետ ունեցող ամբաստանյալին ՔԿՀ-ն ինսուլին չի տրամադրել և պատշաճ չի կազմակերպել նրա առողջական իրավունքը։ Սակայն դատարանը մերժեց փոխել խափանման միջոցը։

Պաշտպանի հաջորդ միջնորդությունը վերաբերում էր Նարեկ Մանթաշյանի տեսակցությունների և հեռախոսազանգերի արգելքը վերացնելուն, ինչը դատարանը բավարարեց։

Հիշեցնենք, որ 2020թ նոյեմբերի 9-ին կապիտուլյացիոն ակտի ստորագրմանը հաջորդել են զանգվածային բողոքի ակցիաներ, որոնց վերաբերյալ ԱԱԾ-ում քրեական գործ է քննվել։ Նարեկ Մանթաշյանին մեղադրանք է առաջադրվել ՀՀ քրեական օրենսգրքի 225-րդ հոդվածի 1 -ին և 2-րդ մասերով՝ այն է զանգվածային անկարգություններ կազմակերպելը և դրանց ժամանակ բռնություն գործադրելը ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը, իսկ կառավարության շենքում դրոշ ծածանելը ԱԱԾ-ն գնահատել է որպես կողոպուտ։

Հատկանշական է, որ քրեական գործը քննվում է 2020թ և դեռևս այդ ժամանակ դատարանը մերժել էր Մանթաշյանին կալանավորելու մասին միջնորդությունը, Մանթաշյանը կալանավորվել է միայն 2021թ տարեմուտին, երբ պարզվել է, որ կառավարության շենքում դրոշ ծածանելը դիտարկվել է որպես կողոպուտ և վարույթն իրականացնող մարմինը լրացրել է մեղադրանքը, ապա ներկայացրել կալանավորման միջնորդությունը։ Քրեական գործով նախաքննությունն ավարտվել է, դատախազությունը հաստատել է մեղադրական եզրակացությունը և գործն ուղարկել դատարան։

Հեղինակ՝ Իզաբել Սահակյան

Աղբյուր` Փաստինֆո