Փաստ ինֆո

Երևանի ընդհանուր իրավասության դատարանում՝ դատավոր Տաթևիկ Գրիգորյանի նախագահությամբ, շարունակվում է հասարակական-քաղաքական գործիչներ Բագրատ Եսայանի, Նարեկ Մանթաշյանի, Սարգիս Կարապետյանի և մյուսների գործով դատական նիստը։ «Փաստինֆո»-ի թղթակցի հաղորդմամբ՝ գործը գտնվում է ապացույցների հետազոտման փուլում և ըստ դատարանի կողմից սահմանված հաջորդականության՝ այժմ դատարանում հետազոտվում են գործում առկա տեսասկավառակները, որոնցում, ըստ մեղադրանքի կողմի, առկա են տվյալներ՝ ամբաստանյալների կողմից ենթադրյալ արարքները կատարելու վերաբերյալ։

Պաշտպանության կողմը, սակայն, գտնում է, որ ներկայացված տեսանյութերով որևէ կերպ չի հիմնավորվում՝ իրենց կողմից Փաշինյանի հասցեին սեռական բնույթի հայհոյանք հնչեցնելու հանգամանքը։ Ավելին, պնդում են, որ տեսանյութերում հստակ երևում է, որ ամբաստանյալները վիճաբանության ընթացքում փորձել են բաժանել կողմերին։ Տեսանյութերի հետազոտման ընթացքում Բագրատ Եսայանը հայտարարությամբ հանդես եկավ՝ զարմանք հայտնելով դատախազի վարքագծից, քանի որ տեսանյութում հնչում է մի քանի բան՝ «առանց թուրքի Հայաստան», ինչը սեռական բնույթի հայհոյանք չէ և եթե անձը, ում նկատմամբ ենթադրաբար կարող էր հնչել նշված արտահայտությունը, վիրավորվել է դրանից, պետք է տուժող ներգրավված լիներ։ Բացի այդ՝ «թուրք, թուրք, թուրք» արտահայտությունը նույնպես որևէ հնարավորություն չկա հստակեցնելու, թե ում է ուղղված։ Եսայանն ընդգծեց, որ ինքը չի հնչեցրել «բ. տղա Նիկոլ», բայց այս իրավիճակում լիովին համամիտ է տվյալ բնութագրի հետ։

Նշենք, որ դատական նիստի մեկնարկից առաջ պաշտպան Ռուբեն Մելիքյանը լրագրողների հետ զրույցում ասաց, որ այս գործն առհասարակ չպետք է լիներ, իսկ եթե կա, ապա պաշտպանության կողմի խնդիրը՝ դատավարության ընթացքում ցույց տալ, որ նման վարույթ իրականացնելն ուղղակի աբսուրդային է։

«Միայն այն, որ մարդիկ իրենց գործերը թողած գալիս են այստեղ՝ իրենց խաղաղ հավաքն իրականացնելու, կոշտ քննադատություն իրականացնելու համար, ընդ որում, գործող իշխանությունները դրա շատ ավելի խայտառակ բաներն էին անում, որևէ մեկը դատվե՞ց՝ տների մոտ դագաղներ տանելու համար։ Այս ամենը հակառակ արդյունքն է լինելու։ Մենք այստեղ զուտ պաշտպաններ չենք»,- նշել է Մելիքյանը։
Հիշեցնենք, որ 2021թ ապրիլին Սյունիքի մարզ կատարած այցի ընթացքում բողոքի ակցիա է իրականացվել՝ ընդդեմ Նիկոլ Փաշինյանի։ Ակցիայի մասնակիցները խոչընդոտել են Նիկոլ Փաշինյանի մուտքը՝ Սյունիքի մի շարք բնակավայրեր, «ողջունել» Փաշինյանին, ինչից հետո ակցիայի մի շարք մասնակիցներ ձերբակալվել են։ Ի աջակցություն ձերբակալված սյունեցիների մի շարք քաղաքացիներ հավաքվել են ՀՀ գլխավոր դատախազության շենքի մոտ և բողոքի ակցիա իրականացրել, ձվեր նետել դատախազության շենքի մոտ։

Սույն քրեական գործով մեղադրյալները տասն են՝ Արսեն Վարդանյանը, Էմանուել Սինանին, Նարեկ Վերդյանը, Արշակ Սարգսյանը, Սարգիս Կարապետյանը, «Հայաստան» խմբակցության պատգամավոր, ՀՅԴ-ական գործիչ Գեղամ Մանուկյանի որդին՝ Տարոն Մանուկյանը, Մեսրոպ Եղիազարյանը, Աշոտ Հովհաննիսյանը, հասարակական-քաղաքական գործիչ Բագրատ Եսայանը, Նարեկ Մանթաշյանը։ Վերջիններս մեղադրվում են խուլիգանություն կատարելու մեջ, ըստ մեղադրանքի՝ վերջիններս խախտել են հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունքով:

Աղբյուր` Փաստինֆո