Փաստ ինֆո

Գիշերային ակումբի տնօրենը և անվտանգության աշխատակիցը մեղադրվում են մի խումբ անձանց կողմից սպառողին՝ տվյալ պարագայում Երեւանում գտնվող Ռուանդայի քաղաքացիներին խոշոր չափերով խաբելու և ազատությունից ապօրինի զրկելու մեջ։ Մեղադրանքն առաջադրվել է Ռուանդայի երկու քաղաքացու ցուցմունքի հիման վրա, որոնք քրեական գործով տուժող են ճանաչվել։ Այս մասին «Փաստինֆո»-ի հետ զրույցում հայտնեց պաշտպանական խմբի անդամ Ժիրայր Ղարագյոզյանը՝ հավելելով, որ իրենց պաշտպանյալներն առաջադրված մեղադրանքները չեն ընդունում։

Իսկ ինչի մասին է քրեական գործը. պարզվում է՝ փետրվարի 16-ին Ռուանդայի երկու քաղաքացի հանցագործության մասին հաղորդում են ներկայացրել՝ հայտնելով, որ ակումբի անվտանգության աշխատակիցը մի քանի այլ անվտանգության աշխատակիցների հետ ակնհայտ անհամապատասխան հաշիվը վճարելու հարցի հետ կապված իրենց մեկ ու կես ժամ ապօրինի զրկել են ազատությունից և հնչեցրել ծանր մարմնական վնաս պատճառելու սպառնալիքներ, ստացել 800.000 ՀՀ դրամ գումար, ինչից հետո ազատ են արձակել։ Հաղորդման հիման վրա հարուցվել է քրեական գործ՝ ՀՀ քրեական օրենսգրքի 212-րդ հոդվածի 2-րդ մասի 1-ին և 2-րդ և 133-րդ հոդվածի 2-րդ մասի 1-ին, 6-րդ, 7-րդ կետերի հատկանիշներով։ Քրեական գործի շրջանակներում ակումբի տնօրենին և անվտանգության աշխատակցին մեղադրանք է առաջադրվել, տնօրենի նկատմամբ փետրվարի 17-ին որպես խափանման միջոց է ընտրվել կալանավորումը։ Անվտանգության աշխատակցի նկատմամբ կիրառված չէ որևէ խափանման միջոց։

«Մեղադրանքն առաջադրվել է ընդամենը ենթադրյալ երկու տուժողի ցուցմունքների հիման վրա։ Քրեական գործով ցուցմունքներ են տվել նաև ենթադրյալ տուժողների հետ ժամանակ անցկացրած աղջիկները, որոնք ամբողջությամբ հերքել են տուժողների ցուցմունքները, նշել, որ միասին ժամանակ են անցկացրել փետրվարի 5-ին՝ նշված ակումբում և սպառողին խաբելու, ազատությունից զրկելու մասին անգամ խոսք գնալ չի կարող։ Այսինքն՝ նրանք այն անձինք են, որոնք ականատես վկաներն են և առանցքային դեր ունեն սույն գործի քննության շրջանակներում»,- նշեց Ղարագյոզյանը։

Փաստաբանը հայտնեց, որ իրենց պաշտպանյալների և ենթադրյալ տուժողների մասնակցությամբ առերես հարցաքննություն տեղի չի ունեցել։ Ինչ վերաբերում է ակումբի տնօրենի խափանման միջոցին, ապա փաստաբանը տեղեկացրեց, որ կալանավորման որոշման դեմ վերաքննիչ բողոք են ներկայացրել, որով վիճարկվել է ինչպես հիմնավոր կասկածի առկայությունը, այնպես էլ՝ արձանագրված կալանավորման միակ հիմքը՝ գործի քննությանը խոչընդոտելու հավանականությունը։

Նշենք, որ պաշտպաններն ահազանգել էին, որ անհրաժեշտ քննչական գործողությունները կատարելուց հետո ակումբը շարունակում է մնալ կապարակնքված, ինչի հետևանքով ակումբի բնականոն գործունեությունը, ըստ պաշտպանների, առանց որևէ իրավական հիմքի դադարեցված է։ Ակումբի վերաբերյալ վերջին քննչական գործողությունը կատարվել է փետրվարի 26-ին։

«Անհրաժեշտ բոլոր քննչական գործողությունները կատարելուց հետո վարույթն իրականացնող մարմինը ապօրինի կերպով շարունակում է ակումբը կապարակնքված պահել: Նշված ապօրինի գործողություններով կոպտորեն խախտվում են ՍՊ ընկերության իրավունքները, ինչի հետևանքով ընկերությունը հայտնվել է ֆինանսապես բարդ դրության առաջ»,- հայտարարել էին փաստաբանները՝ հավելելով, որ քրեական հետապնդման մարմիններն ակնհայտորեն չարաշահում են իրենց լիազորությունները, որը քրեորեն պատժելի արարք է։

Փաստաբան Ժիրայր Ղարագյոզյանը «Փաստինֆո»-ի հետ զրույցում հայտնեց, որ պաշտոնեական լիազորություններն առերեւույթ չարաշահելու դեպքի առթիվ քննիչի եւ հսկող դատախազի գործողությունների (անգործության) դեմ հանցագործության մասին հաղորդումն արդեն իսկ ներկայացված է ՀՀ հակակոռուպցիոն կոմիտեին. թեեւ մեծ ակնկալիքներ չունեն, որ քրեական գործ կհարուցվի։ Այդուհանդերձ, քրեական գործի հարուցելը մերժելու մասին որոշումը ստանալու դեպքում այն օրենքով սահմանված կարգով կբողոքարկվի։

Լուսանկարում՝ փաստաբան Ժիրայր Ղարագյոզյանը

Հեղինակ՝ Իզաբել Սահակյան

Աղբյուր` Փաստինֆո