Փաստ ինֆո

Նիկոլ Փաշինյանին իշխանության են բերել այսպես կոչված «խաղաղության» ծրագրի, կոմունիկացիաների բացման և Սյունիքով միջանցքի համար, նա ամեն կերպ ուզում է առաջ քաշել իր «խաղաղության» թեզը, որովհետև հասկանում է՝ եթե ուրիշ թեզ առաջ տանի, ապա այն ուժերը, որոնք իրեն 2018թ-ին օգնեցին գալ իշխանության, կհեռացնեն իշխանությունից, այս պատճառով ստիպված առաջ է բրդում իր «խաղաղության » կոնցեպցիան և խուսափում է գնահատական տալ Արցախում Ադրբեջանի սադրանքներին: «Փաստինֆո»-ի հետ զրույցում նման դիտարկում արեց քաղտեխնոլոգ Արմեն Բադալյանը:

Նշենք, որ այսօր Կառավարության նիստին Նիկոլ Փաշինյանը հերթական անգամ խուսափեց գնահատական տալ Ադրբեջանի ագրեսիվ գործողություններին, որն արդեն տևական ժամանակ է ռմբակոծում Արցախի գյուղերը:Նա թեև արձանագրեց, որ Արցախում լարվածություն կա, բայց միևնույն ժամանակ հայտարարեց, որ զերծ կմնա գնահատականներ տալուց:

Նկատենք, որ Արցախում ստեղծված լարված իրավիճակին գնահատական չեն տվել իշխանության մյուս ներկայացուցիչները ևս:

Ըստ քաղտեխնոլոգ Արմեն Բադալյանի՝ եթե Նիկոլ Փաշինյանը գնահատական տա Ադրբեջանի սադրանքներին, ապա ստացվելու է, որ «խաղաղության» մասին իր իսկ առաջ քաշած թեզերը կեղծ են, ինքը ստել է.

«Նիկոլ Փաշինյանը ներկայացրել է, որ խաղաղության դարաշրջան է մեկնարկում, բայց հասկանում է, որ Ադրբեջանը ոչ մի խաղաղություն էլ չի ուզում, ընդհակառակը՝ բռնություններ ու սադրանք է իրականացնում սահմանին, եթե հիմա էլ ինքը նշի, որ խաղաղություն դարաշրջան ենք բացում, հանրությունը կասի՝ ի՞նչ խաղաղություն, եթե Ադրբեջանն ամեն օր զինվոր է սպանում, իսկ եթե դատապարտի Ադրբեջանին, ապա կստացվի, որ իր թեզը խաղաղության մասին չի համապատասխանում իրականությունը, կեղծ թեզեր են, ինքը խաբել է։ Դրա համար հիմա խուսափում է իրականությունը ներկայացնել այնպես, ինչպես կա, այսինքն՝ ոչ մի խաղաղություն էլ չկա, կա լարված իրավիճակ, Ադրբեջանը ռազմական գործողությունների է դիմում, որի արդյունքում զոհ կա,հիմա էլ Փաշինյանն իր սովորության համաձայն փորձում է հարցը ներկայացնել ոչ թե այնպես, ինչպես կա, այլ այնպես, ինչպես ինքն է ցանկանում, հակառակ դեպքում ստիպված կլինի ընդունել, որ իր խաղաղության կոնցեպցիան հոդս է ցնդում»,-ասաց նա:

Բացի սա՝ քաղտեխնոլոգի համոզմամբ, Նիկոլ Փաշինյանը և իշխանության ներկայացուցիչներն, առհասարակ, խուսափում են գնահատականներ հնչեցնել Արցախի մասին, քանի որ Արցախի հարցը ինտելեկտուալ լուրջ գործունեություն է պահանջում, իսկ իշխանության ներկայացուցիչները, ինչպես զրուցակիցն է նշում, «ինտելեկտի բավարար պաշար» չունեն այս խնդրով զբաղվելու համար.

«Եթե չխուսափեն այդ հարցից, ուրեմն պետք է ակտիվորեն զբաղվեն այդ հարցով, քաղաքական շատ լուրջ հարցերով զբաղվեն, իսկ իրենք դրա պոտենցիալը չունեն, դրա համար ավելի հեշտ է հրաժարվեն, պետք է իմանան՝ ի՞նչ է գեոպոլիտիկան, ազգային շահերն առաջ տանելը, իսկ իրենց թիմը չունի ինտելեկտուալ պաշար, որպեսզի հասկանան՝ ինչ է միջազգային գեոպոլիտիկան, չեն կարողանում հասկանալ այս ամենից, դրա համար խուսափում են »,-ասաց նա:

Աղբյուր` Փաստինֆո